Məlum olduğu kimi, Azərbaycanda yeni nov koronavirus (COVID-19) xəstəliyi ilə bağlı mövcud sanitar-epidemioloji vəziyyət təhlil edilib və son günlərdə virusa yoluxma sayı, xəstəliyin yayılma dinamikası nəzərə alınaraq, ölkə üzrə xüsusi karantin rejiminin 1 iyul 2020-ci il saat 00:00-dək uzadılmasına qərar verilib.
Nazirlər Kabineti yanında Operativ Qərargahdan verilən məlumata görə, ölkədə virusa ilk yoluxma faktının qeydə alındığı tarixdən bu günədək COVID-19 testi müsbət çıxmış 8191 nəfər aşkarlanıb, hazırda isə 3487 aktiv xəstə müalicəsini xüsusi karantin rejimli xəstəxanalarda davam etdirir. Ölkə üzrə sanitar-epidemioloji vəziyyətin təhlilinə əsasən, son günlər Yevlax, İsmayıllı, Kürdəmir və Salyan rayonlarında yüksək yoluxma faktları aşkar edilib. Bu baxımdan COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə 2020-ci il 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində sərtləşdirilmiş karantin rejimi tətbiq ediləcək.
Ümumilikdə, nəzərə alsaq ki, rəsmi məlumata görə, yoluxanların və virusdan ölənlərin sayında artım var, o baxımdan sözügedən addım doğru idi. Mövcud vəziyyət belə karantin müddətinin uzadılmasını zərurətə çevirdi. Maraqlıdır, bəs ekspertlər ölkə üzrə xüsusi karantin rejiminin 1 iyuladək uzadılması qərarına necə yanaşırlar?
“Son günlər mövcud karantin rejimi qaydalarının əhali tərəfindən kütləvi surətdə pozulması halları var”
Məsələyə münasibət bildirən ekspert Rəsul Cahangirlinin fikrincə, karantin rejimi müddətinin uzadılması doğru qərardır: “Məsələ ondadır ki, hələlik bunun alternativi yoxdur. Çünki dünyanın heç bir ölkəsində infeksiyanın birmənalı müalicə metodu tapılmayıb. Baxmayaraq ki, bu istiqamətdə ciddi araşdırmalar aparılır. Hələlik yeganə çıxış yolu insanın özünü qorumasıdır. Bu da gigiyenik qaydalara əməl etməkdən keçir. İlk dövrlərdə bir sıra dünya dövlətləri infeksiyanın mövcudluğuna ciddi yanaşmadı. Bunun nəticəsi çox ağır oldu. Koronavirus bir sıra ölkələrdə kəskin formada yayılmaqdadır. Bu səbəbdən həmin ölkələrdə pandemiyanın qurbanı olan on minlərlə insan var. Ancaq Azərbaycanda pandemiyanın ilkin mərhələsindən vətəndaşların sağlamlığının qorunması istiqamətində kompleks addımlar atıldı. Son günlər mövcud karantin rejimi qaydalarının əhali tərəfindən kütləvi surətdə pozulması halları var. Bu da ölkənin bir sıra bölgələrində sanitar-epidemioloji vəziyyətə ciddi təsir göstərib. Bir ay bundan qabaq yoluxmaların artımı ikirəqəmli olduğu halda, artıq artım üçrəqəmli saylara yüksəlib. Ona görə də xüsusi karantin rejiminin 1 iyuladək uzadılması düzgün qərardır. Hesab edirəm ki, tətbiq edilən xüsusi karantin rejiminə riayət etmək lazımdır. Hamı qaydalara əməl etməlidir”.
Vidadi ORDAHALLI
