Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib. “14-16 iyun tarixlərində xüsusi karantin rejimində yalnız Nazirlər Kabineti yanında Operativ Qərargahın icazə verdiyi dövlət və özəl qurumların əməkdaşları icaze.gov.az saytı vasitəsilə icazə ala biləcəklər”. “Trend”in məlumatına görə, bunu brifinqdə Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib.
Ü.Mehdiyev bildirib ki, hazırda olan məlumata görə, 210 minə yaxın işçi üçün artıq icazə alınıb: "Fəaliyyətinə icazə verilən qurumlar maksimum az işçilərinə icazə almalıdırlar. İcazə alınan şəxslər həmin işə uyğun olmasa, onların adı icazə sistemindən çıxarılacaq və həmin şəxslərə cərimələr tətbiq ediləcək. Ona görə də icazə alan qurumlar diqqətli olmalıdırlar”.
İcazə sisteminin qeyri-formal məşğulluğun aradan qaldırılmasında böyük rolu...
Ü.Mehdiyev qeyd edib ki, koronavirus pandemiyası ilə əlaqədar olaraq tətbiq edilən xüsusi karantin rejimində 70 minə yaxın yeni əmək müqaviləsinin imzalanmasının şahidi olduq. Ü.Mehdiyev bildirib ki, icazələr sistemi aprel ayının 3-dən tətbiq edilməyə başladı: “Həmin dövrdə 70 minə yaxın yeni əmək müqaviləsinin bağlanmasının şahidi olduq. Yəni təşkilatlar icazə almaq üçün icazə sistemində işçinin mütləq əmək və ya xidməti müqaviləsinin olmasını göstərməli idi. Bu cür məhdudiyyətlər onları məcbur edib ki, indiyə qədər qeyri-rəsmi işlətdiyi işçiləri rəsmiləşdirsinlər.
Bu mənada icazə sistemi qeyri-formal məşğulluğun xeyli dərəcədə aradan qaldırılmasına səbəb oldu".
Fəaliyyətinə icazə verilən şəxslərə xəbərdarlıq...
Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyev isə deyib ki, sərt karantin rejimi ilə əlaqədar ötən həftə ilə müqayisədə bu həftə daha çox şəxsə icazə verilib. Onun sözlərinə görə, fəaliyyətinə icazə verilən şəxslərin avtomobilləri də qeydiyyatdan keçməlidir: "Həmin şəxslər öz avtomobilində ailə üzvlərini və ya digər şəxsi daşıya bilməz. O halda icazə verilə bilər ki, həmin sərnişinin də fəaliyyətinə icazə verilsin. İcazəsi olan şəxsə isə avtomobillə yalnız işə gedib-gəlməyə icazə verilir. Vətəndaşlardan xahiş olunur ki, sərt karantin qaydalarına riayət etsinlər".
Xüsusi karantin rejimi tətbiq olunan rayonlardan keçərkən avtomobili saxlamaq qadağandır
K.Əliyev deyib ki, fəaliyyətinə icazə verilən şəxslər sərt karantin elan olunan ərazilərdən öz maşınları ilə keçə biləcəklər. Onun sözlərinə görə, lakin fəaliyyətinə icazə verilməyən şəxslər gizli yollarla da keçməyə cəhd edərsə, məsuliyyətə cəlb olunacaqlar: "Sərt karantin rejimi tətbiq olunan rayonların kəndlərinə də giriş qadağandır. İsmayıllı rayonundan keçən magistral yollarda hərəkət olacaq. Başqa rayona gedən şəxslər bu yollardan keçə bilərlər. Lakin həmin ərazidə avtomobili saxlamaq qadağandır. Onsuz da həmin rayonların ərazisində heç bir obyekt işləməyəcək".
Sərt karantin elan olunan ərazilərdə hərəkətə nəzarət DİN-ə həvalə olundu
Sərt karantin elan olunan ərazilərdə hərəkətə nəzarətin Daxili İşlər Nazirliyinə həvalə olunduğunu deyən K.Əliyevin sözlərinə görə, iyunun 14-dən 16-dək sərt karantin elan olunan ərazilərdə mobil postlar da olacaq: "Yalnız fəaliyyətinə icazə verilən şəxslərin hərəkətinə icazə veriləcək. Digərlərindən xahiş edirik ki, karantin günlərində evlərini tərk etməsinlər. Vətəndaşlar yalnız təcili yardım xidmətinə ehtiyacı olanda və yaxın qohumlarının dəfn mərasiminə getmək üçün Daxili İşlər Nazirliyinin 102 xidmətinə məlumat verəndən sonra icazə əsasında evlərini tərk edə biləcəklər".
