Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib.
Brifinqdə Nazirlər Kabinetinin Mətbuat xidmətinin rəhbəri İbrahim Məmmədov və Tibbi Ərazi Bölmələrini İdarəetmə Birliyinin (TƏBİB) sədri Ramin Bayramlı iştirak ediblər.
Yoluxmanın artdığı bölgə qapadıla bilər
İ.Məmmədov deyib ki, karantin rejiminin tələblərinə nəzarət ciddi olacaq. Belə ki, qoruyucu tibbi maskaların istifadəsi məcburi və mütləq sayılır. Hökumət rəsmisi bildirib ki, bununla bağlı müvafiq qərar imzalanıb: "Qaydalara əməl etməyənlər cərimələnəcək. Sərbəstlik artdıqca məsuliyyət artacaq. Cəzalar da sərtləşəcək. Cəzanın miqdarı hələ dəqiqləşməyib. Məsələ ilə bağlı sənəd parlamentə təqdim olunacaq. Cərimələrdən qaçmaq mümkün olmayacaq".
O qeyd edib ki, hansı rayonda yoluxma artsa, həmin bölgə qapadıla bilər və orada daha güclü karantin rejiminin tətbiq olunması mümkündür: "Ölkədə selektiv yanaşma metodu tətbiq edilə bilər. Bununla bağlı ərazilər nəzarətdə saxlanılır. Məsələn, hansısa rayonda kütləvi yoluxma aşkarlanarsa, orada xüsusi ocağın olduğu müəyyən edilsə, həmin rayon və ya şəhərə giriş-çıxış yasaqlanacaq".
Karantin qaydalarının pozulmasına görə cərimələrin məbləği müzakirə edilir
İ.Məmmədov deyib ki, məhdudiyyətlərin bir qismi aradan qaldırılsa da, bəziləri hələ də qalmaqdadır. Bakı, Sumqayıt, Abşeron, Gəncə və Lənkəranda işçilər 100 faiz işə qaytarılır. Amma vətəndaşlar ehtiyatlı olmalıdırlar. Karantin rejimində iqtisadi artımlılıq bərpa olunsa da, paralel olaraq özümüzü qorumalıyıq.
Onun sözlərinə görə, karantin rejiminin tələblərinə qapalı yerlərdə, ictimai-iaşə və xidmət obyektlərində ciddi nəzarət ediləcək: "Bununla bağlı Nazirlər Kabineti yeni qərar imzalayıb. Xüsusi karantin qaydalarını pozmaq inzibati məsuliyyətdir. Hələlik bununla bağlı cərimələrin məbləği müzakirə edilir".
Ölkə daxilində və beynəlxalq uçuşlar...
İ.Məmmədov deyib ki, ölkə daxilində uçuşlar bərpa edilərsə, bu prosesə xüsusi nəzarət olunacaq. Onun sözlərinə görə, hələlik dövlət sərhədindən giriş-çıxış iyunun 15-dək qadağandır: "Əgər beynəlxalq uçuşlar bərpa olunarsa, bu məsələyə nəzarət ediləcək. Bununla yanaşı, xarici ölkələrdə aparılan koronavirus testlərin nəticələri başqa ölkədə tanınacaq. Yəni, əgər Azərbaycanda hansısa şəxs test edilibsə və onda koronavirus aşkarlanıbsa, həmin testin nəticələri başqa ölkələrdə də tanınacaq. O cümlədən, başqa ölkələrdə edilən testin nəticələri də Azərbaycanda qəbul ediləcək".
Aktiv xəstələr və ağır vəziyyətdə olanların sayı artıb
Ramin Bayramlı isə bildirib ki, ölkədə aktiv koronavirus xəstələrinin sayı ilə yanaşı, ağır vəziyyətdə olanların da sayı artıb. Onun sözlərinə görə, bayram həftəsinin olmasına baxmayaraq, Operativ Qərargahın tibbi bölməsi əks-epidemik istiqamətdə fəaliyyətini fasiləsiz olaraq davam etdirib.
R.Bayramlı qeyd edib ki, bu gün ilk dəfə olaraq, 200-dən çox insanda koronavirus aşkarlanıb. Artıq daha çox hədəf qrupları üzərində testin aparılmasına üstünlük verilir: "Hazırda 22 xəstəxanada 1 806 aktiv xəstə müalicə edilir. Yoluxma sayı həftələr üzrə artan istiqamətdə qeydə alınıb. 18-24 may tarixlərində 848 nəfərdə, ondan əvvəlki həftə ərzində isə 755 nəfərdə koronavirus xəstəliyi aşkarlanıb”.
