11/07/2020 02:10
728 x 90

Maska taxmayanlarla polisin davranışlarına birmənalı geniş ictimai dəstək...

Mais Ağayev: “Yerli polis orqanının əməkdaşları və nəqliyyat könüllüləri maskadan istifadə etməyən vətəndaşlara tibbi maskalar paylayıblar”

img

Paytaxtda sərnişindaşımada xüsusi karantin rejimi qaydalarının qorunması ilə bağlı polis tərəfindən tədbirlər gücləndirilib. May ayının əvvəlindən etibarən dayanacaqlarda növbə çəkən polis əməkdaşları avtobuslara daxil olur, maska taxmayan sərnişinləri avtobusdan düşürərək tibbi maska taxmağı tələb edirlər.

Sərnişinlərin avtobusa maskasız daxil olmasına göz yuman avtobus sürücüləri isə polis əməkdaşları tərəfindən təlimatlandırılırlar. Tibbi maskasız sərnişinlərin avtobusa minməsinə icazə verilməməli olduğu barədə sürücülərə məlumat verilir. Tibbi maskadan istifadə etməyən sərnişinlərə isə qarşıdakı postlarda cərimə olunacaqlarına dair xəbərdarlıq edilir.

Artıq avtobuslarda sərnişinlərin tibbi maska taxması ilə bağlı reydlər keçirilir. Belə ki, mayın 26-da Bakıda Nərimanov Rayon Polis İdarəsinin əməkdaşları maska taxmayan şəxslərə qarşı reyd keçiriblər. Reyd zamanı belə şəxslər avtobuslardan düşürülüblər. Onların temperaturu ölçülüb və maska paylanıb. Dayanacaqlardakı sərnişinlərə də maskalar paylanıb.

Maska taxmayan şəxslərə qarşı polisin məlum davranışı ekspertlər tərəfindən xoş qarşılanır. Bütün dünyanı təşvişə salan koronavirus pandemiyasına qalib gəlmək üçün qapalı məkanlarda hər kəsin tibbi maska taxması zəruridir. Bu səbəbdən də avtobusdan istifadə edənlər tibbi maska taxmalıdırlar. 

  • “Tibbi maska taxmayan sərnişinlərin "Koroğlu" Nəqliyyat Mübadilə Mərkəzinə girişinə, oradakı xidmətlərdən istifadəsinə də icazə verilməyəcək”

Bakı Nəqliyyat Agentliyinin (BNA) mətbuat katibi Mais Ağayev bildirdi ki, tibbi maska taxmayan sərnişinlərin "Koroğlu" Nəqliyyat Mübadilə Mərkəzinə girişinə, oradakı xidmətlərdən istifadəsinə də icazə verilməyəcək: “Artıq vətəndaşların koronavirus infeksiyasının profilaktikasına dair qaydalara riayət etməsi üçün Bakı Nəqliyyat Agentliyi və Bakı Şəhər Baş Polis İdarəsi birgə tədbirlərə başlayıb. Bu çərçivədə ilk tədbir "Koroğlu" Nəqliyyat Mübadilə Mərkəzində keçirilib. Yerli polis orqanının əməkdaşları və nəqliyyat könüllüləri maskadan istifadə etməyən vətəndaşlara tibbi maskalar paylayıblar. Maarifləndirici söhbətlər aparılıb və sanitar rejimin tələbləri izah edilib. İnsanlarla təmas zamanı ikimetrlik məsafənin qorunması və tibbi maskalardan istifadənin zəruri olduğu onların diqqətinə çatdırılıb. Bildirilib ki, pandemiya dövründə sərnişinlərin Nəqliyyat Mübadilə mərkəzlərinin ərazisində, dayanacaqlarda, avtobuslarda qoruyucu maskalardan istifadəsi və sosial məsafəni gözləməsi mütləqdir. Analoji tədbir, mütəmadi olaraq, insanların daha çox istifadə etdiyi avtobus dayanacaqları və digər ərazilərdə də keçiriləcək. Tədbirlərdə Daxili İşlər Nazirliyi Daxili Qoşunlarının əməkdaşları da iştirak edirlər. Məlumat üçün bildirim ki, ictimai nəqliyyatda koronavirus infeksiyasının profilaktikasına dair tədbirlər çərçivəsində sərnişin avtobuslarının üzərindəki reklam yerlərində və salonunda sosial izolyasiya qaydalarını təşviq edən lövhələr də yerləşdirilib".

M.Ağayev onu da əlavə etdi ki, aksiya çərçivəsində gün ərzində sərnişinlərə 1000-2000 tibbi maska paylanıb: "Bəzən sərnişinə maska verdikdə onu yenidən cibinə qoyur. Bu cür biganə münasibətlər var. Amma sevindirici haldır ki, bu cür hallar çox deyil. İctimai nəqliyyat ümumi istifadədə olan nəqliyyat vasitəsidir. Burada tələblərə əməl etmək sərnişinlərin hər birinin borcudur.

Günel CƏLİLOVA

Son xəbərlər