15/07/2020 05:46
728 x 90

Həftəsonu sərt karantin qaydaları detallarına qədər açıqlandı, lazım gəlsə, həftələrlə təkrar oluna bilər...

img

Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib.

Brifinqdə Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı, TƏBİB-in şöbə müdiri Yaqut Qarayeva, Ümumdünya Səhiyyə Təşkilatının (ÜST) Azərbaycandakı nümayəndəliyinin rəhbəri Hande Harmancı jurnalistləri maraqlandıran suallara cavab verib.

  • Növbəti həftələrdə də 2-3 gün günlük qapanmalar ola bilər

TƏBİB sədri Ramin Bayramlı bildirib ki, ola bilsin ki, növbəti həftələrdə bayram günlərinə yaxın həftə sonları birləşdirlməklə 2-3 gün günlük qapanmalar tətbiq edilsin. Onun sözlərinə görə, COVID-19 virusunun yayılmasının azaldılması üçün karantin qaydalarının müəyyən günlərdə sərtləşdirilməsi qərara alınıb. Bununla əlaqədar həftənin sonunda Bakı, Gəncə, Lənkəran, Sumqayıt şəhərləri və Abşeron rayonunda əhalinin yaşayış yerlərini tərk etməsi qadağan edilir.

R.Bayramlı qeyd edib ki, fəaliyətinə icazə verilən qurumlar barədə müvafiq məlumatlar müəssisələrə göndərilib.

TƏBİB sədri əlavə edib ki, bu gün ölkədə COVİD-19-la bağlı 7047 test aparılıb, 262 yeni yoluxma faktı aşkarlanıb, iki nəfər dünyasını dəyişib. Indiyədək ümumilikdə 78 nəfər bu xəstəlikdən vəfat edib. Hazırda 2707 nəfər müalicəsini davam etdirir. Bu gün 100 nəfər xəstə reanimasiyada müalicə edilir, onların 21-i süni tənəffüs aparatına qoşulub.

  • Pandemiyanın başlanğıc mərhələsindəyik

R.Bayramlı hazırda pandemiyanın başlanğıc mərhələsində olduğumuzu deyib. Onun sözlərinə görə, COVİD-19-un yayılmasının qarşısının alınması üçün vətəndaşların yalnız qısamüddətli qapanmalarda olması kifayət deyil, insanlar tələb olunan qaydalara da əməl etməlidirlər: "Bəzi vətəndaşlar bu halı ikinci dalğa kimi qəbul edirlər. Bu belə deyil, hazırda pandemiyanın başlanğıc mərhələsindəyik”.

  • ...apteklər və marketlər tam bağlanacaq...

R.Bayramlı bildirib ki, həftə sonunda bütün əczaçılıq subyektləri və marketlər tam qapadılacaq. Onun sözlərinə görə, cümə günü dövlət qurumlarında iş saatı 14.00-da bitəcək:“Vətəndaşlar bunu bir bayram kimi qəbul etməsinlər. Bu, vətəndaşlara əlavə vaxt kimi verilir. Həftə sonunda bütün əczaçılıq subyektləri və marketlər tam qapadılacaq. Vətəndaşlar arasında hər hansı təşviş yoxdur. Vətəndaşların zəruri ehtiyaclarını ödəmək üçün bu gün və sabah kifayət qədər vaxtları var”.

R.Bayramlı qeyd edib ki, həftə sonu belə qapanmalar tətbiq edilə bilər.

R.Bayramlı deyib ki, həftəsonu bəzi dövlət qurumlarının işçiləri məhdud sayda işə çıxacaqlar. Onun sözlərinə görə, qurumlar məhdud sayda işçilərin işə çıxması üçün icaze.gov.az saytından icazə almalıdır. İşləməsinə icazə verilən şəxslər xidməti maşınlardan istifadə edə bilərlər.

  • Dünyasını dəyişən insanların koronavirusdan ölməsi barədə şayiələr...

“Dünyasını dəyişən insanların koronavirusdan ölməsi barədə arayışların verilməsi ilə bağlı şayiələr yaranıb. Biz bu məlumatları araşdırmışıq. Yayılan məlumatlarda arayışların təcili tibbi yardım xidmətinin işçiləri tərəfindən verildiyi bildirilir” deyən R.Bayramlının sözlərinə görə, bu məlumatlar doğru deyil və şayiədir:"Onu da nəzərə almaq lazımdır ki, COVİD-19-un diaqnozunun qoyulması o qədər də asan məsələ deyil”.

