İyunun 9-da Prezident İlham Əliyevin iştirakı ilə üç modul tipli xəstəxananın açılışı baş tutub. Açılış zamanı Prezident bir sıra məqamlara toxunub. O cümlədən, koronavirusdan qorunmaq üçün əhalinin qoruyucu vasitələrdən istifadə etməsinin vacib olması haqqında da fikir bildirib.
Prezident qeyd edib ki, cəmi bu üç amil, - bunu həkimlər, müxtəlif ictimai xadimlər bəlkə də min dəfə deyiblər, - gərək nəzərə alınsın: “Tibbi maska, bir yarım-iki metr məsafə və dezinfeksiya vasitələri. Bu amillər insanları həkimlərin yekdil rəyinə görə, 95 faiz qoruyur. Ona görə vətəndaşlardan artıq dərəcədə xahiş edirəm ki, bu çox sadə qaydalara əməl etsinlər və bilsinlər ki, koronavirus yoxa çıxmayıb".
Koronavirusdan qorunmaq üçün əhalinin mütləq şəkildə tibbi maska taxması, sosial məsafəyə riayət etməsi, eyni zamanda, dezinfeksiya vasitələrindən istifadə etməsi dəfələrlə Prezident İlham Əliyev və həkimlər tərəfindən səsləndirilib.
Bizi izləyən virusdan necə qorunmaq olar? Bu sualın cavabı təkcə Azərbaycanda yox, bütün dünyada eynidir: tibbi maskadan istifadə və sosial məsafə.
Beynəlxalq araşdırmalar "tibbi maskadan istifadə edin, sosial məsafəyə riayət edin” çağırışlarının həyatımız üçün əhəmiyyətini anlamağa imkan verir.
Məşhur "Lancet” tibb jurnalının yeni araşdırmasında koronavirusdan qorunmağın üç yolunun olduğu bildirilir.
Sosial məsafə: Araşdırma nəticəsində müəyyən olunub ki, virusun 1 metr məsafədən ötürülmə risqi 12,8 faiz, 1 metrdən uzaq məsafədən ötürülməsi risqi isə 2,6 faizdir. Ən təsirli məsafə 2 metr və daha çoxdur.
Tibbi maska: Üz maskası və ya respirator olmadan (N95 maskası) ötürülmə risqi 17,4 faizdir. Maskadan istifadə isə bu risqi 3,1 faizə qədər endirir.
Göz nahiyəsinin qorunması: Gözlə ötürülmə risqinin 5,5 faiz olduğu deyilir. Bunun üçün əsasən eynəkdən istifadə tövsiyə olunur.
Lakin tibbi maskadan istifadə və sosial məsafənin saxlanması iki ən vacib amil olaraq qiymətləndirilir.
“…adi gigiyenik tələblərə və sosial izolyasiya qaydalarına riayət etməklə ona yoluxmamaq və qorunmaq mümkündür”
Həkim-ekspert Rasif Bağırov bildirdi ki, hər bir şəxs sosial məsuliyyətdən irəli gələrək özünü, yaxınlarını və digər cəmiyyət üzvlərini qorumaq üçün mövcud sanitar-gigiyenik qayda və tələblərə ciddi riayət etməli, başqalarını da bu fəaliyyətə dəvət etməlidir: “Bu bir həqiqətdir ki, koronavirusun yoluxma sürətinin insanlar arasında yüksək olmasına baxmayaraq, adi gigiyenik tələblərə və sosial izolyasiya qaydalarına riayət etməklə ona yoluxmamaq və qorunmaq mümkündür. Xüsusilə də maskadan istifadə, əllərin mütəmadi yuyulması, dezinfeksiya edilməsi və sosial məsafənin qorunması çox vacibdir. Prezident İlham Əliyev düz buyurur ki, sosial məsafəni saxlamaq, tibbi maska və dezinfeksiya vasitələrindən istifadə etmək koronavirusun yayılmasının qarşısını alır. Ancaq təəssüf ki, bu gün bəzi şəxslər hələ də koronavirus adlı xəstəliyə inanmırlar. Bu səbəbdən də onlar təhlükəsizlik tədbirlərinə əməl etmirlər. Avtobusda insanlar tibbi maska taxmırlar. Çayxanalarda insanlar az qala bir-birinə yapışmış halda otururlar. Onlar dezinfeksiya vasitələrindən istifadə etmirlər. Bunu da hökumət hər bir vətəndaş üçün edə bilməz. Vətəndaş məsuliyyətli olmalıdır. Biz dünyada nəyin baş verdiyini ciddi şəkildə başa düşməliyik. Bu gün dünyada ölkələr gözümüzün qarşısında çökürlər. Axı nə qədər məsuliyyətsiz hərəkətlər davam edə bilər? Kim dövlətin onurğa sütununu təşkil edən ordu, polis, təhlükəsizlik, hüquq-mühafizə orqanlarına qarşı qanunazidd hərəkət edirsə, qanun qarşısında cavab verməlidir”.
Günel CƏLİLOVA
