Sosial şəbəkələrin xarakterik xüsusiyyətləri və müsbət məqamları ilə yanaşı, təhlükəli meylləri də var. Belə ki, sosial şəbəkələr bəzən cəmiyyətin rifahına deyil, zərərli informasiyaların yayılmasına, insanların şəxsi həyatlarına mənfi təsir etməyə, müdaxiləyə, hətta hakimiyyət orqanlarına qarşı böhtanlar yağdırmağa meyl göstərirlər. Şübhəsiz, bütün bunlar siyasi motivli olmaqla yanaşı, fikir plüralizminə ziddir. Bu mənada bəzən sosial şəbəkələr heç də informasiya cəmiyyətinin ali məqsədlərinə xidmət etmir.
Aydın məsələdir ki, istənilən azad cəmiyyətdə gedən siyasi mübarizədə düşərgələr arasında qarşılıqlı ittihamlar normal bir şeydir. Bu, demokratik inkişaf yolunu tutan dövlətlərə xas olan bir xüsusiyyətdir. Təbii ki, hər şey etik çərçivədə olmalıdır. Yəni qarşılıqlı ittihamlar etik çərçivədən kənara çıxmamalıdır. Ancaq bir çox halda, xüsusən də son vaxtlar radikal müxalifətə yaxın çevrələrdən və yaxud da ola bilər ki, bu düşərgə ilə heç bağlılığı olmayan insanlardan hakimiyyətin, ayrı-ayrı məmurların ünvanına heç bir etik ölçü, çərçivə tanımayan çıxışlar baş alıb gedir. Ağılagəlməz qeyri-etik ifadələr işlədilir. Şəxsi həyatdan tutmuş, digər məsələlərə müdaxilə edilir. Hansı ki, belə halların baş verməsi yolverilməzdir. Təəssüflər olsun ki, belə şeylər var və bu da xoş təsir bağışlamayan mənzərə yaradır. Bir sözlə, sözügedən tendensiya, ümumilikdə, ciddi mənfi fəsadlar yarada bilər. O üzdən, belə hallar yolverilməzdir və bunun qarşısı alınmalıdır.
“Niyə biz sosial mediada tez-tez hansısa məmurun ailə üzvlərinin təhqir olunmasını eşitməliyik?”
Sözügedən məsələ ilə bağlı fikirlərini “Bakı-Xəbər”lə bölüşən media eksperti Azər Həsrətin sözlərinə görə, belə hallar dözülməz həddə gəlib çatıb: “Vəziyyət o həddə gəlib çatıb ki, sosial medianı açmaq olmur. Konkret olaraq ölkənin ayrı-ayrı şəxslərinə yönəlik qeyri-etik ifadələr səsləndirilir. Xüsusən ayrı-ayrı dövlət qurumlarını idarə edən şəxslər, onların ailə üzvləri, yaxınları barədə tərbiyəsiz, əxlaqdan kənar ifadələr səsləndirilir. Xoş olmayan paylaşımlar edilir. Sosial şəbəkələrin imkanlarından istifadə edərək söyüş söyürlər. Bunu da edənlərin əksəriyyəti xaricdə oturub Azərbaycana qarşı söyüş kampaniyası aparan şəxslərdir. Təəssüflər olsun ki, o adamlar əlçatan olmadığına görə hüquq-mühafizə orqanları müvafiq addımlar ata bilmirlər. Hesab edirəm ki, Xarici İşlər Nazirliyi bu məsələ ilə məşğul olmalıdır. Xarici ölkələrdəki diplomatik səfirliklərimiz söyüşlə məşğul olan şəxsləri həmin ölkənin qanunları çərçivəsində intizama dəvət etməlidirlər. Bununla bağlı müəyyən tədbirlər görülməlidir. Təbii ki, burada söhbət ifadə və siyasi azadlıqların məhdudlaşdırılmasından getmir. Söhbət ondan gedir ki, aparılan mübarizə tərbiyə və əxlaq, qanun çərçivəsində olmalıdır. Niyə biz sosial mediada tez-tez hansısa məmurun ailə üzvlərinin təhqir olunmasını eşitməliyik? Xüsusən də qadınların təhqir olunması ilə müşayiət edilən çıxışlar dinləməliyik, paylaşımlar görməliyik? Bunlar yolverilməzdir. Ən başlıcası bu, Azərbaycan xalqının milli-mənəvi dəyərlərinə zidd yoldur. Bu yolu tutanlar, təbii ki, milli kimliyindən sapmış, öz ruhlarını şeytana satmış, xarici qüvvələrin əlində Azərbaycana qarşı istifadə olunan elementlərdir. Ona görə də hüquq çərçivəsində bunun qarşısı alınmalıdır”.
Vidadi ORDAHALLI
