Rasim Quliyev: “Biz bu vəziyyətdən yalnız bir-birimizə qarşı tələbkar olmaqla çıxa bilərik”
Məlum olduğu kimi, ölkədə xüsusi karatin qaydalarının get-gedə yumşaldılması həyata keçirilir. Ancaq bunun fonunda xəstəliyə yoluxanların sayında çoxalma qeydə alınır. Eyni zamanda biz virusdan ölənlərin sayında da artım dinamikasını hiss edirik. Azərbaycanda koronavirusla bağlı 2 iyun 2020-ci il tarixinə olan statistik göstəricilər açıqlanıb. Bu barədə Tibbi Ərazi Bölmələrini İdarəetmə Birliyi (TƏBİB) məlumat yayıb.
Bildirilib ki, bu gün koronavirusa görə 6968 test aparılıb. İndiyə kimi həyata keçirilən testlərin sayı 309 901-ə çatıb.
Hazırda reanimasiyada olan xəstə sayı 95, süni tənəffüs cihazında olan xəstə sayı 14-dür.
Azərbaycanda bu günədək 5935 nəfərin koronavirus infeksiyasına yoluxması faktı müəyyən ediib, onlardan 3564 nəfər müalicə olunaraq sağalıb, 71 nəfər vəfat edib, 2300 nəfərin xüsusi rejimli xəstəxanalarda müalicəsi davam etdirilir. Həmin şəxslərdən 50 nəfərin vəziyyəti ağır, 73 nəfərin vəziyyəti orta ağır qiymətləndirilir, digərlərinin səhhəti stabildir.
Ölkənin baş infeksionisti Cəlal İsayev bildirib ki, bu mövsümdə insanların bölgələrə gedib istirahət etməsi, təəssüf ki, mümkün olmayacaq:“İnfeksiya bu şəkildə artmaqda davam etsə, rayonlara yol açılmayacaq və istirahətə gedə bilməyəcəklər. Hər insanın yanına bir polis, bir məmur qoymaq olmaz. İnsan özü anlamalıdır ki, maska olmalıdır, biz müəyyən müddət maskada gəzməyə məcburuq. Çin bu cür məcburi qaydaların hesabına koronavirusa qalib gəldi. Biz də buna könüllü əməl etməliyik. Mütləqdirmi, kimsə bizi cərimələsin, maska taxmağa məcbur eləsin?”
Qaydaların yumşaldılması və yoluxmanın sayının artması ilə bağlı yaranan paradoksal vəziyyəti necə izah etmək olar?
Koronavirusla bağlı araşdırmalar aparan “Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, mərkəz olaraq bu sual onları da dərindən düşündürür: “Hazırda bütün dünyada pandemiya ilə bağlı psixoloji vəziyyət dəyişib. Artıq insanlar virusu tanımağa başlayıb. Ancaq bunu da bilməliyik ki, bu virusu eyni vəziyyətdə, stabil dinamikada saxlamaq da mümkün deyil. Bu baxımdan da ölkələrin karantinlə bağlı atdığı yumşaldıcı addımlar başadüşüləndi. Bunu uzun müddət saxlamaq da olmaz. İnsanlar yorulur. Qış mövsümündə başlayanda insanların evdə qalması mümkün idi. Yaz və yay aylarında bu istiqamətdə vəziyyət çətinləşir. Çünki adətən isti yay aylarında bizim əhali istirahət rejimində qalmağa üstünlük verir. Hələ mən dünya iqtisadiyyatına vurulan ziyandan danışmıram. Ölkəmizdə cənab Prezidentin bu məsələyə ciddi diqqətini görürəm. Proses mərhələli şəkildə aparılır. Bakı lokallaşdırılsa da, rayonlarda əhaliyə şərait yaradılıb ki, kənd təsərrüfatı ilə məşğul olsunlar. Vaxtında o işlərlə məşğul olunmasa, rayonlarda vəziyyət daha da pisləşə bilər. Yoluxma sayının artması ilə bağlı kiminsə üzərinə konkret məsuliyyət qoymaq istəmirəm. Ancaq bizim vətəndaşlarımızda qaydalara qarşı laqeydlik var. Mən dünən müşahidə etmişəm ki, aparılan maarifləndirmə işlərindəki tələblərə ciddi riayət olunmur. Bura sosial məsafənin saxlanması və qoruyucu maskalardan istifadəni əlavə edə bilərik. Bu da epidemiyanın artmasına səbəb olur. Qadağaların yumşalması yalnız bizim ölkədə həyata keçirilmir. Demək olar ki, bütün dünyada eyni mənzərədi. Qadağalar yumşalır, ancaq yoluxma sayında artım olur. Hesab edirəm ki, proses elə bu şəkildə də getməlidir. Bir anlıq hesab edin ki, 65 yaşından yuxarı olan bir adama deyirsən 6 ay evdən çıxma. Biz onu epidemiyadan qorumuş olsaq da, başqa cəhətdən səhhətində geriləmə hiss edəcəyik. Bu nəticəyə gəlirik ki, yumşalmanın edilməsi də zəruridir, ancaq bizim də borcumuzdur ki, qaydalara əməl edək. Əks təqdirdə, vəziyyət payıza doğru daha pis hal ala bilər. Təəssüflər olsun ki, insanların epidemiyaya yanaşmasında ciddilik azalıb. Əvvəlki qaydada gigeyana qaydalarına fikir verilmir. Biz bu vəziyyətdən yalnız bir-birimizə qarşı tələbkar olmaqla çıxa bilərik. Özümüzü qorumaqla cəmiyyəti qorumuş olarıq. Başqa yolumuz yoxdur”.
Məhəmmədəli QƏRİBLİ