Koronavirusun daha çox aşkarlandığı şəhər, rayon və kəndlər…
TƏBİB sədrinin sözlərinə görə, ümumi yoluxmaların 47 faizi Bakının payına düşür. Onun sözlərinə görə, yoluxma göstəricisi Gəncə-Qzax bölgəsində 13,6 faiz, Aran rayonlarında 11,1 faiz, Abşeronda isə 9,2 faizdir. Digər bölgələrdə yoluxma göstəricisi təxminən 5 faizdən aşağıdır: “Son günlər ərzində yoluxma tempinin yüksək olduğu ərazilər adlarını qeyd etdiyim rayon və şəhərlərdir. Bu rayonların bəzilərində bir neçə kənddə xüsusi yoluxma halları qeydə alınır.
R. Bayramlı nəzərə çatdırıb ki, Gəncədə 481, Masallıda 47, Xaçmazda 31 nəfərin koronavirusa yoluxması aşkar olunub. Masallının Əlişan kəndində 12 nəfər, Xaçmazın Köhnə Xaçmaz kəndində 12, Beyləqanın Şahsevən kəndində 5 nəfər koronavirusa yoluxub. Salyan, Cəlilabad, Yevlax və Kürdəmirdə yoluxma yüksək səviyyədədir. Kürdəmirin Sığırlı kəndində 31 nəfərdə yoluxma aşkarlanıb.
Bakı şəhəri üzrə ümumi yoluxma sayı üstünlük təşkil edir. Paytaxtın Yasamal rayonunda yoluxma göstəricisi 14,5 faiz, Nəsimidə 13 faiz, Binəqədidə 11,1 faizi , 10 Xətaidə 10 faiz, Qaradağda 7 faiz, Nizami rayonunda isə 5,9 faiz müşahidə edilib".
O əlavə edib ki, məhdudiyyətlərin tətbiq olunmağa başlanıldığı aprel ayının əvvəlində xəstə sayında azalma müşahidə edildi. Amma məhdudiyyətlərin aradan qaldırıldığı vaxtdan etibarən xəstələrin sayında artım baş verir: “Vətəndaşlarımızın qaydalara əməl etməməsi nəticəsində yoluxma sayında artım müşahidə edilir. İnfeksiyanı məhdudlaşdırmaq istəyiriksə, ya sərt karantin rejimi olmalıdır, ya da qaydalara əməl edilməlidir. Bütün dünyada olduğu kimi, biz də ikinci yolu seçməliyik. Lakin bu qaydalara əməl etməyi özümüzə aşılamalıyıq”.
R.Bayramlı qeyd edib ki, qaydalara əməl edilməməsi nəticəsində ölkədə virusa yoluxanların sayı sağalanların sayından çoxdur. Həmçinin ağır xəstələrin sayının artmasına baxmayaraq, vəfat edənlərin sayında ciddi artım müşahidə edilmir.
Bəzi obyektlərin açılması heç də epidemioloji vəziyyətin ürəkaçan olması ilə bağlı deyil
TƏBİB sədrinin sözlərinə görə, bəzi obyektlərin açılmasının səbəbi heç də epidemioloji vəziyyətin ürəkaçan olması ilə bağlı deyil. Onun sözlərinə görə, obyektlərin açılması barədə qərar verilərkən Ümumdünya Səhiyyə Təşkilatının tövsiyələri və dünya ölkələrinin təcrübələri nəzərə alınır.
R.Bayramlı bildirib ki, maskalara tələbat artacaq. Ölkədə istehsal edilən və satılan maska sayı kifayət qədərdir: “Amma maskaya tələbat artarsa, onun evdə hazırlanması ilə bağlı təlimat var. Bu qaydaları öyrənərək evdə maska hazırlana bilər və bunun üçün bəhanələr gətirilməməlidir”.
Daxili uçuşlar iyunun 8-dən bərpa ediləcək…
R.Bayramlı deyib ki, iyunun 8-dən sonra ölkə daxilində daxili uçuşların bərpası gözlənilir. Onun sözlərinə görə, istər daxili, istər beynəlxalq ucuşların sayında azalma olacaq. Təyyarələrdə sərnişinlərin sayında azalma olacaq. Bu da təyyarə sərnişinlərinin və ekipajın təhıükəsizliyinin qorunması üçündür.
“Sədərək” ticarət mərkəzinin doğurduğu narahatlıq...
