Koronavirus pandemiyası ilə mübarizədə Azərbaycan həkimlərinin misilsiz xidmətlər göstərməsi və hazırda da bu istiqamətdə gərgin əməklə çalışması həm Azərbaycan dövlətinin, həm də Azərbaycan ictimaiyyətinin böyük rəğbətini qazanıb.
Virusla mübarizə aparan həkimlərimizin yorulmaz səyləri nəticəsində saysız xəstə sağalaraq evinə, ailəsinə dönüb. Pandemiya ilə mübarizə aparan həkimlərin əməyinə ən böyük qiyməti Prezident İlham Əliyev verib və onları qəhrəman adlandırıb. “Onlar doğrudan da böyük qəhrəmanlıq göstərirlər, öz həyatlarını, sağlamlıqlarını risq altına atırlar, ancaq öz vəzifə borclarını şərəflə yerinə yetirirlər. Mən bütün vətəndaşları həkimlərə dəstək olmağa çağırıram. O cümlədən bu xəstəliyə yoluxmuş insanlara da, – biz, əlbəttə, başa düşürük ki, onların həm fiziki, həm də psixoloji vəziyyəti bu xəstəliyin təsiri altındadır, – müraciət edərək, həkimlərə qarşı diqqətli olmalarını tövsiyə edərdim” - deyən ölkə başçısının həkimlərimizə göstərdiyi hərtərəfli qayğı onlara əlavə güc, stimul verir.
İyunun 17-də peşə bayramlarını qeyd edəcək həkimlərimiz koronavirus pandemiyası başlandığı gündən bu cəbhədə mücadilə verirlər. Azərbaycan Prezidentinin koronavirusla mübarizə aparan həkimlərin, bütövlükdə isə tibb işçilərinin sosial rifahının təmin edilməsi üçün verdiyi sərəncamla onların əməkhaqqı qaldırıldı. Yəni koronavirus xəstələrinə xidmət göstərən həkimlərin maaşı 3, 4, 5 misli məbləğində artırıldı. Prezident bu barədə “Yeni klinika” tibb müəssisəsinın açılışında qeyd edirdi: “Əlbəttə ki, bu mübarizədə əsas yük həkimlərin üzərinə düşür. Mən fürsətdən istifadə edərək Azərbaycan həkimlərinə təşəkkürümü bildirmək istəyirəm. Biz onların maddi təminatının yaxşılaşdırılması üçün əlavə tədbirlər görmüşük. Bildiyiniz kimi, koronavirus xəstələrinə xidmət göstərən həkimlərin maaşı 3, 4, 5 misli məbləğində artırılıb. Bu, dövlət tərəfindən həkimlərə göstərilən diqqətin təzahürüdür. Ancaq mən bilirəm və tam əminəm ki, həkimlərin əsas motivasiyası bu deyil. Əsas odur ki, onlar öz vəzifə borclarını yerinə yetirmək istəyirlər. Onlar Hippokrat andına sadiqliklərini göstərmək istəyirlər. Onlar xalqımıza xas olan ən yüksək xüsusiyyətləri nümayiş etdirirlər və öz həyatlarını risq altına ataraq xəstələrə xidmət göstərirlər”.
Sözsüz ki, həkimlərimiz ilk gündən öz peşələrinə sədaqət və vətənpərvərlik nümayiş etdirərək respublikamızda koronavirusa qarşı cəsarətlə mübarizə aparırlar. Məhz həkimlərimizin əzmkarlığının və yorulmazlığının nəticəsidir ki, bu qlobal infeksiyanın yayılmasının daha təhlükəli hal almasının qarşısı alınıb.
Prezident İlham Əliyev iyunun 9-da üç modul tipli xəstəxananın açılışında iştirak edərkən də həkimlərin yorulmaz fəaliyyətinə toxunub. “Bu gün çox əlamətdar bir gündür. Ölkəmizdə modul tipli üç xəstəxana açılır. Bu xəstəxanalarda koronavirus xəstələri müalicə olunacaq və beləliklə, koronavirusla bağlı mübarizədə növbəti önəmli addım atılır.
