05/07/2020 07:14
728 x 90

Polis nə etməlidir - koronavirus şübhəlilərinin polisə və həkimə müqavimət halları necə qarşılanmalıdır…

Şəmsəddin Əliyev: “Bütün hallarda polisin qanuni tələblərinə müqavimət göstərilməsi hüquqi məsuliyyət yaradır”

img

Koronavirus pandemiyası dövründə vətəndaşlarımızın bir sıra məsələlərdə məsuliyyətsizlik göstərməsinin şahidi oluruq. Bir tərəfdən mövcud yumşaldılmış karantin qaydalarına əməl etmirlər, digər tərəfdən də başqa əməllərə əl atırlar.

Son zamanlar virusa yoluxan bəzi şəxslərin bunu gizlətmək cəhdləri baş verir. Təcili yardım briqadası xəstədə virusun olduğunu müvafiq testləşmə ilə müəyyən etsə də, həmin xəstələri evindən xəstəxanaya aparmaq zor olur. Bu halda, qanunvericiliyə uyğun olaraq, həkimlər həmin xəstənin evinə polisin müşayiəti ilə getmək məcburiyyətində qalırlar. Çox zaman virus yoluxan şəxsin ya özü, ya da ailə üzvləri həkim briqadasına və polislərə müqavimət göstərirlər. Təəssüf doğuran bu hal  geniş yayılmasa da, bununla bağlı xeyli fakt var. Məsələn, bu günlərdə Samux rayonunda virusa yoluxan qadının əri polisə və həkim briqadasına yaba ilə hücum edib. Belə ki, Samux Rayon Mərkəzi Xəstəxanasının həkim briqadası polis əməkdaşlarının müşayiəti ilə rayonun Füzuli kəndində koronavirusa yoluxmuş bir qadını müalicə üçün xüsusi xəstəxanaya yerləşdirmək məqsədilə onun yaşadığı ünvana gedib. Bu zaman qadının həyat yoldaşı həkim briqadasının işinə maneçilik törədib və müqavimət göstərərək əlindəki yaba ilə onlara hücum edib. Amma yoluxan qadın ərinin etirazlarına rəğmən, xüsusi karantin xəstəxanasına yerləşdirilib.

Daxili İşlər Nazirliyinin Mətbuat xidmətinin rəisi, polis polkovniki Ehsan Zahidov faktı təsdiqləyib. Bildirib ki, həkimlərə hücum edən kişi dərhal zərərsizləşdirilib: “Həkimləri müşayiət edən polis əməkdaşları dərhal hadisəyə müdaxilə edib və həyatlarını risqə ataraq, hücum edən şəxsi zərərsizləşdirərək saxlayıblar”. Qadınını əri barəsində isə İnzibati Xətalar Məcəlləsinin 535-ci maddəsi ilə inzibati protokol tərtib edilib.

  • “...bu istiqamətdə əhali arasında ciddi maarifçilik işləri aparılmalıdır”

“Polisə dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə bildirdi ki, öz vəzifəsini yerinə yetirən həkim briqadasına və polisə virusa yoluxan şəxslərin, yaxud onların ailə üzvlərinin müqavimət göstərməsi birbaşa hüquqi məsuliyyət yaradır. Ş.Əliyev vurğuladı ki, virusa yoluxan hər bir xəstə ətrafı və cəmiyyət üçün nə dərəcədə təhlükəli olduğunu dərk etməli və könüllü şəkildə xəstəxanaya getməlidir, əks halda onun davranışları qanunazidd sayılır.

“Bütün hallarda polisin qanuni tələblərinə müqavimət göstərilməsi hüquqi məsuliyyət yaradır. Bu cinayət məsuliyyəti də olar, inzibati məsuliyyət də yarada bilər. Polisə müqavimət göstərən insanlar polisin qanuni fəaliyyət istiqamətlərini dərk etməyən insanlardır. Kimin hansı vəzifə tutmasından asılı olmayaraq, dövlətin qüvvəyə minmiş qanunu var, qanunun tələblərinə tabe olmaq lazımdır. Karantin dövründə də polislərin fəaliyyəti qanunla tənzimlənir. Burada da vətəndaşların karantin rejiminin qaydalarına əməl etməsinə nəzarət yükü daha çox polisin üzərinə düşür. İnsanlar bilməlidirlər ki, polisin tələbi qanuna əsaslanır. Ümumiyyətlə, bu istiqamətdə əhali arasında ciddi maarifçilik işləri aparılmalıdır. İnsanlar maariflənməlidirlər ki, polisin burada heç bir qanunazidd addım atmadığını dərk etsinlər. Virusa yoluxmuş vətəndaşın özünün və yaxınlarının hər hansı formada polisə, yaxud həkimə müqavimət göstərməsi düzgün deyil”.

O vurğuladı ki, polisin fəaliyyətini tənzimləyən “Polis fəaliyyəti haqqında” Qanun, “Əməliyyat-axtarış tədbirləri haqqında” Qanun, ölkənin Konstitusiyası var və eyni zamanda da Nazirlər Kabineti yanında Operativ Qərargahın təlimatları mövcuddur. Ş.Əliyev qeyd etdi ki, bu qərarlar və normativ aktların tələblərinə müvafiq polisin atdığı hər bir addıma vətəndaş tabe olmalıdır, əks təqdirdə bu, məsuliyyət yaradır.    

İradə SARIYEVA

Son xəbərlər