Azərbaycan dövləti koronavirusla mübarizə tədbirləri çərçivəsində vətəndaşların sağlamlığı, təhlükəsizliyi istiqamətində saysız tədbir həyata keçirir. Görülən bütün tədbirlərin bir əsas məqsədi var - vətəndaşlarımızın pandemiyaya yoluxmasının qarşısını almaq, onların sağlamlığını təmin etmək.
Məlum olduğu kimi, ötən həftənin şənbə və bazar günlərində respublikamızın 4 şəhərində və bir rayonunda - Bakı, Sumqayıt, Gəncə, Lənkəran və Abşeronda ikigünlük sərt karantin rejimi elan edildi və vətəndaşlara yaşayış yerlərini tərk etməsilə bağlı qadağa qoyuldu. Əlbəttə, bütün bunlar yoluxmanın qarşısının alınmasına xidmət edən amillərdir. Amma çox təəssüflər olsun ki, ikigünlük sərt karantin rejimi zamanı vətəndaş məsuliyyətsizliyi ilə bağlı kifayət qədər fakt üzə çıxdı. Polislərin həyətləri, məhəllələri tez-tez yoxlamasına, insanlara nəzarət etməsinə baxmayaraq, bəzi vətəndaşlar polisin tələblərinə əhəmiyyət verməyərək, öz neqativ əməllərini ortaya qoydular. Çox təəssüf ki, bu günlərdə küçələrə çıxanlar da, qrup şəklində futbol oynayanlar da, yaşayış binasının damında kabab bişirib domino oynayanlar da, zibil atmaq bəhanəsi ilə çöldə görünənlər də, hətta öz vəzifəsini məsuliyyətlə yerinə yetirən polisə müqavimət göstərənlər də oldu. Hər bir vətəndaş evdə qalmalı olduğu halda, bəziləri məsuliyyətsizlik edərək, nəinki özləri bayıra çıxdılar, hətta körpə uşaqlarını da çölə çıxarmaqdan çəkinmədilər. Sanki dövlətin qəbul etdiyi ikigünlük sərt karantin rejiminin bunlara heç bir aidiyyəti yox idi.
Ekspertlər qeyd edirlər ki, Nazirlər Kabineti yanında Operativ Qərargah tərəfindən həftə sonlarında sərt karantin rejiminin reallaşdırılması birbaşa yoluxmanın qarşısının alınmasına yönəlsə də, vətəndaşlar yenə də bunu dərk etmək istəmədilər.
Həftəsonu sərtləşdirilmiş karantin rejimini pozan vətəndaşların sayəsində virusun artım sürətinin irəliləyəcəyini qeyd edən ekspertlər hesab edirlər ki, əhali nə etdiyinin fərqində olmaq istəmir. İkigünlük karantin rejiminin yoluxmaların qarşısının alınması məqsədilə elan edildiyini deyən ekspertlər hesab edirlər ki, Azərbaycandan sonra koronavirusla mübarizəyə qoşulan ölkələrin bəzilərində artıq pandemiya başa çatmaqdadır. Azərbaycanda isə bütün qabaqlayıcı tədbirlər görülməsinə baxmayaraq, vətəndaş məsuliyyətsizliyi səbəbindən hələ də biz virusdan yaxa qurtara bilmirik.
“...dövlətin qabaqlayıcı tədbirlərinə vətəndaşlar birmənalı şəkildə əməl etməlidirlər”
Sosial sahə üzrə tanınmış mütəxəssis İlqar Hüseynli “Bakı-Xəbər”ə bildirdi ki, bütün dünya ölkələrində olduğu kimi, karantin qaydalarının sərtləşdirilməsi ilə əlaqədar Azərbaycanda da müəyyən inzibati xətalara yol açan xoşagəlməz situasiyalar var. “Bunlar baş verir. Prosesi tam olaraq diqqətlə dərk etməyən vətəndaşlarımız var. Amma konkret baş verən olaylarla bağlı onu deyə bilərəm ki, hansısa bir vətəndaş inzibati xətaya yol verən hərəkət edirsə, qanunun müvafiq maddəsini pozursa, ona bu başa salınmalıdır ki, açıq şəkidə qanunsuzluqlar baş verməsin. Təbii ki, vətəndaşların karantin qaydalarına əməl etməsi vacibdir. Biz Azərbaycanda tendensiyanı müşahidə ediriksə və ölkəmizdə yoluxmanın həcmi artır, yoluxma miqyası böyüyürsə, dövlətin qabaqlayıcı tədbirlərinə vətəndaşlar birmənalı şəkildə əməl etməlidirlər. Vətəndaşlar bundan sonra daha diqqətli olmalı və dövlətin karantin rejiminə, “evdə qal” çağırışlarına riayət etməlidirlər. Müəyyən vətəndaşlar bu qaydalara tabe olmurlarsa, onda İnzibati Xətalar Məcəlləsinə uyğun olaraq, onlara cərimə sanksiyası tətbiq edilməlidir”.
İ.Hüseynli qeyd etdi ki, vətəndaşlar karantin rejiminə əməl etməsələr, bu, yoluxma prosesini sürətləndirə bilər: “Sözsüz ki, bu, yoluxma prosesinin sürətlənməsinə səbəb ola bilər. Dövlət də qabaqlayıcı tədbirlər planını davam etdirməlidir. Xüsusən ictimai nəqliyyatda bu problem dərindir və burada məsuliyyət yalnız vətəndaşın üzərində deyil, həm də ictimai nəqliyyatda xidməti təşkil edən sürücülərin də, müvafiq qurumların da üzərindədir. Hesab edirəm ki, onlar da avtobusda, metroda ciddi karantin rejimi ilə bağlı nəzarət mexanizmlərini gücləndirməlidirlər”.
İradə SARIYEVA
