Tamam Cəfərova: “Dövlətin dəstəyini daim öz üzərində hiss edən şirkətlərin borcu dövlətinin yanında olmaqdır”
Məlum olduğu kimi, Bakının Qaradağ rayonunda məcburi köçkünlər üçün salınmış “Qobu Park-3” yaşayış kompleksinin mayın 28-də açılışı olub. Açılış mərasimində Prezident İlham Əliyev iştirak edib.
Prezident qeyd edib ki, yeni salınan qəsəbənin xüsusiyyəti ondan ibarətdir ki, burada bütün işlər özəl sektor tərəfindən görülüb: “Bu da çox sevindirici haldır. Şadam ki, mənim bir neçə il bundan əvvəlki çağırışımdan sonra özəl sektor artıq bu önəmli sosial layihələrə də qoşuldu. O vaxt mən özəl sektoru bu işlərə dəvət etmişdim və şadam ki, mənim çağırışım cavabsız qalmayıb. Bütün tikinti işləri, bütün investisiyalar özəl sektor tərəfindən təmin edilib. Burada xüsusilə “Paşa Holdinq” şirkətinin fəaliyyətini qeyd etmək istəyirəm. Bu şirkət çoxşaxəli fəaliyyətlə məşğuldur. Bu şirkətin bütün dövrlərdə sosialyönümlü layihələri təqdirəlayiqdir. Onu da bildirməliyəm ki, heç bir reklam etmədən, necə deyərlər, özünü tərifləmədən bu işləri ardıcıl şəkildə görür. Bu gün koronavirus şəraitində “Paşa Holdinq” şirkəti və digər özəl şirkətlər ehtiyacı olan insanların yanındadırlar. Bu böyük tikinti layihəsi bir daha onu göstərir ki, biznesin sosial məsuliyyəti artır. Şadam ki, bu təşəbbüsə digər özəl şirkətlər qoşuldu və bu yaxınlıqda digər şirkətlər tərəfindən iki bina tikilir. Ümid edirəm ki, bizim başqa şirkətlərimiz də bu işə qoşulacaqlar. Çünki Azərbaycanda bir çox böyük şirkətlər, holdinqlər var. Onlar Azərbaycanda pul qazanırlar, ölkəmizdə hökm sürən sabitlikdən, biznesə göstərilən dəstəkdən faydalanırlar. Əlbəttə ki, onların sosial məsuliyyəti də lazımi səviyyədə olmalıdır. Ona görə bu yaşayış komplekslərinin tikintisi rəmzi xarakter daşıyır. Birinci növbədə, dövlət öz iradəsini ortaya qoyur. Bildiyiniz kimi, məcburi köçkünlərin problemlərinin həlli Prezident kimi mənim ən başlıca vəzifələrimdən biridir. Digər tərəfdən, özəl sektor artıq sosial məsuliyyət göstərərək belə gözəl imkanlar yaradır”.
Maraqlıdır, ümumən özəl sektorun sosial məsuliyyəti məqbuldurmu? Nəhəng özəl strukturların bu işdə iştirakı qənaətbəxş sayılırmı?
- “…bu tip layihələrdə aktiv olmalarını bir daha tövsiyə etdi”
Millət vəkili Tamam Cəfərova bildirdi ki, Prezident İlham Əliyev "Qobu Park-3” yaşayış kompleksinin açılış mərasimində bir neçə ciddi mesaj səsləndirib. Onlardan biri də özəl sektorun sosial məsuliyyəti ilə bağlıdır: “Prezidentin verdiyi mesajlardan biri də özəl şirkətlərin sosial məsuliyyəti ilə bağlıdır. Dövlət başçısı özəl sektorun bu tip sosial layihələrə qatılmasını təqdir edərək, Azərbaycanda fəaliyyət göstərən, dövlətin imtiyazlarından yararlanan digər özəl şirkətlərə də mesaj verərək, bu tip layihələrdə aktiv olmalarını bir daha tövsiyə etdi. Yəni dövlətin dəstəyini daim öz üzərində hiss edən şirkətlərin borcu dövlətinin yanında olmaqdır. Cənab Prezident digər çıxışlarında ölkədə fəaliyyət göstərən bankların da real sektora maraq göstərməsinin vacibliyinə toxunur. Əgər, sadəcə, istehlak kreditlərinə üstünlük verən banklar real sektora investisiya yatırsalar, bu, minlərlə əlavə iş yerinin açılmasına da xidmət edəcək. Nəticədə cənab Prezidentin hər şeydən üstün tutduğu insan faktoru qazanacaq".
Günel CƏLİLOVA
