“Bir neçə ölkə ilə bizim “ASAN xidmət” mərkəzlərinin o ölkələrdə yaradılması ilə əlaqədar müqavilələr imzalanıb”. Bunu Prezident İlham Əliyev Ağcabədidə “ASAN Həyat” kompleksinin açılışından sonra ASAN könüllüləri ilə görüş zamanı çıxışında deyib.
Dövlət başçısının sözlərinə görə, “ASAN xidmət” bizim milli brendimiz və ölkəmizin intellektual məhsuludur: “ASAN xidmət”in fəaliyyətini ən gözəl əks etdirən fakt odur ki, vətəndaşların bəyənmə dərəcəsi 99,4 faizdir. Demək olar ki, 100 faiz vətəndaşlarımız “ASAN xidmət” mərkəzlərindən məmnundurlar. Bu da təbiidir. Əslində, bizim niyyətimiz də, istəyimiz də insanlar üçün çox gözəl, rahat və şəffaf xidmət yaratmaqdır. Biz buna nail ola bildik. Bu gün “ASAN xidmət” ölkəmizin intellektual məhsuludur. Mən bir dəfə demişəm, bir daha demək istəyirəm ki, biz artıq bu intellektual məhsulu ixrac edirik. Bir neçə ölkə ilə bizim “ASAN xidmət” mərkəzlərinin o ölkələrdə yaradılması ilə əlaqədar müqavilələr imzalanıb. Bəzi ölkələrdə artıq “ASAN xidmət” mərkəzləri fəaliyyətə başlayıb. Bu, bizim milli brendimizdir. “ASAN xidmət”in fəaliyyətə başlaması və uğurla fəaliyyət göstərməsi bu sahədə aparılan siyasətin çox gözəl nəticəsidir. “ASAN xidmət” innovasiyadır və hər bir yeni mərkəzin açılışında mənə yeni innovativ layihələr təqdim olunur”.
Bütün bu deyilənlərlə yanaşı, maraqlıdır, indiyə qədər “ASAN xidmət” intellektual məhsul olaraq hansı ölkələrə ixrac olunub və necə effekt verib?
“ASAN xidmət” modeli əsasında Əfqanıstanda dövlət xidmətlərinin göstərilməsi sahəsində eyniadlı qurum təsis edilib və artıq fəaliyyət göstərir”
Sözügedən məsələyə aydınlıq gətirən ekspert Rəsul Cahangirlinin sözlərinə görə, “ASAN xidmət” modeli dünyada 10-dan çox ölkəyə ixrac edilib: “ASAN xidmət” modelinin bir sıra ölkələrdə tətbiqi ilə bağlı danışıqlar gedir. Məsələ ondadır ki, bu model dünyada yüksək qiymətləndirilir. “ASAN xidmət”in fəaliyyəti Avropa İttifaqında, Avropa Parlamentində, Böyük Britaniya Parlamentində, Fransa, Almaniya və digər ölkələrdə yüksək qiymətləndirilib. Özünəməxsus hüquqi strukturu olan bu model bir çox beynəlxalq qurum və ekspert tərəfindən uğurlu model hesab olunur. Xüsusən Asiya ölkələri bu modelə daha çox maraq göstərirlər. Azərbaycanın “ASAN xidmət” modeli əsasında Əfqanıstanda dövlət xidmətlərinin göstərilməsi sahəsində eyniadlı qurum təsis edilib və artıq fəaliyyət göstərir. Qırğızıstan və Tacikistanda da bu modelin tətbiqi gündəmdədir. Məlumata görə, hazırda 11 ölkədə "ASAN xidmət" modelinin tətbiqi ilə bağlı intensiv işlər gedir. Həmin ölkələr Monteneqro, Mərakeş, Uqanda, Türkiyə, Özbəkistan, Nepal, İndoneziya, Qazaxıstan, Monqolustan, Banqladeş və Bruneydir. Onu da qeyd edim ki, "ASAN xidmət"in işçi qrupu hər bir ölkə ilə bu istiqamətdə çalışır. Belə ki, 2018 və 2019-cu illərdə İndoneziyanın paytaxtı Cakarta şəhərini və müxtəlif əyalətləri təmsil edən qurumların rəhbərlərinə “ASAN xidmət” mərkəzlərində təlimlər keçirilib. Bu gedişlə daha çox ölkə bu modeli tətbiq edəcək”.
Vidadi ORDAHALLI
