12/07/2020 11:05
728 x 90

Ekspertlər Azərbaycanda qaydaların yumşaldılmasını pandemiyanın artım dinamikasına uyğun saymır - ölkə fəlakət həddində...

img

Rəsmi məlumata görə, Azərbaycanda koronavirusa yoluxanların sayı 5 mini ötüb. Gizlin deyil ki, ölkəmizdə qüvvədə olan sərt karantin rejiminin mərhələli şəkildə yumşaldılması prosesindən sonra koronavirus infeksiyasına yoluxanların sayı infeksiyadan müalicə olunaraq sağalanların sayını üstələyib.

Nazirlər Kabineti yanında Operativ Qərargah məlumatına görə, hazırkı dövrədək ölkəmizdə 5 246 nəfərin koronavirus infeksiyasına yoluxması faktı müəyyən edilib, onlardan 3 327 nəfər müalicə olunaraq sağalıb, ümimilikdə 61 nəfər vəfat edib.

Son həftələr ölkəmizdə koronavirus infeksiyasına yoluxanların sayının artması ekspertləri də, ictimiayyəti də ciddi narahat edir. Karantin qaydaları yumşaldıqdan sonra epidemiyaya yoluxanlarının sayının artmasının böyük fəlakətə səbəb ola biləcəyini istisna etməyən ekspertlər hesab edirlər ki, yoluxanların sayının artması yenidən karantin rejiminin sərtləşdirilməsinə ciddi əsaslar verir.

  • İlqar Hüseynli: “...Karantin rejimini sərt formada davam etdirmək daha doğru olardı”

Sosial sahə üzrə tanınmış ekspert İlqar Hüseynli bizimlə söhbətində bildirdi ki, mövcud situasiya çox mübahisəli bir vəziyyətdədir. “Belə götürdükdə, dünyadakı tendensiyalar açılımlara doğru gedir. Bir neçə dövlət artıq iyunun 1-dən hava sərhəddlərinin açılması ilə bağlı qərar verib. Baxmayaraq ki, həmin ölkələrdə hələ də pandemiyanın kökü tam olaraq kəsilməyib. Amma burada insanların məşğulluğunun təmin edilməsi kimi əhəmiyyətli məsələ də var. Eyni zamanda dövlətin və insanların maliyə imkanlarının tükəndiyi bir vaxtda bu prosesə gedilməlidir. Burada parodoksal bir vəziyyət yaranıb. İş yerlərinin, ticarət obyektlərinin, kafe-restoranların, ictimai iaşə yerlərinin açılması prosesi baş verib və insanlar da məcburdur ki, pul qazanıb ailəsini saxlasın. Bu yumşalmaya məcburiyyətdən yaranan bir proses kimi yanaşmaq olar. Başqa bir məsələdə var ki, insanların maddi təminatı yaradılmış olsaydı karantin rejimini daha sərt formada davam etdirmək daha doğru olardı”. 

İ.Hüseynlinin sözlərinə görə,  ölkəmizdə karantin rejimin yumşaldılması vətəndaşlarımızda artıq koronavirusun bitməsi ilə bağlı bir arxayınçılıq yaradıb. “Bu mənada vətəndaşlar sanitar-gigiyena normalarına riayət etmək istəmirlər. Məsələnin problemi tərəfi bundadır. Açılımlar var, proseslər sadələşdirilib, insanların əvvəlki həyat tərzinə qayıdışı ilə bağlı yumşalmalar mövcuddur, amma insanlar da buna adekvat olaraq karantin qaydalarına əməl etməlidirlər”-deyə İ.Hüseynli vurğuladı.

  • Şakir Ağayev: “İnsanların məsuliyyətsizliyi davam edərsə, dövlətin sərt karantin rejiminə keçəcəyi gözləniləndir”

 “Novoe vremya” qəzetinin baş redaktoru, tanınmış siyasi icmalçı Şakir Ağayevin fikrincə, bu olduqca aktual məsələdir və proses daha kəskin xarakter alarsa sərt karantin rejiminin bərpası qaçılmazdır. “Dünyada pandemiyanın kəskin artdığı dövrdə Azərbaycanda həyata keçirilən qabaqlayıcı tədbirlər və sərt karantin rejiminin formalaşdırılması nəticəsində virus ölkəmizdə çox aşağı tempdə idi, iki rəqəmli həddən keçmirdi. Çox təəssüflər olsun ki, yumşalma prosesi tədricən başlayandan sonra virusun yayılması üç rəqəmli həddə çatıb. Dünənki məlumata diqqət yetirsək görərik ki, yoluxanların sayı 250 nəfərdən artıqdır. Bu təbii ki, çox məyus edici haldır. Əvvəlcədən də deyilmişdi ki, qoyulan qaydalara əməl edilməzsə bu xəstəliyə daha çox insan yoluxa, nəticə daha kəskin ola bilər. Düzdür, sağalanların da sayı çoxalır. Xəstələrin sayının hazırda artmasını indiki dövrlə müqayisədə əvvəllər testin az aparılması ilə əlaqələndirirlər. İndi isə test çox aparılır. Amma məsələnin hansı formada olmasından asılı olmayaraq virusa tutulanların sayının 5 mini keçməyi ürəkaçan məsələ deyil. İlk növbədə buna səbəb insanların pandemiyanı ciddi qəbul etməməsi və xəstəliyə məsuliyyətsiz yanaşmasıdır. Bilirsiz, dövlətin karantin rejimini mərhələli şəkildə yumşaltmasının həm sosial-iqtisadi, maliyə, həm də mənəvi-psixoloji tərəfləri var. Təbii ki, üç-dörd ay insanları evdə saxlamaq insanların və dövlətin özü üçün sosial-iqtisadi, maliyə cəhətdən çox çətin idi. Qeyd etdiyim kimi burada insanların mənəvi-psixoloji məsələsi də vardı. Buna görə də, Azərbaycan dövlətinin həyata keçirdiyi qabaqlayıcı tədbirlər nəticəsində xəstəliyin tempinin aşağı  düşməsi prosesini təəssüf ki, insanlar düzgün qiymətləndirə bilmədilər. İnsanların xeyli bir hissəsi dövlətin qoyduğu qaydalara tam riayət etmir və da belə bir vəziyyətə gətib çıxarıb. Təbii ki, vətəndaşların məsuliyyətsizliyi dövləti yenidən karantin rejimini sərtləşdirməyə vadar edə bilər. İnsanların məsuliyyətsizliyi davam edərsə, dövlətin sərt karantin rejiminə keçəcəyi gözləniləndir. Hesab edirəm ki, aidiyyatı qurumlar prosesə nəzarət edərək hesablamalar aparır və buna uyğun da addımlar atılacaq”-deyə Ş.Ağayev bildirdi.

Ekspert qeyd etdi ki, əvvəllər gün ərzində 1000 test aparılırdısa indi 4 mindən artıq test aparılır və bu da xəstələrinin sayının üzə çıxmasına səbəb olur. Ş.Ağayevin fikrincə, vətəndaşlar yumşalma prosesindən sui-istifadə etməməli və virusa ciddi yanaşmalıdırlar.

İradə SARIYEVA

Son xəbərlər