Rauf Zeyni: “Bu, dövlətimizin gənc könüllülərə dəyər verməsi, inam, etimad göstərməsi deməkdir”
Əhalinin həyat şəraitinin yüngülləşdirilməsi, habelə sənədləşmə işlərinin operativ həll edilməsi istiqamətində dövlətin həyata keçirdiyi siyasətin mərkəzində vətəndaş məmnunluğunun qazanılması dayanır.
Məlum olduğu kimi, Prezident İlham Əliyev Ağcabədidə “ASAN xidmət” mərkəzinin açılışında iştirak edib və çıxışı zamanı bir sıra məsələlərə, o cümlədən də ölkəmizdə günü-gündən genişlənən könüllülük hərəkatına toxunub. “...Mən çox şadam ki, “ASAN xidmət” mərkəzlərində işləyənlərin mütləq əksəriyyəti, demək olar ki, hamısı gənclərdir, o cümlədən, könüllülər bütün mərkəzlərdə fəaliyyət göstərirlər. Mənə verilən məlumata görə, Ağcabədi “ASAN xidmət” mərkəzində 200-dən çox işçi və 45 könüllü fəaliyyət göstərəcək. Əslində, Azərbaycanda könüllülər hərəkatı “ASAN xidmət”dən başlamışdır. O vaxta qədər Azərbaycanda könüllülər hərəkatı olmamışdır. “ASAN xidmət”dən sonra digər sahələrdə də könüllülər fəaliyyətə başladılar. O cümlədən, ölkəmizdə keçirilmiş böyük beynəlxalq idman yarışlarında – Avropa və İslam Həmrəyliyi oyunlarında könüllülər böyük xidmət göstərmişlər. Könüllülərsiz biz bu böyük yarışları keçirə bilməzdik. Bu gün mənim göstərişimlə digər sahələrdə də könüllülər fəaliyyət göstərir. Mən göstəriş vermişəm ki, dövlət təşkilatlarında, nazirliklərdə, dövlət şirkətlərində könüllülər işə cəlb edilsin, onlar təcrübə keçsinlər. Çünki bugünkü könüllülər sabahın rəhbərləridir. Təsadüfi deyil ki, mənim sərəncamımla bu il “Könüllülər ili” elan edilmişdir. Bu, bir daha bizim könüllülərin fəaliyyətinə göstərdiyimiz diqqəti və münasibəti əks etdirir...” - deyə ölkə başçısı vurğulayıb.
- “45 nəfərin bölgədəki bir “ASAN xidmət” mərkəzinə cəlb olunması amilinin özü daha çox gəncin könüllülük prosesinə qoşulmasına şərait yaradır”
Milli Qeyri-Hökumət Forumunun prezidenti Rauf Zeyni baki-xeber.com-a bildirdi ki, ölkəmizdə könüllülük hərəkatının yaradılmasında və genişlənməsində, onların fəaliyyətlərinin yüksək səviyyədə qorunmasında ölkə başçısının rolu misilsizdir. “Cənab Prezidentin Ağcabədiyə səfər etməsi və burada bir sıra müəssisələrin, o cümlədən də “ASAN xidmət” mərkəzinin, ondan əvvəl isə Tərtərdə Olimpiya Kompleksinin, Dövlət Rəmzləri Muzeyinin açılışını etməsi təqdirəlayiq haldır və bu, Prezidentin bölgələrə qayğısının təzahürüdür. Bunlar çox böyük hadisələrdir. Regionların sosial-iqtisadi inkişafı ilə bağlı qəbul edilən Dövlət Proqramı çərçivəsində görülən işlərdə çox yüksək inkişaf, irəliləyiş müşahidə olunur. Əlbəttə, təmas xəttində, cəbhəyanı bölgələrimizdə bu proseslərin, bu inkişafın getməsi hamımızı sevindirir və hər bir vətəndaş üçün bu böyük bir stimuldur, onların həyat şəraitinin təmin olunması deməkdir. Cənab Prezident həm Tərtərdə, həm də Ağcabədidə etdiyi çıxışda qeyd etdi ki, hər bir vətəndaşın sosial vəziyyəti, sağlamlığı, ailəsini təmin etməsi, işlə təmin olunması, məşğuliyyəti dövlətin diqqət mərkəzindədir. Ağcabədidə açılan “ASAN xidmət” mərkəzində 45 nəfər könüllünün fəaliyyət göstərməsi müsbət haldır. Bu, dövlətimizin gənc könüllülərə dəyər verməsi, inam, etimad göstərməsi deməkdir. Eyni zamanda da bölgələrdəki gənclərin aktivliyinin artırılması, onların cəmiyyətdə gedən proseslərdə fəal iştirakının artmasına xidmət edir. 45 nəfərin bölgədəki bir “ASAN xidmət” mərkəzinə cəlb olunması amilinin özü daha çox gəncin könüllülük prosesinə qoşulmasına şərait yaradır”. R.Zeyni qeyd etdi ki, pandemiyanın hərəkətləri məhdudlaşdırmasına baxmayaraq, bu virus Azərbaycanda könüllülər hərəkatının işinə mane ola bilmədi. Bu gün könüllülər hərəkatının daha geniş vüsət aldığını deyən R.Zeyni qeyd etdi ki, könüllülərin fəaliyyətinə əsas ən böyük dəstək Prezident tərəfindən verilir. “Könüllülər ili” çərçivəsində həm gənclərdən, həm də başqa yaş qrupuna aid insanlardan ibarət könüllülər ordusu inkişaf edir. Bu gün bütün regionlarda, yerli və mərkəzi icra hakimiyyəti orqanlarında könüllülər hərəkatı genişlənir. Bu çox vacibdir. Çünki hər bir könüllü aktiv vətəndaş deməkdir, bu da cəmiyyətin qazancıdır və vətəndaş cəmiyyətinin də böyük potensialı deməkdir. Ona görə də düşünürəm ki, ölkə başçısının könüllülərlə görüşməsi, könüllülərin xüsusi dəyərləndirilməsi özü bir çağırışdır və regionlarda “Könüllülər ili” çərçivəsində könüllülər hərəkatına çox geniş yer, imkan verilməlidir. Bütün yerli və mərkəzi icra hakimiyyəti orqanları könüllülər hərəkatını gücləndirməlidirlər. Bu baxımdan, biz qeyri-hökumət təmsilçiləri də könüllülərin ölkədə təşkilatlanması, geniş hərəkata çevrilməsi və bundan sonra da Azərbaycanın inkişafına öz töhfəsini verməsində maraqlıyıq. Düşünürük ki, bu da Azərbaycan dövlətinin, Azərbaycan xalqının və vətəndaş cəmiyyətinin bir potensialıdır. Könüllülər hərəkatı ölkəmizdə gedən islahatlara öz layiqli töhfələrini verəcək, onlar bütün spektrlərdə gedən islahatlarda daha yaxından iştirak edəcəklər” - deyə R.Zeyni bildirdi.
İradə SARIYEVA
