Azərbaycan Respublikası ərazisində yeni nov koronavirus (COVID-19) xəstəliyi ilə bağlı mövcud sanitar-epidemioloji vəziyyət təhlil edilib və son günlərdə virusa yoluxma sayı, xəstəliyin yayılma dinamikası nəzərə alınaraq, ölkə üzrə xüsusi karantin rejiminin 1 iyul 2020-ci il saat 00:00-dək uzadılmasına qərar verilib.
Nazirlər Kabineti yanında Operativ Qərargahdan baki-xeber.com-a bildirilib ki, Azərbaycanda virusa ilk yoluxma faktının qeydə alındığı tarixdən bu günədək COVID-19 testi musbət çıxmış 8191 nəfər aşkarlanıb, hazırda isə 3487 aktiv xəstə müalicəsini xüsusi karantin rejimli xəstəxanalarda davam etdirir.
Ölkə üzrə sanitar-epidemioloji vəziyyətin təhlilinə əsasən, son günlər Yevlax, İsmayıllı, Kürdəmir və Salyan rayonlarında yüksək yoluxma faktları aşkar edilib. Bu baxımdan, COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə 2020-ci il 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində sərtləşdirilmiş karantin rejimi tətbiq ediləcək.
Bununla əlaqədar olaraq Azərbaycan Respublikası Nazirlər Kabineti yanında Operativ Qərargah aşağıdakıları qərara alır:
• 2020-ci il 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində bütün iş, xidmət və ticarət sahələri üzrə fəaliyyət, eyni zamanda, ictimai nəqliyyatın və avtomobillərin hərəkəti dayandırılır (xüsusi təyinatlı, qəza-bərpa, təcili tibbi yardım avtomobillərinin və fəaliyyətinə icazə verilən orqanların (qurumların) və təşkilatların xidməti, həmçinin, onların əməkdaşlarına məxsus şəxsi avtomobillərin, eyni zamanda, yaxın qohumlarının dəfnində iştirakla əlaqədar vətəndaşların şəxsi avtomobillərinin hərəkəti istisna olmaqla);
• 2020-ci il 14 iyun saat 00:00-dan 16 iyun 06:00-dək Bakı, Gəncə, Lənkəran və Sumqayıt şəhərlərində, Abşeron, Yevlax, İsmayıllı, Kürdəmir və Salyan rayonlarında əhalinin yaşayış yerlərini və ya olduğu yerləri tərk etməsi qadağan edilir;
• sakinlər qeyd olunan müddətdə Bakı, Gəncə, Lənkəran və Sumqayıt şəhərlərində, Abşeron, Yevlax, İsmayıllı, Kürdəmir və Salyan rayonlarında yaşayış yerlərini və ya olduğu yerləri həyat və sağlamlığa bilavasitə təhlükəli vəziyyət yarandığı halda, eləcə də təxirəsalınmaz tibbi yardıma ehtiyac olduqda yalnız təcili tibbi yardım xidməti vasitəsilə, habelə yaxın qohumların dəfnində iştirak etmək üçün Azərbaycan Respublikasının Daxili İşlər Nazirliyinin Növbətçi Hissələri İdarəetmə Xidmətinin 102 Xidməti - Zəng Mərkəzi vasitəsilə icazə almaqla tərk edə bilər.
2020-ci il 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərlərində, Abşeron, Yevlax, İsmayıllı, Kürdəmir və Salyan rayonlarında yalnız aşağıdakı qurum və xidmətlərin fəaliyyətinə icazə verilir:
• siyahısı Azərbaycan Respublikasının Nazirlər Kabineti tərəfindən müəyyənləşdirilən dövlət orqanlarının (qurumlarının) və digər təşkilatların fəaliyyəti;
• hüquq-mühafizə və hərbi xidmət nəzərdə tutulmuş orqanların fəaliyyəti;
• xəstəxanalar, təcili tibbi yardım müəssisələrinin fəaliyyəti;
• sosial xidmət müəssisələrinin fəaliyyəti, o cümlədən, əqli və hissiyat pozuntusu olan, habelə xüsusi qayğıya ehtiyacı olan şəxslər üçün baxıcılıq xidməti;
• kommunal xidmətlər (su təchizatı və kanalizasiya, qaz təchizatı, istilik təchizatı, enerji paylanması, məişət tullantılarının yığılması və utilizasiyası);
• elektrik enerjisinin istehsalı və təchizatı;
• meliorasiya və su təsərrüfatı;
• rabitə xidmətləri;
• teleradio yayımçılarının (televiziya və radio kanalları, kabel televiziyaları) fəaliyyəti;
• dəmir yolu, avtomobil, dəniz, hava nəqliyyatı ilə yük daşımaları;
• boru kəmərləri ilə nəqliyyatın təmin edilməsi fəaliyyəti;
• fasiləsiz istehsalat fəaliyyəti (istehsalat-texniki şərtlərə görə fəaliyyətinin dayandırılması mümkün olmayan müəssisələr);
• neft və qazın hasilatı, emalı, saxlanması və satışı;
• çörək məhsullarının istehsalı (2020-ci il 15 iyun saat 16:00-dan etibarən);
• fəaliyyəti dayandırılmış iş və xidmət sahələrinin mühafizə və texniki təhlükəsizliyinin təmin edilməsi üzrə xidmətlər.