R.Bayramlı əlavə edib ki, karantin tədbirlərinin yenidən sərtləşdirilməsi arzuedilən deyil. Amma epidemioloji vəziyyət yenidən bu barədə qərarın qəbul edilməsini zəruri edə bilər.
TƏBİB sədri əlavə edib ki, qapalı idman müəssisələrinin açılması da yaxın günlərdə gözlənilmir: “Bizi narahat edən məsələlərdən biri “Sədərək” ticarət mərkəzi ilə bağlıdır. Burada xidmət göstərənlər qaydalara ciddi əməl etməlidirlər".
Kafe və restoranlarda açıq bufetdən istifadə qadağası...
TƏBİB sədri deyib ki, kafe və restoranlarda açıq bufetdən istifadə etmək qəti qadağan edilir. Onun sözlərinə görə, kafe və restoranlarda masa arxasında olarkən maskadan istifadə etməmək olar, bütün digər hallarda maskadan istifadə olunmalıdır. İnsanlar restorandan çıxıb geri qayıtdıqdan sonra əllərini yumalıdırlar.
Metodiki tövsiyələrə əməl etməyən marketlər var...
Əksər marketlərdə metodiki tövsiyələrə əməl edilmədiyini deyən R.Bayramlının sözlərinə görə, bu müəssisələr xüsusi nəzarətə götürüləcək: “Biz bununla bağlı onlara müraciət edirik və qaydalara əməl etməyə çağırırıq. Əks halda, belə müəssisələrin sahibləri barəsində tədbir görüləcək”.
Yas mərasimləri yoluxanların sayını kütləvi şəkildə artırır...
R.Bayramlı qeyd edib ki, aparılan analizlər göstəririr ki, yoluxmaların çoxu yas mərasimlərində olur. Onun sözlərinə görə, yaslarda insanların, xüsusilə qadınların bir yerdə toplaşması yoluxanların sayını kütləvi şəkildə artmasına səbəb olur: “Bu, bizi narahat edir. Vətəndaşları diqqəti və məsuliyyətli olmağa çağırırıq”.
Həftə sonları xüsusi karantin rejimi tətbiq edilə bilər
R.Bayramlı bildirib ki, həftənin şənbə və bazar günlərində xüsusi karantin rejiminin tətbiq edilməsi mümkün ola bilər. O bildirib ki, bununa bağlı xüsusi alqoritmlər də var: "Epidemioloji vəziyyətdən asılı olaraq, növbəti günlərdə həftə sonları və iyun ayında olacaq bayram günləri ərzində ümumi qapanışa gedə bilərik".
Çarpayı fondu - 5 mindən 7 minə çatdırılacaq
“Çarpayı fondunun doluluq nisbətinə baxılsa, hələ çarpayı fondu ilə bağlı imkanlarımız var. Amma səhiyyə mütəxəssisələrinin tibb müəssisələrinə arasında paylaşdırılması bizim üçün yükdür” deyən TƏBİB sədrinin sözlərinə görə, koronaviruslu xəstələrin müalicəsi üçün müəyyən edilən xüsusi xəstəxanalarda 5000-dən artıq çaprayı ayrılıb: “İki minə yaxın çarpayı fondu modul tipli xəstəxanalarda olacaq. Bununla da, ümumilikdə 7 mindən çox çarpayı fondu olacaq”.
Toyların keçirilməsi yenə risqli sayıldı
İbrahim Məmmədov isə bildirib ki, sərbəstlik artdıqca koronavirusa yoluxanların sayı artır. Buna görə də toy mərasimlərinin keçirilməsinə başlamaq hələlik mümkün deyil. Onun sözlərinə görə, yoluxmaların sayı artmasaydı, toylar mərasimlərinə icazə verilə bilərdi: "Amma bu gün 230 yoluxma qeydə alınıb. Buna görə də toylara icazə verilməsi risqdir. Əgər yoluxma sayı azalarsa, bu məsələyə baxıla bilər".
İşsizlərə birdəfəlik ödəmə gələn ay da verilə bilər…
İ.Məmmədov bildirib ki, gələn ay da işsizlərə birdəfəlik ödəmənin verilməsi məsələsi Nazirlər Kabinetində müzakirə edilir. Onun sözlərinə görə, ilkin olaraq 190 manat işsizlik müavinəti aprel və may ayları üçün nəzərdə tutulub. Amma karantin rejimi iyun ayının 15-dək uzadılıb. Ona görə də bu məsələ ilə bağlı Nazirlər Kabineti müəyyən qərar verəcək.
