“...Gələcək planlarımıza gəlincə, bəlkə də bilirsiniz ki, hazırda biz rəqəmsal transformasiya üzrə hökumət strategiyası üzərində işləyirik. Ümidvarıq ki, bu məsələdə “Microsoft”la yaxşı əməkdaşlıq edə biləcəyik. Bu proqram növbəti 5 il üçün planlaşdırılır. Eyni zamanda, süni intellekt üzrə strategiyanın ətraflı işlənib hazırlanması ilə bağlı məsələlər də bizim gündəliyimizdədir. Kibertəhlükəsizlik hər zaman gündəlikdədir, çünki bu, bütün ölkələrin hazırlıqlı olmalı olduğu məsələdir. İndiyədək bizdə belə böyük hallar olmayıb, lakin heç kim sığortalanmayıb.
Ona görə də bu da bizim gələcəyimiz üçün prioritetlər sırasında qalır. Əlbəttə, mən icra olunmuş layihələrin siyahısına baxdım. Aramızdakı əməkdaşlıq çox təsirləndiricidir və əminəm ki, bu, qarşıdakı illərdə tərəfdaşlığımızı gücləndirəcək. Həmçinin, pandemiya ilə əlaqədar bu vəziyyət bizi məcbur edir ki, təhsil, distant təhsil məsələlərinə yeni bucaqdan baxaq. Baxmayaraq ki, mövcud vəziyyətə özümüzü uyğunlaşdırmaq üçün bizim çox vaxtımız olmadı, lakin müəyyən addımlar atılmışdır. Çünki bizim məktəb və universitetlərimiz mart ayından bəri bağlanıb. Biz sentyabrın 15-dən başlayacaq yeni tədris ilinə hazırlaşmalıyıq.
Həmin zaman pandemiya ilə bağlı vəziyyətin necə olacağını bilmirik, məktəb və universitetləri aça biləcəyimizi bilmirik, ona görə də biz ən pis ssenariyə hazırlıqlı olmalıyıq. Əgər problem davam edirsə və getdikcə pisləşirsə, o zaman biz bu barədə düşünməli olacağıq. Lakin indi bu barədə düşünmək lazımdır. Həmçinin, distant işlə bağlı məsələlər... Bu da ölkə üçün olduqca vacibdir. Təxminən bunlar bizim planlarımızda diqqətimizi cəmlədiyimiz sahələrdir”.
Bunu Prezident İlham Əliyev “Microsoft” şirkətinin vitse-prezidenti Filip Roq, Mərkəzi və Şərqi Avropa bölgəsinin korporativ əlaqələr və hüquqi məsələlər üzrə rəhbəri Nanna-Luize Linde və “Microsoft” şirkətinin digər nümayəndələri ilə keçirilən videokonfrans zamanı deyib.
“Ölkəmizin bu istiqamətdə görməyə başladığı işlərin böyük əhəmiyyətini qeyd etmək istəyirəm”
Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, Prezident İlham Əliyevlə sözügedən şirkətin rəhbərliyi arasında keçirilən videokonfrans olduqca vacib və aktual bir məsələ üzərində qurulub. “Azərbaycan dövləti ilə “Microsoft” şirkəti arasındakı bu görüş böyük əməkdaşlığı göstərir. Xüsusilə nəzərə almalıyıq ki, bu məsələdə ölkənin birinci şəxsi siyasi iradə ortaya qoyur. Bu məsələdə ölkə Prezidentinin mövqe ortaya qoyması Azərbaycan üçün həm indiki dövrdə, həm də postpandemiya dönəmində başlanan böyük bir mərhələnin əsasını qoyur. Bu mərhələ ondan ibarətdir ki, indiki dövr pandemiya ilə bağlı qeyri-müəyyəndir, heç bir səviyyədə təhlükənin nə zaman sovuşacağı məlum deyil, bununla bağlı proqnozlar vermək də hələ tezdir. Buna görə də biz hazırkı vəziyyətə uyğun elə qərarlar qəbul etməliyik ki, bu qərarlar həm indiki, həm də postpandemiya dövrü üçün Azərbaycanın itkilərinin minimuma endirilməsi ilə bağlı olsun. Cənab Prezident birmənalı olaraq bildirdi ki, biz ən çətin situasiyalara, ən pis ssenariyə hazırlıqlı olmalıyıq. Bu situasiyanın hansı səviyyəyə qədər çətin olacağını demək mümkün deyil, çünki pandemiya ilə bağlı vəziyyət qeyri-müəyyəndir. Ona görə də dünyanın İT texnologiyalar sahəsində ən nəhəng şirkəti olan “Microsoft” korporasiyası ilə artıq yeni dövrün çağırışlarına uyğun olaraq işlər görülməsi Azərbaycan Prezidentinin siyasətində innovasiyalara nə qədər yer verildiyinin təzahürüdür və eyni zamanda, ən çətin dövrlərdə belə Azərbaycan dövlətini, vətəndaşları vəziyyətdən itkisiz çıxarmaqla bağlı gördüyü böyük işlərin davamıdır. Bilirsiniz ki, artıq Təhsil Nazirliyi ilə “Microsoft” şirkəti arasında əməkdaşlıq qurulub və bu sahədə işlər çox yüksək səviyyədə gedir. Təsadüfi deyil ki, Azərbaycanda pandemiya dövründə “Virtual məktəb” platformasının ərsəyə gəlməsi məhz Təhsil Nazirliyi ilə “Microsoft” korporasiyasının əməkdaşlığının nəticəsidir.
