Son 10 gün ərzində ölkə ərazisində koronavirusa yoluxanların sayı artan dinamika üzrə davam edir. İyunun 3-də koronavirusa yoluxma sayında rekord göstərici qeydə alınıb. Belə ki, həmin gün 325 nəfər koronavirusa yoluxub, 5 nəfər isə vəfat edib. Virusa yoluxma sayının artması hökuməti də narahat edir. İyunun 4-də keçirilən Nazirlər Kabineti yanında Operativ Qərargahın brifinqində karantin rejiminin yenidən sərtləşdiriləcəyi bildirildi.
TƏBİB-in İdarə Heyətinin sədri Ramin Bayramlı media nümayəndələrinə açıqlamasında qeyd edib ki, yoluxanlarla sağalanların arasındakı fərq 200-ü keçib. Bu alqoritm həftə sonları məhdudlaşdırmanı gündəmə gətirib: “Bizim bu barədə müraciətimiz dəyərləndirilib. Cümə günü axşamdan etibarən bazar ertəsi səhərədək tam küçəyə çıxmağın qadağan olunması ilə bağlı təkliflərimiz hazırdır. Birinci klastra Bakı, Sumqayıt, Gəncə, Abşeron rayonu və Lənkəran şəhərləridir. Bakı şəhəri başda olmaqla, bu şəhərlərdə və rayonda yoluxmanın intensivliyi yüksəkdir. Bu, həftəsonu, ola bilsin ki, irəlidəki 1-2 ay ərzində bütün həftə sonları, hətta həftə sonları bayrama yaxın günlər də olacaqsa, bəlkə 3-cü gün də əlavə etməklə 2 və ya 3 günlük tam şəkildə küçəyə çıxmaq qadağasının tətbiq olunması ilə bağlıdır.
Ola bilsin irəlidəki aylarda hər həftəsonu, bayramlar da daxil olmaqla, küçəyə çıxmaq tam qadağan olunsun. Operativ Qərargahda bizim təkliflərimizlə bağlı qərar qəbul olunub”.
İctimaiyyət nümayəndələri, ziyalılar, millət vəkilləri karantin rejiminin sərtləşdirilməsinə tərəfdardırlar.
“Bəzi insanlar şənbə-bazar günləri evdə oturmaqdansa, boş-boşuna küçələrdə gəzməyə üstünlük verirlər, nəticədə isə virus sürətlə yayılır”
Millət vəkili Rüfət Quliyev “Bakı-Xəbər”ə açıqlamasında qeyd etdi ki, son günlər yoluxmaların sayında müşahidə olunan artım sərt karantin rejiminin yumşaldılmasından sonrakı dövrdə müəyyən qrup insanların TƏBİB-in açıqladığı metodiki göstərişlərə əməl etməməsi, ictimai nəqliyyatda, qapalı məkanlarda tibbi maska taxmaması, sosial məsafəni gözləməməsi və laqeydliyinin nəticəsidir: “Prezident İlham Əliyevin tapşırıq və tövsiyələrinə uyğun olaraq, Nazirlər Kabineti yanında Operativ Qərargah infeksiyanın Azərbaycanda qeydə alındığı gündən məqsədyönlü fəaliyyət göstərib. Sərt karantin rejiminin mərhələlərlə yumşaldılmasına başlanan müddətədək yoluxmanın və itkinin minimuma endirilməsi, eyni zamanda, bu dövrdə ölkənin tibb müəssisələrinin bu sahədə yüksək səviyyəli kadrlarla və texniki avadanlıqlarla təchizatı təmin edilib, laboratoriyalar yaradılıb. Prezident İlham Əliyev və Birinci vitse-prezident Mehriban Əliyevanın tapşırıq və tövsiyələrinə uyğun olaraq, görülən işlər, əldə edilən uğurlar Ümumdünya Səhiyyə Təşkilatı tərəfindən də yüksək qiymətləndirilib, Azərbaycan nümunəvi ölkə kimi qeyd olunub. Bir sözlə, dövlət üzərinə düşən vəzifəni layiqincə yerinə yetirib və bu gün də yerinə yetirməkdədir. Bundan sonrakı mərhələdə əsas həlledici amil vətəndaş məsuliyyəti idi”.
Millət vəkili onu da vurğuladı ki, vətəndaşların əksəriyyətinin son zamanlar karantin rejiminin tələblərinə ciddi əməl etməməsinə görə yoluxan və sağalanlar arasında kəskin fərq yaranıb. “Nəzərə alınmalıdır ki, bu virus hələ bizim aramızdadır və insanlar bu virusla yaşamağı öyrənməlidirlər. Çünki virusla bağlı vaksinin nə zaman hazır olacağı bilinmir. Buna görə də insanlar məsuliyyətini dərk etməli və TƏBİB-in metodiki göstərişlərinə maksimum əməl etməyə çalışmalıdırlar. Çünki cəmiyyətin uzun müddət sərt karantin rejimində yaşaması mümkün deyil. Buna görə də bir sıra ölkələrdə olduğu kimi, Azərbaycanda da müxtəlif sahələrlə bağlı metodiki göstərişlər təsdiqlənib, qaydalar müəyyənləşib. Buna uyğun olaraq da mərhələli sərt karantin rejiminin yumşaldılmasına başlanmışdı. Bu sadə tələblərə riayət etmək, ictimai nəqliyyatda, qapalı məkanlarda tibbi maska taxmaq, sosial məsafəni gözləmək bu virusdan qorunmağın ən asan və rahat yoludur. Ancaq xüsusən sərt karantin rejiminin yumşaldılması ilə bağlı son qərardan sonra təəssüf ki, maska taxılmaması, sosial məsafənin gözlənilməməsi meylləri artıb. Digər tərəfdən, bayram günlərində insanların laqeydliyi nəticəsində yoluxmaların sayında nəzərəçarpacaq artım, yoluxanların sayının sağalanların sayından çox olması qeydə alındı. Həftə sonlarında insanların küçəyə çıxma qadağasının tətbiq olunması düzgündür. Bəzi insanlar şənbə-bazar günləri evdə oturmaqdansa, boş-boşuna küçələrdə gəzməyə üstünlük verirlər. Nəticədə isə virus sürətlə yayılır. Bu səbəbdən də şənbə-bazar günləri koronavirus tam yox olana qədər küçəyə çıxılmamalıdır”.
Günel CƏLİLOVA