Qanuni tələblərə məhəl qoymayanlar polis bölməsinə aparıla bilər
K.Əliyev bildirib ki, sərt karantin qaydalarını pozan şəxslər inzibati məsuliyyətə cəlb olunurlar. Onun sözlərinə görə, polisin qanuni tələblərinə məhəl qoymayan şəxslər polis bölməsinə aparıla bilər: "Əgər şəxs başqa adama virus yoluxdurarsa və bu, təsdiqlənərsə, həmin şəxs cinayət məsuliyyətinə cəlb edilir. Karantin qaydalarını pozan şəxs əgər polisə müqavimət göstərirsə, qanunun tələblərinə uyğun olaraq, həmin şəxs yaxınlıqdakı polis bölməsinə aparılır. Həmin bölmədə qanunvericiliyin tələblərinə uyğun məsuliyyət növü tətbiq edilir".
Yalnız blokun yaxınlığındakı qablara zibil atmaq üçün evdən çıxmaq olar
K.Əliyev qeyd edib ki, insanlar yalnız yaşadığı blokun yaxınlığındakı qablara zibil atmaq üçün evdən çıxa bilərlər. Onun sözlərinə görə, əgər məişət tullantıları qabı uzaqdadırsa, oraya getməyə icazə verilmir: "Həmin şəxs 200-300 metrlik məsafədə zibil atmaq üçün yaşayış yerini tərk edə bilməz. Bu üsuldan sui-istifadə edənlər məsuliyyətə cəlb ediləcəklər. Yəni zibil atmaq adı ilə yaşayış yerindən uzaqdakı əraziyə getmək qadağandır. 2 gün çox müddət deyil. Həmin zibilləri evdə qapalı qabda da saxlamaq olar".
Bəzi hallarda vətəndaş icazəli olduğunu deyir, amma...
K.Əliyev bildirib ki, bəzi hallarda vətəndaş icazəli olduğunu deyir, amma portalda adı çıxmır. Onun sözlərinə görə, ötən karantin günlərində həmin şəxslər inzibati məsuliyyətə cəlb ediliblər: "Polis həmin şəxsin yanında məlumatları portala daxil edib və ad çıxmadığı üçün inzibati xəta üzrə ona protokol yazıb. Polis heç bir halda qanunsuzluq etməyib. Ola bilər ki, vətəndaş evdən çıxandan 1 saat sonra adı portalda qeydiyyata alınıb. Bu ondan irəli gəlir ki, işəgötürən şəxs icazə portalına işçinin adını gec qeyd edir, amma işçini işə tez çağırır. Əgər bu prosesdə polisin günahından protokol səhvən yazılarsa, vətəndaş həmin faktı bizə təqdim etsin, biz o protokolu ləğv etməyə hazırıq".
Rayonlara getmək istəyənlər postlardan geri qaytarılacaq
Sərtləşdirilmiş karantin rejimindən əvvəl Bakı və Abşeron yarımadasında qeydiyyatda olan bəzi şəxslərin rayonlara getmək istədiklərini deyən K.Əliyevin sözlərinə görə, Bakı, Abşeron və ya Sumqayıt qeydiyyatı olan şəxslər karantin postlarından rayonlara buraxılmayacaqlar: "Karantin postları həmin şəxsləri geri qaytaracaq. Ona görə də heç kim digər rayonlara getməyə cəhd etməsin".
Yol polisinin karantin rejiminin pozulması ilə bağlı yazdığı cərimələr...
K.Əliyev bildirib ki, yol polisi mayın 13-dək karantin rejiminin pozulması ilə bağlı inzibati xəta barədə qərar verməyib. Onun sözlərinə görə, yol polisi tərəfindən həmin vaxta qədər protokollar üzrə də qərarlar çıxarılmayıb: "Bu qərarlar digər polis orqanlarının rəhbərləri və polis sahə müvəkkilləri tərəfindən çıxarılıb. Mayın 13-dən sonra bu səlahiyyət yol polisinə verildi və bu qərarlar yol polisi tərəfindən çıxarılmağa başlandı".
Koronavirusa yoluxduğunu gizlədən kifayət qədər insan var
Tibbi Ərazi Bölmələrini İdarəetmə Birliyinin (TƏBİB) infeksion xəstəliklər üzrə işçi qrupunun rəhbəri, infeksionist Vasif Əliyev isə COVID-19-a yoluxaraq evdə özünü müalicə etdirən və bu xəstəliyini gizlədən kifayət qədər insanın olduğunu deyib. Onun sözlərinə görə, belə halları gizlətmək vəziyyətin daha da pisləşməsinə səbəb olur.
Əhaliyə xəstəliklə bağlı halları gizlətməməyi tövsiyə edən V.Əliyev əlavə edib ki, pandemiya dövründə ölkədə ikinci dəfə sərt karantin rejimi tətbiq olunacaq: “Həftəiçi günlərdə də insanlar lazımi təlimatlara əməl etməlidirlər. Əsas məqsəd odur ki, həftə sonlarında, ikigünlük də olsa, insanların təmasları azalsın”.
