Azərbaycanda son günlər koronavirusa yoluxmuş şəxslərin sayının artması ilə yanaşı, bu virusun varlığına inanmayanların da sırası genişlənir. Lakin elə virusun yayılma sürəti bu sıranın genişlənməsi ilə düz mütənasibdir, o artdıqca, bu da artır. Koronavirusa inanmayanlar, adətən, belə bir ifadə işlədirlər ki, niyə tanınmış şəxslər koronavirusa yoluxmurlar?
Onlar qeyd edirlər ki, belə bir xəstəlik varsa, məşhurlar da bu virusa yoluxardı. Ancaq həmin insanlar unudurlar ki, koronavirus elə bir xəstəlikdir ki, yaşından, cinsindən, milliyyətindən, vəzifəsindən, şəxsin hansı peşə sahibi olmasından asılı olmayaraq, təhlükəsizlik qaydalarına riayət etməyən hər kəsə yoluxur.
Koronavirusa yoluxanlar arasında məşhurlar da var. Həmin məşhurların siyahısını təqdim edirik:
Kanadanın Baş naziri Castin Trüdonun həyat yoldaşı Sofi Qrequar Trüdo.
Məşhur aktyor Tom Henks və həyat yoldaşı Rita Vilson.
İran Prezidenti Həsən Ruhaninin müavini İshak Cihangir.
Fransanın Mədəniyyət naziri Frank Riester.
İran Prezidentinin köməkçisi Məsumə Ebtekar.
“Yuventus”un oyunçusu Daniele Rugani.
Braziliya Prezidenti Jair Bolsonaru.
“Çelsi”nin ulduzu Hadson-Odoi.
Koronavirusa yoluxanlar arasında Azərbaycanın da məşhur şəxsləri var. Şair Şəhriyar del Gerani koronavirusa yoluxub. Xatırladaq ki, şair hələ ötən həftə 5 gün ərzində hərarəti yüksək olduğu üçün xəstəxanaya müraciət etmişdi. Xəstəxanada koronovirusla bağlı testdən keçən Şəhriyar del Geraninin test nəticəsi pozitiv çıxıb.
Bir müddət əvvəl isə Əməkdar artist, İrəvan Dövlət Azərbaycan Dram Teatrının baş rejissoru Sərvər Əliyev koronavirusa yoluxmuşdu. Baş rejissor virusa qalib gələrək sağalıb.
Təəssüf ki, koronavirusa yoluxub, ona qalib gəlməyən məşhurlar da var. İyunun 11-də Xalq artisti, xanəndə Teymur Mustafayev vəfat edib. Onun koronavirusa yoluxduğu açıqlanmışdı.
Qeyd etdiyimiz kimi, koronavirusa inanmayanlar “xəstəlik tutan tanışınız varmı?”, “Niyə koronavirusa yoluxan məşhurlar ölmürlər?” ifadəsini tez-tez işlədirlər. Hər kəsin tanıdığı xanəndə Teymur Mustafayevin məhz koronavirusdan vəfat etməsi qeyd etdiyimiz virusun varlığına tutarlı arqument ola bilərmi?
“…hətta bu xəstəlikdən vəfat etdiklərini biləndən sonra məlum fikirlərindən daşınar”
“Vəfa” Sosial-İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, koronavirusun zərərlərinin aradan qaldırılması üçün hökumət bütün tədbirləri ən yüksək səviyyədə görüb: “Artıq virusa yoluxmamaq vətəndaşlardan, ictimaiyyətdən asılıdır. Hesab edirəm ki, ictimai qınaq da çox fərqlidir. Müsbət fikirlər var, xəstəlikdən özünü qoruyan və ətrafdakılara tövsiyə verənlər var. Amma çox təəssüf ki, virusa inanmayanlar da var. Bəziləri koronavirusa bu xəstəliyin olmadığı fikri ilə yanaşır, adi qriplə müqayisə edirlər. Düşünürəm ki, bütün dünya dövlətləri öz resurslarını, gücünü, vaxtını buna sərf etdiyi halda, virusa inanmamaq ən azı gülüncdür”.
Həmsöhbətimiz onu da əlavə etdi ki, koronavirusun varlığına inanmayanlar mütləq psixoloqa müraciət etməlidirlər. İnanmayan o insanları yaxşı olar ki, psixiatr, psixoloq əlavə olaraq yoxlasın. Çünki mümkünsüzdür. İnsanlar başa düşməlidirlər ki, hər bir şəxsin sağlamlığı, yaşaması təhdid altındadır. Ona görə də qəbul edilən qaydalara hamı çox ciddi riayət etməlidir".
F.Hacıbəylinin sözlərinə görə, koronavirusu qəbul etməyən insanlar qorxu, stress keçirən insanlardır. Hər şey insanın ruh halı, qorxuları ilə bağlı bir şeydir. İnsanlar ehtiyat etdiyi durumlardan qaçmağa çalışırlar. O insanların ruh halında problemlər var. Çünki faktiki vəziyyətə inanmayan insanın psixoloji problemi mövcuddur: “Biz heç vaxt karantin rejimində yaşamamışıq, indi rahat həyatımızdan ayrı düşmüşük. Ona görə insanlar təlaşlanır və gerçəklikdən qaçır. Bu, kütlənin yaşadığı psixoloji sarsıntıdır. Əslində isə onlar reallığı qəbul etsələr, sağlamlıqları üçün daha faydalı olar. Hazırda koronavirusun varlığına inanmayan insanlar çox azdır. Ölkə başçısı koronavirus barədə məlumat verdikdən sonra insanlar infeksiya reallığını qəbul etdi”.
Birlik sədri onu da əlavə etdi ki, koronavirusun varlığına inanmayanlar məşhur şəxslərin adıçəkilən virusa yoluxduqlarınu, hətta bu xəstəlikdən vəfat etdiklərini biləndən sonra məlum fikirlərindən daşınar. Onların inamsızlığı və sosial məsafəyə riayət etməməsi nəticəsində bu gün virusa yoluxanların sayı durmadan artır.
Günel CƏLİLOVA