Çox nəhəng, eyni zamanda da çox faydalı olan bir layihəni xeyli müddət sonra digər ölkələr də tətbiq etməyə başladılar. Əlbəttə, pandemiya bizi yeni və fərqli istiqamətlərdə strategiyamızı qurmağa sövq edir. Bu, eyni zamanda, təhsillə bağlı məsələlərdir. Hesab edirəm ki, biz çağırışlara hazır olmalıyıq. Pandemiya bitdikdən sonra da bizi, bütövlükdə, gələcəkdə nə gözlədiyindən heç kəs, heç bir dövlət sığortalanmayıb. Fikrimcə, ona görə də Azərbaycanda təhsilin yeni formalarının ərsəyə gətirilməsi, inkişaf etdirilməsi ilə bağlı ölkənin birinci şəxsinin söylədiyi fikirlər bizi bu istiqamətdə işlər görməyə sövq edir. Bu işləri tezləşdirmək, sürətləndirmək lazımdır. Bilirsiniz ki, distant təhsil artıq dünyada oturuşmuş təhsil növlərindən biridir. Məsafədən təhsil təhsilin ən doğru formalarından biridir. Ona görə də bu istiqamətdə qabaqcıl təcrübələr öyrənilməlidir. Bu baxımdan, “Microsoft” şirkəti ən uğurlu seçimlərdən biridir”.
İ.Orucovun qeyd etdiyinə görə, “Microsoft” şirkəti ilə distant təhsilin inkişaf etdirilməsi ilə bağlı işlərin görülməsi Azərbaycanın həm indiki, həm də postpandemiya dövründə təhsil sektorunun inkişafına gətirib çıxaracaq. Müsahibimizin sözlərinə görə, pandemiyanın nə zaman bitəcəyini bilmirik və bütövlükdə, sentyabrın 15-nə - yeni tədris ilinə hazırlaşarkən belə biz bütün detallar üzrə hazırlığımızı davam etdirməliyik. “Yəni pandemiya bitsə, ənənəvi dərslər davam etdiriləcək, əks təqdirdə isə məktəblərimizi, təhsil alanlarımızı və təhsil verənlərimizi yeni situasiyaya hazırlamalıyıq. Yenə qeyd etmək istəyirəm ki, bütün bunlar versiyalardır və biz bilmirik ki, sentyabrın 15-də məktəblər açıla bilər, yaxud bilməz. Bunu heç kim deyə bilməz. Amma, bütün hallarda, qabaqlayıcı tədbirlərin görülməsi vacibdir. Artıq sözügedən görüşdən də məlum oldu ki, Azərbaycan dövləti bu istiqamətdə nə mümkündürsə edəcək. Məqsəd odur ki, Azərbaycan insanları təhlükədən sovuşa bilsinlər, pandemiyadan az itkilərlə çıxsınlar, həmçinin də təhsilimiz geridə qalmasın, təhil alan balalarımız bu proseslərdən itkisiz çıxa bilsinlər. Əlbəttə ki, təkcə pandemiya dövrü ilə əlaqədar deyil, həm də postpandemiya dönəminin, müasir dövrün çağırışlarına cavab vermək istiqamətində ölkənin siyasəti var və çox doğru siyasətdir. Ona görə də mən ölkə başçısının sözügedən videokonfransdakı çıxışına çox böyük önəm verirəm. Ölkəmizin bu istiqamətdə görməyə başladığı işlərin böyük əhəmiyyətini qeyd etmək istəyirəm. Fikirləşirəm ki, bütün bunlar Azərbaycan vətəndaşı, Azərbaycan təhsili, dövlətin inkişafı naminədir” - deyə İ.Orucov vurğuladı.
İradə SARIYEVA
