Azərbaycanda istehsal edilən bir sıra qida məhsullarının tərkibinə kimyəvi maddələr vurulması dəfələrlə gündəmə gətirilib. Son zamanlar gündəlik qida rasionumuzda əsas yer tutan qənd məhsulunun da tərkibində müəyyən kimyəvi maddələr aşkarlandığı barədə məlumatlar yayılır. Qeyd olunur ki, kəllə qəndin ağardılmasında kimyəvi maddələrdən istifadə olunur.
Bildirək ki, Qida Təhlükəsizliyi Agentliyi Baş Prokuror yanında Korrupsiyaya Qarşı Mübarizə Baş İdarəsi ilə birgə ötən ilin sonlarında kəllə qənd istehsalı zamanı qəndin ağardılmasında mənşəyi məlum olmayan kimyəvi maddələrdən istifadə etdiyinə görə bir sıra qənnadı məmulatlarının istehsalı müəssisələrində reydlər keçirib və qanun pozuntularına görə cinayət işi açılıb.
“Azərbaycanda kəllə qənd istehsalı ilə məşğul olan sexlərin əksəriyyətində bu məhsulun hazırlanmasında insan sağlamlığına zərər vuran maddələrdən istifadə edilir”
Azad İstehlakçılar Birliyinin (AİB) sədri Eyyub Hüseynov qeyd etdi ki, bazarda istehlakçılara sağlamlıq üçün zərərli olan saxta kəllə qənd məhsulunun təqdim edildiyi barədə məlumat yayılır: “Bir neçə ay qabaq Azərbaycan Qida Təhlükəsizliyi Agentliyi tərəfindən müəyyən edilmiş, tərkibində zərərli maddələrin yer aldığı məhsulların yenidən satışa çıxarıldığı bildirildi. Bəzi müəssisələrdə kəllə qənd hazırlanan zaman texnoloji proses bilərəkdən pozulur, qəndin ağardılması üçün tekstildə, kağız sənayesində, dəri aşılanmasında istifadə olunan, insan sağlamlığı üçün təhlükə törədən 5-ə qədər kimyəvi maddədən və o cümlədən, natrium dionitdən, tetrodekonol kimi kimyəvi maddələrdən istifadə olunur”.
Birlik sədri istehlakçının saxta məhsulu müəyyən etməsinin qeyri-mümkün olduğunu və kimyəvi üsulla ağardılan qəndlərin həddindən artıq ağ olduğunu qeyd etdi.
Həmsöhbətimiz onu da əlavə etdi ki, Azərbaycanda kəllə qənd istehsalı ilə məşğul olan sexlərin əksəriyyətində bu məhsulun hazırlanmasında insan sağlamlığına zərər vuran maddələrdən istifadə edilir. O qeyd etdi ki, Azərbaycanda bəzi istehsal müəssisələrində kəllə qəndin ağardılması prosesində insan sağlamlığı üçün təhlükəli olan “sodium hidrosulfit” maddəsindən istifadə edilir.
Günel CƏLİLOVA