Müəyyən olunmuş tarixlər üzrə fəaliyyətinə icazə verilən iş və xidmət sahələrində işləyən şəxslər, onların xidməti və şəxsi avtomobillərinin hərəkətinə işəgötürən tərəfindən məlumatlar elektron imzadan istifadə edilməklə “icaze.e-gov.az” portalına daxil edildikdən sonra yol veriləcək. Fəaliyyətinə icazə verilən qurumlar, eyni zamanda, dövlət əhəmiyyətli, həyat təminatlı müəssisələrin və qurumların, həmçinin, fasiləsiz işləyən qurumların fəaliyyətləri zəruri hesab edilən işçilərini məhdud sayda cəlb etməklə tənzimlənəcək.
Xüsusi karantin rejiminin tələblərinin pozulmasına görə fiziki, hüquqi və vəzifəli şəxslər Azərbaycan Respublikasının qanunvericiliyi ilə nəzərdə tutulmuş qaydada inzibati və cinayət məsuliyyəti daşıyırlar.
COVID-19 virusu ilə mübarizədə, insanların sağlamlığı və təhlükəsizliyinin qorunması istiqamətində dövlət tərəfindən həyata keçirilən tədbirlərdə həmrəylik nümayiş etdirdiklərinə görə vətəndaşlarımıza bir daha təşəkkür edir, özünüzün və yaxınlarınızın səhhəti naminə Azərbaycan Respublikası Nazirlər Kabineti yanında Operativ Qərargahın tələb və qaydalarına əməl etməyə çağırırıq.
Mövcud sanitar-epidemioloji vəziyyətə uyğun olaraq, digər günlərdə 65 yaşdan yuxarı insanların ciddi zərurət olmadan yaşayış yerlərindən və ya olduğu yerlərdən çıxmamaları tövsiyə olunur. Eyni zamanda, kütləvi yoluxma hallarının qarşısının alınması məqsədilə xüsusi karantin rejimi müddətində respublika üzrə ictimai yerlərdə, bulvarlarda və parklarda, ictimai iaşə obyektlərində bir yerdə insanların 10 nəfərdən artıq qruplarda cəmləşməsi qadağanına, qoruyucu vasitələrdən istifadə edilməsi qaydalarına ciddi əməl olunması tələb edilir.
Bu gün, həmçinin, Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib. Brifinqdə Nazirlər Kabinetinin Mətbuat xidmətinin rəhbəri İbrahim Məmmədov və Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı jurnalistləri maraqlandıran suallara cavab verib.
Daxili uçuşlar iyunun 15-dən bərpa olunur
İ.Məmmədov deyib ki, daxili uçuşlar iyunun 15-dən bərpa olunacaq. Onun sözlərinə görə, ilk olaraq Naxçıvana uçuş olacaq: "Uçuş zamanı qaydalara nəzarət olunacaq. Xaricdən Azərbaycana çarter uçuşlar da davam edir. Dağıstandan bu gün 130 nəfər gətirilərək karantinə alınıb. İyunun 10-da isə Nyu-Yorkdan 210 nəfər Bakıya gətiriləcək. Xaricdə olan vətəndaşlarımızın gətirilməsi prosesi mərhələli şəkildə davam edəcək".
Sərhədlərin bağlı qalma müddəti uzadıldı
Nazirlər Kabinetinin Mətbuat xidmətinin rəhbəri qeyd edib ki, dövlət sərhədindən giriş-çıxış qadağası 1 iyula qədər uzadılır: "İnfeksiyanın yayılması hallarının artması buna şərait yaradır. Yük daşımaları və çarter reysləri istisna olunur".
Ramin Bayramlı isə bildirib ki, ötən həftə sərt karantin günlərindən əvvəl çörək satışı ilə bağlı müəyyən problemlərin olduğunu gördük. Onun sözlərinə görə, insanlar bir qədər təşvişə düşmüşdü: "Ümid edirik ki, bir daha belə hallarla rastlaşmayacağıq”.
