Məlum olduğu kimi, son bir neçə həftədə respublika ərazisində karantin rejiminin mərhələli yumşaldılması prosesi baş verdi. Bu prosesdən sui-istifadə hallarına yol verənlər, intizamsız davrananlar da olur. Təəssüf ki, bəzi vətəndaşlar dövlətin vətəndaşlarımızın sağlamlığı, təhlükəsizliyi naminə atdığı addımları düzgün dəyərləndirə bilmirlər. Bu da virusa yoluxanların sayının artması ilə müşayiət olunur.
Bildiyimiz kimi, Nazirlər Kabineti yanında Operativ Qərargah ölkə ərazisində yeni növ koronavirus (COVID-19) xəstəliyi ilə bağlı mövcud sanitar-epidemioloji vəziyyəti təhlil edərək xüsusi karantin rejiminin iyunun 15-dən iyulun 1-i saat 00:00-dək uzadılmasına qərar verib. Karantin müddətinin uzadılmasına səbəb ölkə ərazisində koronavirus infeksiyasının yayılma səviyyəsinin artmasıdır.
Operativ Qərargahın ölkədə karantin qaydalarının sərtləşdirilməsi barədə budəfəki qərarına əsasən, 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərləri və Abşeron rayonu ilə yanaşı, Yevlax, İsmayıllı, Kürdəmir və Salyan rayonlarının ərazisində yalnız fəaliyyətinə icazə verilən şəxslərin gediş-gəlişinə və ya yaxın qohumunun dəfn mərasimində iştirak etmək üçün evdən çıxmağa icazə veriləcək.
Məlum olduğu kimi, budəfəki məhdudiyyət ötən həftənin sonunda tətbiq edilən prosesdən fərqlənir. Qeyd edilənə görə, keçən həftəsonu sərtləşdirilmiş karantin rejimində fəaliyyətinə icazə verilən şəxslərin yalnız fəaliyyət göstərdikləri müəssisələrin xidməti avtomobilləri ilə hərəkətinə icazə verilirdisə, budəfəki qərarda bu məqam nisbətən yumşaldılıb. Yəni həmin şəxslər iş yerlərinə gedib-gəlmək üçün yalnız xidməti deyil, şəxsi avtomobillərindən də istifadə edə bilərlər. Bundan başqa, yaxın qohumunun dəfn mərasiminə qatılmaq istəyən şəxs də həmin mərasimə şəxsi avtomobili ilə gedib-gələ biləcək.
Yeni qərara əsasən, çörək zavodları və bu tip müəssisələrdə çalışanlar iyunun 15-də saat 16:00-dan etibarən istehsal üçün iş yerlərinə gedə biləcəklər.
Nazirlər Kabinetinin Mətbuat xidmətinin rəhbəri İbrahim Məmmədov “Trend”ə açıqlamasında bildirib ki, çörək istehsal edən müəssisə işçilərinin bir gün əvvəldən işə çıxmasına icazə verilməsi növbəti iş gününə mağazalarda çörək satışının təmin olunması ilə bağlıdır: "Ötən həftə sərt karantin günlərində ölkədə çörək təminatı ilə bağlı problem olmayıb. Lakin Operativ Qərargah qərara alıb ki, iyunun 16-da mağazaları çörəklə təmin etmək üçün iyunun 15-də saat 16:00-da çörək sexi işçiləri işə gələ bilər".
Operativ Qərargahın budəfəki qərarında daha bir fərqlilik ev heyvanlarının gəzdirilməsinə icazə ilə bağlıdır. Qərara görə, ev heyvanları saxlayan şəxslər həmin heyvanları sərt karantin günlərində küçəyə çıxarmaqda sərbəstdirlər. Lakin bu prosesdə vətəndaşlar sui-istifadə hallarına yol verməməlidirlər.
“Gərək bu dəfə yasa gedənlər, ev heyvanlarını gəzdirmək üçün bayıra çıxaranlar, yaxud iş icazəsi olanlar...”
