“Çimərlik taxtaları arasında 2 metr, çətirlər arasında isə 4 metr məsafə nəzərdə tutulub. Vətəndaşlar arasında sosial məsafənin qorunması üçün ərazidə iplər çəkilib. Qaradağ, Səbail, Binəqədi, Xəzər rayonlarında ötən il yaradılmış 6 ictimai çimərlik dəniz mövsümünə tam hazırdır”. Bu barədə Bakı Şəhər İcra Hakimiyyətindən məlumat verilib. Qeyd edilib ki, artıq çimərlik ərazilərində qaydalar barədə məlumatlandırma lövhələri vurulub.
Məlumat üçün bildirək ki, iyunun 15-dən ölkədə çimərlik mövsümünə start veriləcək. Çimərlik mövsümü açıldığı gündən etibarən həmin ərazidə tibb məntəqələri də fəaliyyət göstərəcək.
Qeyd edildiyi kimi, artıq çimərlik mövsümünün açılmasına sayılı günlər qalıb. Maraqlıdır, istirahət üçün dənizə gedənlər koronavirusdan qorunmaq üçün sosial məsafəyə əməl edəcəklərmi? Ümumiyyətlə, çimərliklərdə əhalinin sosial məsafə saxlamasına necə nəzarət olunacaq? Onu da bildirək ki, dəniz suyunda koronavirusun yayılıb-yayılmaması ilə bağlı fərqli fikirlər var.
Türkiyə Səhiyyə Nazirliyinin koronavirusla bağlı qərargahının nümayəndəsi, uzman həkim Səma Turan bildirib ki, pandemiya zamanı hovuza yox, dənizə üstünlük vermək lazımdır: “Dənizdə duz miqdarı yüksək olduğundan, virusun canlı qala bilmə ehtimalı aşağı düşür. İstirahət məkanlarında hovuza girməzdən öncə duş almaq məsləhətdir. Hovuzda da viruslar yaşamır, ancaq yenə də dəniz daha az təhlükəlidir. Virusların otaq temperaturundakı suda canlı qaldığını bilirik, amma dənizdəki duz miqdarı bu ehtimalı azaldır. Əvvəlki həyatımızdan fərqli yaşamaq məcburiyyətində olduğumuzu bilirik. Bu səbəbdən şəxsi gigiyenaya əməl edilməli, istifadə olunan dəsmallar 1 dəfədən sonra yuyulmalıdır”.
Eyyub Hüseynov: “Çimərliklərdə karantin qaydaları mütləq şəkildə tətbiq edilməlidir”
Azad İstehlakçılar Birliyinin sədri Eyyub Hüseynov bildirdi ki, çimərliklərdən istifadə edən vətəndaşlar intizamsızlıq edirlər. İnsanlar xəbərdarlıqlar edilməsinə baxmayaraq, çirkli çimərliklərə getməyə davam edirlər: “Pandemiyaya görə bu il çimərliklərdə qiymətlərin bahalaşacağını gözləyirəm. Çimərliklərdə karantin qaydaları mütləq şəkildə tətbiq edilməlidir”.
Nuran Abdullayev: “Dənizdə və dəniz sahilində insanlar arasında sosial məsafəyə mütləq əməl olunmalıdır”
Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru Nuran Abdullayev bildirdi ki, COVID-19 virusu hava-damcı yolu ilə keçir və insanların çoxu da düşünür ki, nə zamansa bu damcılar dəniz suyunda toplanır: “Buna görə də dəniz suyundan da yoluxma ola bilər. Amma bu virusun bəzi başqa bakteriya və viruslar kimi suda çoxalma qabiliyyəti olmadığına görə artıq elm adamlarının çox qisminin yuxarıdakı suala cavabı xeyrdir. Amma bura əlavə də etmək lazımdır ki, bu günə qədər bu haqda - COVID-19 və birbaşa dəniz suyu ilə bağlı aparılan heç bir elmi tədqiqat yoxdur. Sadəcə, virus haqqında bu günə qədər məlum olan bəzi elmi məlumatlar əsasında deyilə bilər ki, dəniz suyundan birbaşa yoluxma mümkün deyil.
Hətta bəzi elm adamlarının iddiasına görə, COVID-19 viruslu xəstə dəniz suyuna asqırıb və ya öskürərsə, virus dəniz suyundan yenidən yoluxdurucu damcı və ya aerozol şəklinə düşüb insanı yoluxdura bilməz, çünki yoluxduruculuq qabiliyyəti kifayət qədər olmur. Onların iddiasına görə, hətta dəniz suyu gözə və ya selikli qişaya düşərsə belə, artıq o vaxta qədər virusun yoluxduruculuq qabiliyyəti təsəvvür edilən deyil”.
Həmsöhbətimiz onu da əlavə etdi ki, dənizdə və dəniz sahilində insanlar arasında sosial məsafəyə mütləq əməl olunmalıdır.
Günel CƏLİLOVA