Şənbə günlərində 65 yaşdan yuxarı vətəndaşlar evdən çıxmasınlar
R.Bayramlı bu həftənin cümə günündə dövlət müəssisələrində qısa iş günü olmayacağını deyib. Onun sözlərinə görə, bəzi müəssisələrdə iş şənbə günləri də adi qaydada olacaq: “Tövsiyə edirik ki, şənbə günlərində 65 yaşdan yuxarı vətəndaşlarımız evdən çıxmasınlar. Ötən dəfə dializ xəstələri ilə bağlı müəyyən problem yaranmışdı. Amma bu həftə tibb müəssisələrində şənbə günlərində adi rejim olduğundan, dializ xəstələri də həmin gün dializ oluna biləcəklər”.
TƏBİB sədri qeyd edib ki, Azərbaycanda görülən tədbirlər nəticəsində koronavirusa yoluxan xəstələr arasında letallıqla nəticələnən hallar az baş verir. Onun sözlərinə görə, hazırda xüsusi rejimli xəstəxanalarda 3487 aktiv koronavirus xəstəsi müalicə edilir. Onların 136 nəfəri reanimasiya şöbəsindədir.
R.Bayramlı qeyd edib ki, test müayinəsi nəticəsində COVID-19 virusu aşkarlanmayan, amma klinikası COVID-19-a xas olan əlamətlərin müşahidə edildiyi xəstələr də var: “Onlar arasında vəziyyəti ciddi olanlar da var. Belə şəxslər COVID-19-un protokoluna uyğun olaraq müalicə edilirlər”.
Yoluxma halları artmaqda davam edir…
“Koronavirusa yoluxma hallarının sayında kumilyativ artım davam etməkdədir, yoluxanların sayı narahatedicidir” deyən R.Bayramlının sözlərinə görə, yeni yoluxanlarla sağalanlar arasında fərq heç də arzuolunan səviyyədə deyil: “Eyni zamanda, ağır vəziyyətdə olan xəstələrin də sayı artıb. 18-24 may tarixlərində 848 yeni yoluxan olmuşdu. Ondan sonrakı həftə ərzində 1372 yeni yoluxma olub. Həmin müddətdə yoluxanların sayı sağalanların sayından çox olub”.
R.Bayramlı qeyd edib ki, son həftələr ərzində koronavirus testi təkrar pozitiv çıxan xəstələrin sayı çoxalır. Buna görə də sağalan xəstələrin sayı azalır: “Güman edirik ki, virus insandan insana nə qədər çox yoluxursa, o qədər mutasiya edir. Buna görə də müalicəyə tabe olmayan halların sayında artım baş verə bilər”.
Əgər vətəndaşlar həmrəylik nümayiş etdirməsələr…
TƏBİB sədri bildirib ki, Bakı şəhərində koronavirusa yoluxma göstəricisi 43-46 faizədək müşahidə edilirdisə, bu faiz artıq 50 faizə yaxınlaşır. Onun sözlərinə görə, infeksiyanın yayılmasını nəzarət altında saxlamasaq, çox sürətlə say artımını görəcəyik: “Biz inkişaf etmiş ölkələrdə də bu vəziyyəti gördük. Səhiyyəsi nə qədər inkişaf etsə belə, xəstəliyin yayılması kontrol altında saxlanmasa, tibb müəssisələri onun öhdəsindən gələ bilməz”.
R.Bayramlı qeyd edib ki, tibb müəssisələri virusu vaxtında aşkarlamağa, vətəndaşlar isə mövcud qaydalara əməl etməyə borcludurlar: “Əgər vətəndaşlar həmrəylik nümayiş etdirməsələr, çox ciddi fəsadlar yarana bilər”.
Yas məclisləri kütləvi yoluxmalara səbəb olur
TƏBİB sədri bildirib ki, çox təəssüf ki, yas yerlərində kütləvi toplaşma və maskalardan istifadə etməmə halları kifayət qədərdir. Onun sözlərinə görə, yas məclislərində iştirak insanlar arasında kütləvi yoluxmalara səbəb olur: “Çox xahiş edərdik ki, insanlar mövcud qaydalara əməl etsinlər”.
Gənc yaş qruplarında koronavirusa yoluxma faizi artır
R.Bayramlı qeyd edib ki, gənc yaş qruplarında koronavirusa yoluxma faizi və xəstəliyi ağır keçirənlərin sayı artır. Onun sözlərinə görə, əvvəl yanaşı gedən xəstəlikləri olanlar bu xəstəliyi ağır keçirirdi: “Amma çox təəssüf ki, indi artıq gənclər də bu xəstəliyi ağır keçirirlər. Onların arasında həkim həmkarlarımız da var”.
