Hələlik, Azərbaycan Hava Yollarında yerli aviareyslərin bərpa olunması qərara alınıb. “Trend”-in məlumatına görə, bunu Nazirlər Kabineti yanında Operativ Qərargahın keçirdiyi brifinqdə "Azərbaycan Hava Yolları" Qapalı Səhmdar Cəmiyyətinin vitse-prezidenti Eldar Hacıyev deyib.
Onun sözlərinə görə, xaricə uçuşlar barədə, hələ ki, qərar verilməyib:"Biz qaydalarımızı bütün dövlətlərin hava yolları şirkətinə göndərmişik. Hansı şirkətlər bu qaydalara riayət etməklə Azərbaycana uçuş həyata keçirmək istəsə, bu məsələyə Operativ Qərargahda baxılacaq. Bundan sonra məsələ barədə razılıq əldə olunacaq. Beynəlxalq reyslərin bərpası barədə isə Operativ Qərargahın növbəti toplantılarında müzakirə ediləndən sonra qərar veriləcək".
Azərbaycana gələn şəxslər hansı halda karantinə götürülməyə bilər...
E.Hacıyev deyib ki, uçuşlarla bağlı qaydalara görə, Azərbaycan ərazisinə gələn bütün sərnişinlər 48 saat qüvvədə olan test nəticələri ilə ölkəyə daxil olmalıdır. Onun sözlərinə görə, bu bütün sərnişinlərdən tələb olunacaq:"Çarter uçuşlarına da bu qaydalar tətbiq oluna bilər. Əgər testlə bağlı arayış təqdim olunarsa, həmin şəxs karantinə götürülməyə bilər".
Naxçvan-Bakı reysilə uçan şəxsin koronavirus testi ödənişsiz aparılacaq
E.Hacıyev qeyd edib ki, Naxçvan-Bakı reysi üzrə uçuş həyata keçirəcək şəxsin koronavirus testi ödənişsiz aparılacaq. Onun sözlərinə görə, vətəndaş onlayn bilet aldıqdan sonra AZAL və TƏBİB-in birgə hazırladığı elektron bazaya həmin şəxs barədə məlumat yerləşdirəcək: “Vətəndaş elektron sistemdən biləcək ki, nə vaxt və harada koronavirus testindən keçə biləcək. Qeyd edim ki, bu test dövlət tərəfindən ödənişsiz aparılacaq və 48 saat qüvvədə qalacaq".
E.Hacıyev bildirib ki, "Azərbaycan Hava Yolları" tərəfindən biletinin pulunu geri almaq istəyən sərnişinlər qarşısında bütün öhdəliklər həyata keçiriləcək.
E.Hacıyev qeyd edib ki, bu, uçuşlar bərpa edildikdən sonra 60 gün ərzində mümkün olacaq.
O, həmçinin əlavə edib ki, biletinin vaxtını dəyişmək istəyənlərə vauçerlər təqdim ediləcək.
Beynəlxalq uçuşlar dayananda artıq 178 min 691 bilet satılmışdı
“Beynəlxalq uçuşlar dayananda artıq 178 min 691 bilet satılmışdı və onlar istifadə edilməmişdi” – deyən E.Hacıyevin sözlərinə görə, bu biletləri əksər insanlar qaytarmaq istəmir:"Həmin şəxslər gözləyirlər ki, AZAL nə zamansa beynəlxalq uçuşları bərpa edəndən sonra həmin biletlərlə səyahət etsinlər".
Aviabiletlərin qiyməti beynəlxalq uçuşlar bərpa olunandan sonra müəyyən ediləcək
E.Hacıyev qeyd edib ki, aviabiletlərin qiyməti beynəlxalq uçuşlar bərpa olunandan sonra müəyyən ediləcək. Onun sözlərinə görə, biletlərin qiymətindən danışmazdan öncə beynəlxalq uçuşlar başlanmalıdır: "Hazırda yeni qiymətlər barədə müzakirələr aparılmır. Uçuşlar başlayandan sonra bununla bağlı məsələ müzakirə olunacaq. Çünki, uçuş zamanı yerlər məhdud olacaq, sərnişinlərə qoruyucu avadanlıqlar paylanacaq. Bu xərclər isə şirkətin üzərinə düşəcək. Amma AZAL, hələ ki, uçuşların qiymətinin bahalaşdırılması barədə düşünməyib"
Naxçıvana bileti olanlar testdən sonra ev karantininə göndəriləcək
Tibbi Ərazi Bölmələrini İdarəetmə Birliyinin (TƏBİB) şöbə müdiri Yaqut Qarayeva isə bildirib ki, hazırda COVİD-19-la bağlı ucuş qaydaları ölkə daxilində həyata keçirilən ucuşlara aiddir.
Onun sözlərinə görə, ölkə xaricində olan ucuşlarla bağlı qaydalar qarşıdakı günlərdə təsdiqlənəcək.
Y.Qarayeva əlavə edib ki, Naxçıvana bileti olan vətəndaşlar dövlət hesabına testdən keçirildikdən sonra ev karantininə yola salınacaq.
Apteklərə dərmanların pulsuz çatdırılması tövsiyə edilir
Y.Qarayeva bildirib ki, qarşıdakı sərt karantin günlərində aptek sahiblərinə dərmanların pulsuz çatdırılması tövsiyə edilir. Onun sözlərinə görə, bundan sui-istifadə halları olmamalıdır: “Gündəlik istifadə edilən dərmanların tədarükünün əvvəlcədən edilməsi tövsiyə edilir. Amma bəzi təxirəsalınmaz hallarda dərmanlar ünvana çatdırıla bilər”.
Y.Qarayeva bədən hərarəti yüksək olduğu üçün buraxılış imtahanlarında iştirak etməyən şagirdlər üçün yenidən imtahanların təşkilinin TƏBİB-in səlahiyyətində olan məsələ olmadığını da sözlərinə əlavə edib.
Onun sözlərinə görə, bu məsələlər Dövlət İmtahan Mərkəzi və Təhsil Nazirliyi tərəfindən müzakirə edilə bilər.
