Azərbaycanda həyata keçirilən uğurlu sosial siyasət nəticəsində əhalinin rifahı əhəmiyyətli dərəcədə yaxşılaşıb. Məlumdur ki, son üç ayda ölkədə karantin rejimi tətbiq edilib. Bu müddət ərzində əhalinin sosial-iqtisadi vəziyyətinin yaxşılaşması məqsədilə dövlət tərəfindən əhaliyə yardım edilib.
Pandemiya dövründə əhalinin sosial vəziyyətinin yaxşılaşması istiqamətində görülən işlər beynəlxalq təşkilatlar, ekspertlər tərəfindən müsbət qarşılanır. Xarici ekspertlər də qeyd edirlər ki, pandemiya davam edəcəyi təqdirdə belə, vətəndaşların sosial vəziyyəti pisləşməyəcək.
“…özəl sektorda da yeni iş yerlərinin yaradılması prioritetdir”
Millət vəkili Vüqar Bayramov bildirdi ki, dövlət sosial təcrid tədbirlərinin tətbiq edildiyi müddətdə - aprel və may aylarında həm işləməyən vətəndaşlarımız, həm də muzdlu işçilər və sahibkarlar üçün dəstək nümayiş etdirdi. Muzdlu işçilər üçün büdcədən 210 milyon manat vəsait, sahibkarlar üçün isə 80 milyon manat maliyyələşmə həyata keçirildi. İşləməyən vətəndaşlarımıza iki ay ərzində 190 manat birdəfəlik yardım həyata keçirildi ki, bu da 600 min vətəndaşımızı əhatə etdi: “Bu müddətdə biz həm də dövlət tərəfindən maliyyələşən sosial proqramlara ayrılan vəsaitlərin həcmində də artımlar müşahidə etdik. Həm ünvanlı sosial yardım, həm özünüməşğulluq proqramına ayrılan vəsaitlərin həcmində artımlar oldu. Ölkə başçısının göstərişi ilə ödənişli ictimai iş yerlərinin sayı 2020-ci ildə 50 min artırılaraq 40 mindən 90 minə çatdırıldı. Məqsəd də ondan ibarət idi ki, işləməyən vətəndaşlarımızın işlə təmin olunmasına dövlət tərəfindən dəstək verilsin. Yəni aprel-may aylarında sahibkarların, aztəminatlı ailələrin dəstəklənməsi prioritet idi və prioritet olaraq da qalır. O da məlumdur ki, pandemiyanın yeni mərhələsində sahibkarlar üçün vergi güzəştlərinin edilməsi təsdiq olundu. Güzəştli kredit portfelinin həcmində artımlar təsdiqləndi. Söhbət 500 milyon manatlıq güzəştli kredit portfelinin təsdiq olunmasından gedir. Bunun da 60%-nə dövlət tərəfindən zəmanət həyata keçirilir. Eyni zamanda, bir milyon manata yaxın kredit portfelində dövlət tərəfindən 10%-lik subsidiya tətbiq olunacaq ki, bu da həmin kreditlər üzrə faizlərin azaldılması anlamına gəlir”.
Millət vəkili xüsusi olaraq vurğuladı ki, pandemiya davam edəcəyi təqdirdə belə, vətəndaşların sosial vəziyyətinin pisləşməsi gözlənilmir. Çünki dövlət tərəfindən fərqli dəstək mexanimzləri mövcuddur və bu dəstək davam etdirilir. İşləməyən vətəndaşlarımız üçün də həm dövlət büdcəsi hesabına yeni iş yerlərinin yaradılması, eyni zamanda, sahibkarların daha çox dəstəklənməsi nəticəsində özəl sektorda da yeni iş yerlərinin yaradılması prioritetdir.
Günel CƏLİLOVA