Asimptomatik xəstələrin evdə müalicəsinə qərar verilə bilər
TƏBİB sədri qeyd edib ki, asimptomatik xəstələrin evdə müalicəsi ilə bağlı qərar qəbul edilə bilər. Onun sözlərinə görə, indiyədək bütün xəstələr xəstəxanalarda müalicə ediliblər: “Asimptomatik xəstələrin evdə müalicəsi ilə bağlı məlumatlar veriləcək. Bizi narahat edən odur ki, belə xəstələr evdə müşahidədən kənara çıxa və infeksiyanı başqalarına yoluxdura bilərlər. Buna görə də onlara xüsusi iltizamnamə imzaladılacaq”.
Dövlət qurumlarında koronavirusa yoluxma halları...
“Təəssüflər olsun ki, dövlət qurumlarında da koronavirusa yoluxma halları var” deyən R.Bayramlının sözlərinə görə, Əmək və Əhalinin Sosial Müdafiəsi Nazirliyində 7, Prezident Administrasiyasında 19, Fövqəladə Hallar Nazirliyində 5 nəfərin bu virusa yoluxduğu müəyyən edilib.
R.Bayramlı bildirib ki, Azərbaycanda koronavirusun mövcudluğuna inanmayanların sayı çoxluq təşkil etmir. Onun sözlərinə görə, ölkədə virusa inanmayanlar da var: “Bu istiqamətdə maarifləndirici tədbirlər görülməlidir ki, insanlar ona inansınlar. İnanmamaqla özümüzü və yaxınlarımızı risq qarşısında qoya bilərik”.
Xaricdən vətəndaşlar mərhələlərlə ölkəyə gətirlir
İ.Məmmədov isə bildirib ki, hazırda vətəndaşların ölkəyə gətirilməsi ilə bağlı qrafik hazırlanır. Onun sözlərinə görə, hazırda qrafik tamamlanandan sonra ilk öncə MDB və Yaxın Şərq ölkələrində olan vətəndaşlarımız ölkəyə gətiriləcək: "3-cü mərhələdə isə Avropa ölkələrindəki vətəndaşlarımız gətiriləcək. Gətirilən vətəndaşlar karantinə alınacaq"
Rayonlara gediş-gəlişin bərpası gündəmdə deyil
İ.Məmmədov rayonlara gediş-gəlişin bərpasının gündəmdə olmadığını deyir. Onun sözlərinə görə, bu məsələyə hələ indiki mərhələdə baxılmır: "Ayın 15-dən etibarən Naxçıvandan reyslərə icazə veriləcək. Hələlik bu reyslər həftədə 2 dəfə həyata keçiriləcək. Növbəti mərhələdə isə reyslərin sayı artırıla bilər".
Onlayn medianın sərt karantin günlərində işləməsinə icazə verilmir
İ.Məmmədov onlayn medianın sərt karantin günlərində işləməsinə icazə verilmədiyini deyib. Onun sözlərinə görə, həmin günlərdə yalnız məhdud sayda televiziya və radio işçilərinin fəaliyyətinə icazə verilir: "Onlayn medianın evdən işləməsi mümkündür. Ona görə də həmin şəxslər evdən işləyə və həftənin 1-ci günündən fəaliyyətlərini bərpa edə bilərlər".
Sərt karantin günlərində kimlər şəxsi avtomobillərdən istifadə edə bilər...
Nazirlər Kabinetinin Mətbuat xidmətinin rəhbəri bildirib ki, bu həftə tətbiq ediləcək sərt karantin rejimində fəaliyyətinə icazə verilən şəxslərin işə gedib-gəlmək üçün şəxsi avtomobillərindən istifadəsinə icazə veriləcək.
Onun sözlərinə görə, həmin şəxslər iş yerlərinə gedib-gələ bilərlər: "Həmçinin, yaxın qohumunun dəfn mərasimində iştirak etmək istəyən şəxslər də şəxsi avtomobillərdən istifadə edə bilərlər. Digər şəxslərin isə hərəkəti qadağandır".
Qeyd edək ki, hazırkı dövrədək ölkəmizdə 7876 nəfərin koronavirus infeksiyasına yoluxması faktı müəyyən edilib, onlardan 4377 nəfər müalicə olunaraq sağalıb, 93 nəfər vəfat edib, 3406 nəfərin xüsusi rejimli xəstəxanalarda müalicəsi davam etdirilir.
