Ruslan Atakişiyev: “Bu mərkəzdə 320 xidmət göstərilməsi yalnız Ağcabədi əhalisinin deyil, həm də yaxın rayonların əhalisinin bütün xidmətlərlə təmin olunmasına şərait yaradıb”
“Bu gün növbəti “ASAN Həyat” Mərkəzinin açılışını edirik. Bu münasibətlə sizi təbrik edirəm. Mənim göstərişimlə Ağcabədi rayonunda müasir, gözəl “ASAN Həyat” Mərkəzi yaradılıb və bu gün istifadəyə verilir. Mərkəzlə tanışlıq çox xoş təəssürat bağışlayır. Həm xarici görünüşü, həm də daxili dizaynı, tərtibatı çox gözəldir. Ən önəmlisi odur ki, burada vətəndaşlara 320 xidmət göstəriləcək. Bu bölgədə yaşayan səkkiz yüz min insan bu imkanlardan istifadə edə bilər.
Növbəti “ASAN xidmət” Mərkəzinin açılışı çox əlamətdar hadisədir. Çünki biz qısa müddət ərzində “ASAN xidmət” mərkəzlərinin sayını 19-a çatdırdıq və bu proses davam etdirilir. Hazırda səkkiz mərkəzin tikintisi nəzərdə tutulur. Onlardan bəziləri demək olar ki, hazırdır, bəzilərində isə işlər davam etdirilir. Beləliklə, biz bütün ölkəmizi “ASAN xidmət” mərkəzləri ilə əhatə edəcəyik. Əslində, bizim planlarımız da bundan ibarət idi. Biz bu təşəbbüsü irəli sürəndə mənim qəti fikrim ondan ibarət idi ki, əgər bu təcrübə müsbət olarsa, - mən buna şübhə etmirdim, - bütün ölkə üzrə “ASAN xidmət” mərkəzləri yaradılmalıdır və bütün vətəndaşlara keyfiyyətli xidmətlər göstərilməlidir. Biz bu işi ardıcıllıqla görürük. Bu gün bu mərkəzin işinə start verərkən gördüm ki, “ASAN xidmət”in fəaliyyətə başladığı dövrdən indiyə qədər təxminən 38 milyon müraciət olmuşdur. “ASAN xidmət”in fəaliyyətini ən gözəl əks etdirən fakt odur ki, vətəndaşların bəyənmə dərəcəsi 99,4 faizdir. Demək olar ki, 100 faiz vətəndaşlarımız “ASAN xidmət” mərkəzlərindən məmnundurlar. Bu da təbiidir. Əslində, bizim niyyətimiz də, istəyimiz də insanlar üçün çox gözəl, rahat və şəffaf xidmət yaratmaqdır. Biz buna nail ola bildik”. Bunu Ağcabədidə “ASAN xidmət” Mərkəzinin açılışında Prezident İlham Əliyev deyib.
Ekspertlər qeyd edirlər ki, ölkə başçısının ideyası əsasında meydana gələn “ASAN xidmət” mərkəzlərinin geniş vüsət almasının əhəmiyyəti bütün mənalarda böyükdür. Bu mərkəzlərdə yüksək səviyyədə xidmət göstərilməsi ilə yanaşı, həm də bütün istiqamətlərdə şəffaflığın təmin edildiyini deyən ekspertlərin vurğuladığına görə, “ASAN xidmət” Mərkəzinin fəaliyyətə başladığı ilk dövrlərdən özünü doğrultmağa və xidmət növlərini artırmağa başladığını qeyd edən ekspertlər hesab edirlər ki, Ağcabədidə “ASAN xidmət” Mərkəzində əhaliyə 320 növdə xidmət göstərilməsi kifayət qədər müsbət haldır. Bu mərkəzin də açılmasının əsas məqsədinin bölgə əhalisinin sənədləşmə və digər problemlərinin həllində çətinliklə üzləşməməsi ilə bağlı olduğunu deyən ekspertlər deyirlər ki, Azərbaycan dövləti üçün əsas vətəndaş amilidir və onun bütün mənalarda məmnunluğunun təminatıdır.
İqtisadi Resursların Öyrənilməsi Mərkəzinin direktoru Ruslan Atakişiyev baki-xeber.com-a bildirdi ki, ümumiyyətlə, “ASAN xidmət”in ölkəmizdə fəaliyyətə başlaması, həm də özündə vətəndaşa göstərilən bütün dövlət xidmətlərini birləşdirməsi, həmçinin də əhaliyə asan və əlçatan xidmətin göstərilməsi baxımından əhəmiyyəti məlumdur. Onu da deyim ki, artıq dünyanın bir sıra ölkələrində Azərbaycan brendi olan “ASAN xidmət” sahəsi öyrənilir və həmin ölkələrdə tətbiq olunması istiqamətində də müəyyən işlər aparılır. Paytaxtla yanaşı, bölgələrdə də “ASAN xidmət” mərkəzləri açılıb. Ağcabədidə “ASAN xidmət” Mərkəzinin açılması, ümumiyyətlə, Ağcabədi ilə yanaşı, ona yaxın olan digər rayonların - Beyləqanın, Ağdamın, Tərtərin, Bərdənin, Zərdabın da əhalisinin bu mərkəzin xidmətlərindən istifadə edə bilməsini reallaşdırır. Yəni bu mərkəzdə 320 xidmət göstərilməsi yalnız Ağcabədi əhalisinin deyil, həm də yaxın rayonların əhalisinin bütün xidmətlərlə təmin olunmasına şərait yaradıb. Bu amil həmin bölgədə yaşayan əhalinin sənədləşdirmə işi üçün müxtəlif dövlət qurumlarına getməsinin, bəzən o sənədi almaq üçün həftələrlə gözləməsinin, süründürməçiliyə məruz qalmasının qarşısını alıb. Yəni bu hallar baş verirdisə, “ASAN xidmət” Mərkəzinin açılması nəticəsində insanlar daha problemlərlə üzləşməyəcək, bir işini həll etmək üçün uzaq rayonlara getmələrinə ehtiyac olmayacaq. Çünki artıq Ağcabədidə də “ASAN xidmət” Mərkəzi öz əlçatan xidmətləri ilə əhalinin ixtiyarına verilib” - deyə R.Atakişiyev vurğuladı.
İradə SARIYEVA