TƏBİB təsdiqlədi - Teymur Mustafayev koronavirusdan dünyasını dəyişib
V.Əliyev qeyd edib ki, Xalq artisti Teymur Mustafayev koronavirusdan dünyasını dəyişib. Onun sözlərinə görə, onun hər iki ağciyərinə ciddi sətəlcəm diaqnozu qoyulmuşdu. Xalq artisti ilə təmasda olan insanlara tövsiyə edilir ki, müraciət etsinlər. Xəstə yaxınlarının bunun əksini iddia etməsi ola bilər: "Biz koronavirusdan ölən şəxsin yaxınlarına dəfnlə bağlı məsləhətlərimizi bildirmişik, dəfn bu qaydalarla həyata keçirilməlidir".
Xəstə sayının artması xəstəxanaların dolmasına və ölüm faktının çoxalmasına səbəb ola bilər
Bir çox insanın ailə üzvlərindən koronavirus olmasını gizlətdiyini deyən V.Əliyevin sözlərinə görə, xəstə sayı artdıqca, xəstəxanalarda yer tapmaqda çətinliklər ola bilər. Bu zaman xəstə olan şəxslər evdə müalicə olunacaqlar: "Xəstə sayının artması xəstəxanaların dolmasına və ölüm sayının artmasına səbəb ola bilər. Ona görə də vətəndaşlarımız bu xəstəliyə ciddi yanaşmalı, lazımi qaydalara əməl etməlidirlər".
Binaların qarşısında zibil atmaq üçün xüsusi konteynerlər olacaq
Bakı Şəhər İcra Hakimiyyəti başçısı Aparatının rəhbəri Elgin Həbibullayev isə bildirib ki, paytaxtda binaların qarşısında zibil atmaq üçün xüsusi konteynerlər yerləşdiriləcək. Onun sözlərinə görə, artıq bu konteynerlərin quraşdırılması prosesinə başlanıb. Bu konteynerlər yalnız yaxınlığında zibil qabı olmayan binaların ətrafında qoyulacaq. Bununla əlaqədar artıq 1000 konteyner ayrılıb və bunlar yalnız iki gün üçün nəzərdə tutulub”.
E.Həbibullayev əlavə edib ki, bundan öncəki sərt karantin rejimi dövründə insanlar çörəyi aşırı dərəcədə alıblar və sonrakı günlərdə onları zibil qabına atıblar: “Atılmış çörəkləri görəndə belə təəssürat yaranmışdı ki, insanlar sanki çörəyi ikigünlük deyil, 1 həftəlik alıblar”.
E.Həbibullayev qeyd edib ki, Bakı şəhər İcra Hakimiyyətinin dezinfeksiya etdiyi ərazilər hər dəfə artırılır. Onun sözlərinə görə, bu işlərə 2 minə yaxın insan ayrılır: “İcra Hakimiyyəti nəzdində 11 min 415 bina mövcuddur və bu yaşayış yerlərinin blok, məhlələri və liftləri dezinfeksiya olunur. Bundan əlavə, həftə sonları genişmiqyaslı dezinfeksiya işləri aparılır ki, bu barədə mediada da məlumat verilir. Həmin ərazilər hər həftə artmaqda davam edir”.
Çimərliklərdə çətirlər arasında 4 metr məsafə...
Çimərliklərdə çətirlər arasında 4 metr məsafə olacağını deyən E.Həbibullayevin sözlərinə görə, Bakıda 6 ictimai çimərlik artıq istifadəyə hazırdır: “Çimərliklərdə sakinlərin istirahəti üçün lazımi şərait yaradılıb. Vətəndaşlar çimərliklərdə qoyulmuş qaydalara ciddi yanaşmalı, məsuliyyətli olaraq sosial məsafə saxlamalıdırlar. Çətirlər arasında azı 4 metr məsafə olmalıdır və bununla bağlı sahibkarlarla müvafiq söhbətlər aparılıb”.
Bəzi təşkilatların işə başlama vaxtı dəyişə bilər
E.Həbibullayev bildirib ki, sərt karantin günlərində bəzi təşkilatların işə başlama vaxtı dəyişə bilər. Onun sözlərinə görə, bu dəyişiklik günün pik saatlarında işə gəlmə zamanı ictimai nəqliyyatda sıxlığın aradan qaldırılması üçün nəzərdə tutulur: "Bu məsələ hazırda Operativ Qərargahda müzakirə olunmaqdadır. Ona görə də ola bilsin ki, müxtəlif təşkilatlar fərqli saatlarda işə başlasınlar”.
Qeyd edək ki, sərt karantin rejimi Bakı, Gəncə, Lənkəran və Sumqayıt şəhərləri, Abşeron, Yevlax, İsmayıllı, Kürdəmir və Salyan rayonlarında tətbiq ediləcək.
