"Hər imtahan binasının yanında həkimlər olacaq. Hər abituriyent imtahana gələrkən bəyannamə imzalayıb gətirəcək. Onlar bu bəyannamələri imtahana daxil olanda əməkdaşlara verməlidirlər. Bəyannamənin mətni açıqlanacaq. Sənəddə qeyd olunur ki, şagird və valideynlər bəyan edir ki, hazırda ailəsində koronavirus xəstəsi yoxdur və axırıncı 15 gündə bu cür xəstələrlə təmasda olmayıblar”.
Bu fikirləri Dövlət İmtahan Mərkəzinin Direktorlar Şurasının sədri Məleykə Abbaszadə IX və XI siniflər üzrə buraxılış imtahanlarına daxilolma qaydalarını açıqlayarkən deyib. Belə ki, imtahan iştirakçıları özləri ilə şəxsiyyəti təsdiq edən sənədlə yanaşı, "İmtahana buraxılış vərəqəsi” və "İmtahan iştirakçısının sağlamlığı” haqqında bəyannaməni gətirməlidirlər.
DİM sədrinin açıqlaması imtahan həyəcanı ilə yaşayan şagirdlərin və qarşıda qəbul imtahanlarına hazırlaşan abituriyentlərin və onların valideynlərinin narahatlığını daha da artırıb. Onlar DİM-in imtahan kampaniyası müddətində virusun yayılmasının qarşısını almaq məqsədilə imtahan binalarında bir sıra profilaktik tədbirlər həyata keçirilməsini - binaların və otaqların dezinfeksiyası, havalandırılması, müvafiq yerlərdə əl dezinfektantları üçün dispenserlərin quraşdırılması, hər bir otağa düşən iştirakçı sayının sosial məsafə prinsipinə uyğun şəkildə tənzimlənməsi, imtahan heyətinin müvafiq qoruyucu vasitələrlə təmin olunması və onların təlimatlandırılmasını nə qədər dəstəkləyirlərsə, bu tələbdən bir o qədər narazı qalıblar.
Kamran Əsədov: “...adi bir qızdırma səbəbindən onların imtahana buraxılmaması ədalətli deyil”
DİM-in bu qərarını həddindən artıq sərt hesab edən təhsil eksperti Kamran Əsədov bildirdi ki, qurumun pandemiya ilə əlaqədar həyata keçirdiyi qabaqlayıcı addımları təqdir edilməlidir. Ancaq imtahan günü qızdırması olan şagirdlərin imtahan keçirilən binalara buraxılmaması abituriyentlərə qarşı haqsızlıqdır: “İmtahan iştirakçılarının sağlamlığı və təhlükəsizliyi baxımından bu addımlar anlaşılan olsa da, mövcud vəziyyətdə bu qaydaların abituriyentlər arasında panika yaradacağı ehtimalı da nəzərə alınmalıdır. Şəxsən öz adıma koronavirus səbəbilə abituriyentlərin imtahanlara buraxılmaması və ya nəticələrinin ləğv edilməsinin düzgün olmadığını düşünürəm".
Həmsöhbətimiz onu da qeyd etdi ki, sağlam insanın hərarəti normada 36-36,5 aralığında olsa da, ani səbəblərdən 37-yə qalxa bilər. Əgər qolaltı ölçmədə subfebril hərarət (37.2-37.5) 1 həftə və daha artıq müddət müşahidə olunursa, bu artıq ciddi bir simptomların göstəricisi kimi qəbul olunur: “Arada bir qalxan temperatur narahatlıq üçün heç bir əsas vermir. Həm də ki, bu uşaqlar illərdir qəbul imtahanlarına hazırlaşırlar. Nə qədər maddi, mənəvi əziyyətləri olub. Adi bir qızdırma səbəbindən onların imtahana buraxılmaması ədalətli deyil. Hesab edirəm ki, DİM mövcud qərarını yumşaltmalı, müəyyən güzəştlər etməlidir. Xüsusən də nəzərə almaq lazımdır ki, indi yay aylarıdır. Havaların istiliyi bir yandan, digər yandan da şagirdlərin imtahan həyəcanı, uzun müddət tədris prosesindən kənar qalmanın verdiyi narahatlıq bədən temperaturunun müəyyən qədər qalxmasına səbəb ola bilər".
Ekspertin sözlərinə görə, bu gün ölkəmizdə 6 mindən çox adam koronovirusa yoluxub. Bu ən azı 6 min şagirdin qohumu, tanışı deməkdir. Hələ koronavirus daşıyıcı olub bundan xəbərsiz nə qədər insan var. Şagird hardan bilsin ki, onun təmasda olduğu adamda bu visus var, ya yox? K.Əsədov hesab edr ki, DİM bütün bu faktorları nəzərə almalı və abituriyentlərə qarşı bir az yumşaldıcı mövqe nümayiş etdirməlidir.
Adil Qeybulla: “İlk növbədə, imtahan auditoriyalarının strukturunu dəyişmək lazımdır”
Həkim-ekspert Adil Qeybulla tibbi nöqteyi-nəzərdən bu tələbə haqq qazandırır və bunu pandemiya dövrünün şərti adlandırır: "Əgər karantin dövrü olmasaydı, mən də sağlamlıq haqqında bəyannamə tələbini təəccüblə qarşılayardım. Ancaq indi biz gecə-gündüz virusdan danışdığımız halda, bu cür sənəd tələbi normaldır. Söhbət hava-damcı yolu ilə keçən təhlükəli infeksiyadan – COVID-19-dan gedir. Bu virusa yoluxub-yoluxmamaqla bağlı abituriyentin əlində bir kağız olmalıdır. Yəqin ki, belə bir zərurət var. Çünki abituriyentlər, istənilən halda, auditoriyada oturacaqlar. Onlar imtahanı onlayn vermirlər, bir-birilə təmasda olacaqlar”.
A.Qeybullanın fikrincə, ilk növbədə, imtahan auditoriyalarının strukturunu dəyişmək lazımdır. Belə ki, abituriyentlərin arasındakı məsafə 2 metrdən az olmamalıdır: "İstənilən halda, imtahan qapalı otaqda keçiriləcək. Bu da bir-birini yoluxdurmağa şərait yaradar. Hesab edirəm ki, imtahan otağına abituriyentin sağlam daxil olması mühüm amildir. Testdən keçdikdən sonra onun infeksiyaya yoluxmaması təsdiqlənir. Fikrimcə, burada hər hansı hüquqpozmadan söhbət gedə bilməz. Çünki karantin dövründə yaşayırıq və şərtlərə əməl etmək məcburiyyətindəyik”.
Günel CƏLİLOVA