“Vəfa” Sosial-İctimai Birliyinin sədri Fatimə Hacıbəyli bizimlə söhbətində bildirdi ki, önümüzdəki 15 günlük karantin qaydaları kifayət qədər yeniliklərlə diqqəti çəkir. “Son həftələr ölkəmizdə karantin rejiminin yumşaldılması ilə bağlı verilən qərarlardan sonra bəzi vətəndaşlar sanki daha “pandemiya bitib” təfəkkürü ilə davrandılar. Əlbəttə, bu da vətəndaşın özünə böyük ziyan vurdu. Bildiyimiz kimi, karantin rejimi yumşaldıldıqdan sonra virusa yoluxanların statistikasında artım baş verdi, vətəndaş məsuliyyətsizliyi nəticəsində yoluxma halları artmağa başladı. Keçən həftənin sonunda ikigünlük sərt karantin rejiminə keçilməsi birbaşa bu artımın qarşısını almağa yönəlmişdi. Vətəndaşların 95 faizi dövlətin qərarına böyük anlayışla yanaşsalar da, bəzi məsuliyyətsiz şəxslər müxtəlif bəhanələrlə evdən bayıra çıxdılar. Sözsüz ki, bu da yaxşı nəticə vermədi, virusun daha çox insanı tapmasına şərait yaratdı. Operativ Qərargah tərəfindən verilən yeni qərar da sırf vətəndaşların sağlamlığının qorunması, virus təhlükəsindən uzaqlaşdırılması ilə bağlıdır.
Ötən həftə respublikanın 4 şəhərində və 1 rayonunda insanların yaşayış yerini, evini tərk etməməsi göstərilirdisə, mağazalar, apteklər, digər müəssisələr bağlanmışdısa, bu dəfə bir qədər yanaşma fərqlidir. İndi bu qaydalar Yevlax, Kürdəmir, Salyan və İsmayıllı rayonlarında da tətbiq ediləcək. Yeni qərara görə, iyunun 15-də çörək zavodları işləyəcək, eləcə də ev heyvanları saxlayan adamların heyvanlarını bayırda gəzdirməsinə icazə veriləcək, bəzi işləyən müəssisələr isə işçilərinin işə gəlməsini təmin etmək üçün müvafiq qurumdan elektron qaydada icazə alacaqlar. Bilirsiniz ki, ev heyvanları saxlayan adamlar o heyvanları müəyyən müddətdə havaya çıxarmalı, gəzdirməlidirlər. Keçən həftə bu mümkün olmamışdı, amma bu dəfə mümkün olacaq. Karantin rejimi ilə bağlı tətbiq edilən yeni qaydalar vətəndaşların sağlamlığı, təhlükəsizliyi, virusa yoluxmaması üçündür. Dövlət gərəyi olan bütün tədbirləri görür və vətəndaş da bu qaydalara uyğun davranmalıdır.
Bir məsələni də deyim ki, yeni qaydaya əsasən, yaxın qohumunun dəfn mərasiminə qatılmaq istəyən şəxs də həmin mərasimə şəxsi avtomobili ilə gedib-gələ biləcək, amma bu, gərək sui-istifadə halı yaratmasın. Yəni vətəndaş ona yaradılan şəraitdən başqa məqsədlə istifadə etməsin, əylənmək, gəzmək üçün küçələrə çıxmasın. Bilirsiniz ki, SMS icazə sistemi mövcud olanda bir çox vətəndaş “yasa gedirəm” adı altında başqa məqsədlər üçün evlərini tərk etmişdi. Amma gərək bu dəfə yasa gedənlər, ev heyvanlarını gəzdirmək üçün bayıra çıxaranlar, yaxud iş icazəsi olanlar dövlətin yaratdığı şəraitdən, göstərdiyi humanizmdən doğru şəkildə istifadə etsinlər. Bu qərarların uğurlu icrası biz vətəndaşlardan asılıdır və məsuliyyətli vətəndaşlar onsuz da qaydalara əməl edəcəklər, indiyə qədər məsuliyyətsiz davrananlar da nəhayət ki, məsuliyyətlərini dərk etməlidirlər. Vətəndaş nə qədər məsuliyyətli olarsa, respublika ərazisində virusa yoluxma halları da azalar. Virusa yoluxanların sayının azalmasında vətəndaşların bütün qaydalara əməl etməsi böyük rol oynaya bilər” - deyə F.Hacıbəyli qeyd etdi.
İradə SARIYEVA
