Azərbaycan dövlətinin və xalqının parçalanmaqdan xilas olduğu gün -15 İyun tariximizə Milli Qurtuluş Günü kimi əbədi olaraq yazıldı. Xalqımızın böyük oğlu Heydər Əliyevin 1993-cü il iyunun 15-də Azərbaycanda hakimiyyətə qayıdışı dövlətçilik tariximizin şanlı səhifəsini təşkil edir və həmin gün respublikamızda Milli Qurtuluş Günü kimi qeyd olunur.
15 İyun - Milli Qurtuluş Gününün Azərbaycan tarixi, ədəbiyyatı dərsliklərində, elmi ədəbiyyatda siyasi-strateji əhəmiyyəti yetərli səviyyədə göstərilibmi?
Xanım Qasımova: “Çünki bu ruhda tərbiyə alan şagirdlərimiz özlərində yüksək mənəvi keyfiyyətləri aşılayaraq gələcəkdə dahi siyasi xadimin qoyduğu o yolun layiqli davamçısı olacaqlar”
“Azərbaycan dili” dərsliyinin müəlliflərindən olan tanınmış pedaqoq Xanım Qasımova baki-xeber.com-a bildirdi ki, həm orta məktəbin ibtidai və yuxarı siniflərində tədris edilən müvafiq dərsliklərdə, həm də elmi-metodiki vəsaitlərdə 15 İyun - Milli Qurtuluş Gününün siyasi, tarixi, strateji, ideoloji, mənəvi əhəmiyyətinin yetərli səviyyədə təqdim edilməsi üçün kifayət qədər iş görülüb.
“Qürurverici bir haldır ki, dilimizin təbliğatçısı olan IV və V siniflər üçün “Azərbaycan dili” dərsliklərinin həmmüəlliflərindən biriyəm. Rafiq İsmayılov, Dilrubə Cəfərova və Gülnarə Xudiyeva ilə birlikdə ərsəyə gətirdiyimiz bu dərslikdə şagirdlərə yalnız qrammatik qaydalar öyrədilmir, həm də, eyni zamanda, milli-mənəvi dəyərlər, əsl vətəndaş kimi formalaşmaq, müsbət keyfiyyət məsələlərinin təbliğatına çox böyük yer verilir. Çünki biz, birinci növbədə, vətəndaş yetişdiririk. Bu dərsliyin ilk səhifəsi Ümummilli lider Heydər Əliyevin şəkli ilə açılır. Biz Ümummilli liderin fəaliyyətini yalnız bir mətnə, bir bölməyə sığışdıra bilmərik. Buna görə də bizim verdiyimiz mətnlərdə təbliğ olunan o gözəl insani sifətlər, vətənə, torpağa bağlılıq, Qarabağımızın, ümumiyyətlə, işğal altında olan torpaqlarımızın geri qayıtmasına inamın, insani keyfiyyətlərin aşılanması Heydər Əliyev irsinə ən böyük töhfədir. Çünki bu ruhda tərbiyə alan şagirdlərimiz özlərində yüksək mənəvi keyfiyyətləri aşılayaraq gələcəkdə dahi siyasi xadimin qoyduğu o yolun layiqli davamçısı olacaqlar. Mən buna inanıram. Müəllifi olduğum IV sinif dərsliyində isə “Heydər Əliyevin kəlamları” başlığı altında bir bölmə verilib. Həmin bölmədə Heydər Əliyevin dövlətçiliyimiz, dövlət müstəqilliyimiz, mənəvi dəyərlərimiz haqqında maraqlı fikirləri öz əksini tapıb. Bu barədə şifahi nitqdə tapşırıq da verilib”.
X.Qasımova qeyd etdi ki, Azərbaycan dövlətçiliyinin özünü təsdiqləməsində mühüm rol oynayan 15 İyun - Milli Qurtuluş Gününün dərsliklərdə geniş səviyyədə təbliğ edilməsi şagirdlərin milli ruhda, azərbaycançılıq, dövlətçilik məfkurəsi təfəkküründə yetişməsinə mühüm töhfələr verir.
İlhamə Qəsəbova: “Milli Qurtuluş Gününün siyasi, tarixi, milli-ideoloji, dövlətçilik əhəmiyyəti, strateji dəyəri həm orta, həm də ali məktəb dərsliklərində, eləcə də elmi-metodiki vəsaitlərdə yer alıb”
Bu gün Milli Qurtuluş Gününün mahiyyətinin yetərincə şagird və tələbəyə, bütövlükdə, gəncliyə çatdırıldığını, bu istiqamətdə nəşrlərin, kitabların, elmi-metodiki vəsaitlərin yaradıldığını deyən filologiya üzrə fəlsəfə doktoru İlhamə Qəsəbova da hesab edir ki, bunlar xalqımızın, dövlətçiliyimizin müsbət mənada taleyini həll edən Qurtuluş Günü haqda müfəssəl bilgilər verir.
“Xalqın təkidi ilə Heydər Əliyev hakimiyyətə qayıdıb xalqını, dövlətini, dövlətçiliyini böyük bir təhlükədən, daha dəqiq desəm, məhv olmaqdan xilas etdi və onu ayağa qaldırdı. Heydər Əliyev öz xilaskarlıq missiyası ilə ölkəmizin müstəqilliyini qorudu, respublikada tüğyan edən ictimai-siyasi böhranı aradan qaldırdı və inkişafın təməlini qoydu. “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” deyirdi Heydər Əliyev. 15 İyun həm də bizim üçün vətəndaş həmrəyliyinin, son dərəcə vacib olan sabitliyin təməlinin qoyulduğu gündür. Əlbəttə, 15 İyun - Milli Qurtuluş Gününün siyasi, tarixi, milli-ideoloji, dövlətçilik əhəmiyyəti, strateji dəyəri həm orta, həm də ali məktəb dərsliklərində, eləcə də elmi-metodiki vəsaitlərdə yer alıb, bu mövzuda saysız kitab nəşr edilib. Amma yenə də bu mövzuda elmi, bədii, publisistik əsərlər yazılacaq, kitablar çap olunacaq. Çünki bu, tükənməyən mövzudur” - deyə İ.Qəsəbova qeyd etdi.
İradə SARIYEVA