Modul tipli birinci xəstəxana bir ay bundan əvvəl, mayın 7-də açılmışdır və hazırda bu xəstəxanaların sayı dördə çatıb. Mən mayın 7-də açılış mərasimində qeyd etdim ki, bu xəstəxanaların sayı 10-a çatmalıdır... Azərbaycan xalqı həkimlərin fədakarlığına çox yüksək qiymət verir. Mən də bir daha bütün həkimlərə minnətdarlığımı bildirmək istəyirəm. Onlar öz həyatlarını risq altına atırlar. Onlar aylarla öz ailə üzvlərini görə bilmirlər və çox ağır şəraitdə xüsusi geyimlərdə gecə-gündüz xəstələrin yanındadırlar, onların həyatını xilas edirlər. Bizdə ölüm səviyyəsinin çox aşağı olması, ilk növbədə, həkimlərin peşəkarlığı, fədakarlığı hesabınadır” - deyə ölkə başçısı qeyd edirdi.
Həkimlərin əməkhaqqına əlavələrin edilməsinin onların sosial rifah halının yüksəlməsində mühüm rol oynadığını deyən mütəxəssislər bildirirlər ki, ölkə başçısının həkimlərə həmişə mənəvi dayaq durması, onların əməkhaqqının artırlması üçün sərəncam imzalaması həkimlərə güc, stimul verir, onları daha əzmlə işləməyə həvəsləndirir. Həkimlərimizin öz vəzifələrini vicdanla, məsuliyyətlə yerinə yetirməsi, sözün əsl mənasında, onların dövlətə, xalqa, başlıcası isə öz nəcib sənətlərinə sədaqətlərinin təzahürüdür.
“Həkimlərimizin ölkə rəhbərliyi, eləcə də ictimaiyyət tərəfindən alqışlanması təqdirəlayiq haldır”
7 saylı poliklinikanın həkim-terapevti Leyla Bayramlı baki-xeber.com-a bildirdi ki, koronavirusla mübarizədə mücadilə verən həmkarlarının əməyinin qiymətləndirilməsi üçün Prezident İlham Əliyevin verdiyi sərəncam və göstərişlərin əhəmiyyəti həm maddi, həm də mənəvi cəhətdən böyükdür. O vurğuladı ki, Azərbaycan Prezidentinin həkimlərimizi qəhrəman, fədakar adlandırması həkimlərə böyük ruh yüksəkliyi bəxş edir. Həkimlərin, orta və kiçik tibb işçilərinin, tibb ocaqlarında işləyən texniki işçilərin əməyinin həm mənəvi, həm də maddi cəhətdən dövlətimiz və xalqımız tərəfindən yüksək qiymətləndirilməsi halları çox müsbətdir. “İyunun 17-də həkimlər peşə bayramlarını qeyd edəcəklər. Bilirsiniz ki, bu gün xeyli sayda həkim və orta tibb işçisi koronavirusla mübarizəyə qoşulub və hazırda bu vacib cəbhədə mücadilə verirlər. Azərbaycan həkimlərinə ən böyük dəyəri cənab Prezident verib. Bu ilin mart ayında Prezident İlham Əliyev yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında sərəncam imzaladı və yeni növ koronavirus (COVID-19) infeksiyası ilə əlaqəli əmək şəraitinə görə dövlət tibb müəssisələrində çalışan işçilərin əməkhaqlarına aylıq vəzifə (tarif) maaşının 3-5 mislinədək miqdarda müddətli əlavə müəyyən edilib və artıq o əlavələri həmkarlarımız alıblar. Prezident İlham Əliyev virusla mübarizə dövründə xəstəxanaların, tibb müəssisələrinin açılışında hər zaman koronavirusla mübarizə sahəsində çalışan həkimlərimizin fədakarlığını qeyd edir. Dövlət başçısının ölkəmizin tibb işçilərinin, həkimlərin əməyinə verdiyi qiymət bu ağır dövrdə koronavirusla mübarizə aparan həkimlərə böyük ruh yüksəkliyi bəxş edir. Koronavirusla mübarizədə fəal iştirak edən, xəstələrin müalicəsini həyata keçirən həkimlərimizin ölkə rəhbərliyi, eləcə də ictimaiyyət tərəfindən alqışlanması təqdirəlayiq haldır. Koronavirusla mübarizədə aktiv iştirak edən və bu xəstəliyin məhv edilməsi yolunda gecəsini gündüzünə qatan həkimlərimizin fəaliyyətinə ən böyük qiymət ölkə başçısının onların fədakar əməyini yüksək dəyərləndirməsidir. Ölkə başçısı fədakar, qəhrəman həkimlərimizin əməyinin misilsiz olduğunu dəfələrlə dilə gətirib və bununla da onlara mənəvi ruh verib, stimul bəxş edib. Həkimin əməyinə dövlətin, xalqın qiymət verməsi çox mühümdür” - deyə müsahibimiz qeyd etdi.
İradə SARIYEVA
