Prezident İlham Əliyev “Microsoft” şirkətinin təşəbbüsü ilə şirkətin vitse-prezidenti Filip Roq, Mərkəzi və Şərqi Avropa bölgəsinin korporativ əlaqələr və hüquqi məsələlər üzrə rəhbəri Nanna-Luize Linde və “Microsoft” şirkətinin digər nümayəndələri arasında keçirilən videokonfrans zamanı Azərbaycanın pandemiya ilə mübarizə sahəsindəki uğurları və taktikasından danışıb.
Prezident bildirib ki, biz özəl sektora, xüsusilə pandemiyadan əziyyət çəkən sahələrə, turizm və onunla əlaqəli sahələrin bərpasına yardım edəcəyik: "Beləliklə, fəaliyyətimiz və gələcək planlarımıza gəlincə, əlbəttə ki, əsas diqqəti insanların koronavirusdan qorunmasına yönəltdik və bunun bizim iqtisadi artımımıza çox mənfi təsir göstərəcəyini aydın şəkildə başa düşürük. Bizim bu il üçün çox böyük perspektivlərimiz var idi və ilin birinci rübü çox ümidverici idi. Lakin indi beş ayın nəticələri ümumi daxili məhsulda kiçik azalmanın – təxminən 1,7 faiz azalmanın olduğunu göstərir. Lakin eyni zamanda, iqtisadiyyatın bəzi sektorlarında, xüsusilə neft və qazla əlaqəli olmayan sektorlarda artım qeydə alınıb. Bu səbəbdən, bu gün biz məhdudiyyət tədbirlərini uzlaşdırırıq, çünki COVID-19 hələ də mövcuddur. Eyni zamanda, biz ölkəmizi açmağa və həyatımızın müxtəlif sahələrinin fəaliyyətini bərpa etməyə başlayırıq. Beləliklə, ümidvaram ki, bu balanslaşdırılmış yanaşma bizə, ilk növbədə, pandemiyaya qarşı uğurlu mübarizəni davam etdirməyə kömək edəcək. Eyni zamanda, biz özəl sektora, xüsusilə pandemiyadan əziyyət çəkən sahələrə, turizm və onunla əlaqəli sahələrin bərpasına yardım edəcəyik".
Məlum olduğu kimi, Azərbaycan pandemiya ilə mübarizədə olduqca ciddi uğurlara imza atıb. Ölkə başçısı bundan sonra balanslaşmış yanaşma modelini tətbiq etməklə pandemiya ilə mübarizənin davam edəcəyini bildirib. Bu yeni modeli necə anlamaq olar?
Milli Qeyri Hökumət Forumunun prezidenti Rauf Zeyni “Bakı-Xəbər”ə açıqlamasında bildirdi ki, Azərbaycan bu virusla mübarizədə ilk gündən nizam-intizam nümayiş etdirir:”Cənab Prezidentin rəhbərliyi ilə bu proses Azərbaycan modelinə uyğun şəkildə aparılır. Bura Operativ Qərargahın yaradılması və lazım olan bütün zəruri qərarların verilməsini aid edə bilərik. Dövlətin konkret olaraq nələri etdiyi ilə bağlı biz sizinlə əvvəlki müsahibələrimizdə detallı danışmışıq. Kiçik istisnaları çıxmaq şərtilə deyə bilərik ki, Azərbaycan pandemiya ilə mübarizədə uğurlu nəticələrə imza atıb. Yoluxmada müşahidə olunan artım isə vətəndaşların şəxsi səhlənkarlığına bağlı olan məsələdi. Bu məsələdə ölkəmizdə olan bütün ixtisas sahibləri maksimum dərəcədə virusun qarşısının alınmasında əmək sərf ediblər. Bura polisləri, həkimləri, elə siz jurnalistləri də aid edə bilərik. Bu sahədə QHT-lərin apardıqları maarifləndirmə tədbirlərini xüsusi vurğulamaq istərdim. Cənab Prezidentin qeyd etdiyi balanslı modelin mahiyyəti aydındır. Burada daha çox pandemiyanın vurduğu iqtisadi ziyanların hansı üsullarla kompensasiya olunacağı nəzərdə tutulur. Məsələn, iqtisadiyyatın bir aspektinə dəyən ziyanı digər sahələrin fəaliyyətini gücləndirməklə kompensasiya etmək. Bura özəl sektora dövlətin verəcəyi dəstəyi də əlavə edə bilərik. Bir tərəfdən koronavirusun qarşısını almaqdan ötrü sərt qərarlar verilir, digər tərəfdən isə dövlət bütün sahələrə yardım edir. Məsələn, həftəsonu sərt karantin qaydalarının hara şamil olunmasında da bu balans gözlənilir. Xüsusilə də kənd təsərrüfatına zərərin az dəyməsi üçün addımlar atılır. Sahibkarlığı ziyandan qorumaq üçün bir milyarddan artıq vəsait ayrılıb. Hesab edirəm ki, Azərbaycanın tətbiq etdiyi xüsusi model həm xəstəliyin qarşısını alacaq, həm də postpandemiya dönəmi üçün önəmli təsirə malik olacaq. Yalnız belə üsullarla biz iqtisadiyyatımızı qoruyub saxlaya bilərik”.
Məhəmmədəli QƏRİBLİ