  • Jurnalistlər həftə sonları necə işləyəcək...

TƏBİB sədri bildirib ki, xəbər saytlarının işçilərinin evdə çalışması tövsiyə edilir. O tövsiyə edib ki, həftə sonunda televiziya qurumları da məhdud sayda işçi dəvət etsinlər. Verilişlərə dəvət ediləcək şəxslərdən müsahibələr isə onlayn qaydada alınsın.

  • İnsanlar qaydalara əməl etməyə başlayıb

“Dünəndən insanların qaydalara əməl etməsinin şahidi oluruq” - deyən R.Bayramlının sözlərinə görə, bu sevindiricidir:"İnsanlar qaydalara əməl edərsə, biz həftə sonlarında qapanmaya getməyə də bilərik”.

R.Bayramlı “təcrübələr göstərir ki, qısamüddətli qapanma dövrünün də effekti olur, belə qapanmalardan 7-10 gün sonra statistik göstəricilərin necə dəyişdiyini görə bilərik” deyib. TƏBİB sədri həftəsonu tətbiq edilən bu qapanmaların xeyrinin olacağı qənaətindədir.

R.Bayramlı qeyd edib ki, polislər maskalardan istifadə ilə bağlı qaydalara əməl edirlər:"Onlar qaydalara nəzarət üçün ciddi addımlar atacaqlar".

TƏBİB sədri bildirib ki, xidməti avtomobillə bağlı daxili imkanları olmayan müəssisələr işçilərinin işə gəlməsi üçün Bakı Nəqliyyat Agentliyinə müraciət edə bilərlər. Onun sözlərinə görə, bu məsələdə qurumların daxili resurslarına üstünlük verilməlidir:“Piyada gələ bilən işçilərə üstünlük verilməlidir. Zəruri olduqda iş yeri Bakı Nəqliyyat Agentıiyi ilə müzakirə apara bilər”.

R.Bayramlı qeyd edib ki, həftə sonlarında işə gələcək bütün qurumların işçilərinə rəsmi qaydada icazə alınmalıdır.

  • Modul tipli xəstəxanalarda 2000-ə qədər çarpayı fondu olacaq

TƏBİB sədri qeyd edib ki, xüsusi rejimli xəstəxanalarda 5000-dən çox çarpayı var. Onun sözlərinə görə, modul tipli xəstəxanalarda 2000-ə qədər çarpayı fondu olacaq:“Bu gün 2500 aktiv xəstə sayı var. Amma xəstələrin böyük əksəriyyəti Bakıda və narıncı əraziyə düşən yerlərdəki xəstəxanalarda yerləşdiyi üçün lokalizasiyaya yerləşən tibb müəssisələrinin üzərinə düşən yük artır".

  • Daxili uçuşların yaxın günlərdə bərpası gündəmdə...

R.Bayramlı daxili uçuşların yaxın günlərdə bərpasının gündəmdə olduğunu da deyib. Onun sözlərinə görə, bununla bağlı metodiki göstərişlər hazırlanaraq təsdiq edilib.

Beynəlxalq ucuşlara gəldikdə, R.Bayramlı qeyd edib ki, bir sıra beynəlxalq hava nəqliyyatı qurumları bu barədə məlumat veriblər:“Bu istiqamətdə müzakirələr davam edir. Güman edirəm ki, biz bu məsələni 1 iyuladək gecikdirə bilərik”.

  • ÜST nümayəndəsi “peyvənd hazır olmayana qədər koronavirus davam edəcək” dedi

“Hazırda bütün dünyada koronavirusun ilk dalğası yaşanır və bu zaman dövründə biz təcrübə toplamışıq”. Bunu isə ÜST-nin Azərbaycandakı nümayəndəliyinin rəhbəri Hande Harmancı deyib.

Onun sözlərinə görə, peyvənd hazır olmayana qədər bu virus bizimlə hələ uzun müddət birlikdə olacaq:"Hazırda bir çox ölkə virusa qarşı peyvənd hazırlamaq üçün cəhdlər göstərir. Ona görə də ikinci dalğanın yaranmaması üçün hər birimiz bu virusa qarşı çox ciddi davranmalı, məsuliyyətli yanaşma göstərməliyik”.

Son xəbərlər