Son illər ölkəmizin müxtəlif sahələrində avtomobil parkının yenilənməsi, köhnəlmiş, istismar müddətini başa vurmuş avtomobillərin daha müasir nəqliyyat vasitələri ilə əvəzlənməsi tendensiyası başlanıb. Burada təcili tibbi yardım parkının yenilənməsinə də xüsusi əhəmiyyət verilir.
Bildiyimiz kimi, Prezident İlham Əliyev və birinci xanım Mehriban Əliyeva mayın 25-də Şamaxı rayonunda olublar. Burada onlar, həmçinin, Şamaxı rayonuna ayrılan nəqliyyat vasitələri və xüsusi texnikalara baxıblar.
Bir sıra sahələrdə, o cümlədən, şəhər təsərrüfatı, kommunal, səyyar tibbi və digər sahələrdə xidmətin keyfiyyətini yaxşılaşdırmaq üçün Prezident İlham Əliyevin sərəncamına uyğun olaraq, Şamaxı rayonuna çoxlu sayda nəqliyyat vasitəsi və xüsusi texnika ayrılıb.
Nəqliyyat vasitələri ilə tanış olan Prezident İlham Əliyev ölkəmizin başqa şəhərlərinin də belə texnika və nəqliyyat vasitələri ilə təchizatını təşkil etmək üçün təkliflər hazırlanması barədə tapşırıq verib. “Avtobuslar gərək bu gündən xətlərə çıxsın. Ondan sonra təcili tibbi yardım maşınları. Şamaxı rayonunun təchizatı ilə bağlı görülən işlər indiki mərhələdə kifayətdir. Həm Prezidentin ehtiyat fonundan, həm də dövlət büdcəsindən vəsait ayrıldı. Gərək biz, prinsipcə, bütün şəhərlərimizdə texnika ilə təchizatı yüksək səviyyəyə qaldıraq. Bu baxımdan Şamaxı birinci şəhərdir. Mən demişəm, digər şəhərlərdə, bir çox yerlərdə şəhər nəqliyyatı bərbad vəziyyətdədir. Kommunal texnikanın çatışmazlığı problemlər yaradır, təkliflər hazırlayın, bizim bütün şəhərlərimizdə müasir texnika təchizatı təmin edilməlidir - həm sərnişin nəqliyyatı, kommunal texnika, həm də təcili tibbi yardım maşınları. Bakı şəhərində bu, öz həllini tapıb. Baxmayaraq ki, Bakıda da hələ köhnədən qalan avtobuslar var, onlar da yavaş-yavaş yeniləri ilə əvəzlənir. Bir çox şəhərlərə təcili tibbi yardım maşınlarının göndərilməsi təmin edilmişdir. Ancaq vaxt keçir, onların da istismar müddəti başa çatır, sıradan çıxır, qəzaya uğrayır. İndi Şamaxı rayonunun timsalında biz, prinsipcə, görürük ki, əhalini nəzərə alaraq, nə qədər texnika lazımdır. Ona görə digər rayonlarda da nə qədər texnika lazımdır, biz bunları kompleks şəkildə, tədricən həll edək”.
Prezident İlham Əliyev, həmçinin, qeyd edib ki, o, Şamaxı şəhərinin avtomobil yollarının da təmiri ilə bağlı tədbirlərin görülməsi barədə göstəriş verib: “Kənd yollarının bir çoxu asfaltlanıb, hətta ucqar kəndlərə də asfalt yollar çəkilib. Amma şəhər yolları o qədər də yaxşı vəziyyətdə deyil. Ona görə də həm kənd yollarının çəkilişinin davam etdirilməsi, eyni zamanda, Şamaxı şəhərinin yol infrastrukturunun müasirləşməsi ilə əlaqədar əlavə tədbirlər görülməlidir. Dayanacaqlar da pis vəziyyətdədir. Ona görə bu yeni texnika bütün şəhər infrastrukturunun müasirləşməsinə xidmət göstərəcək. Əsas məsələ insanların sağlamlığı və təhlükəsizliyidir. Bu müasir təcili tibbi yardım maşınları hər yerdə lazımdır, özü də ən aparıcı şirkətlərin istehsalıdır. Əlbəttə ki, yeni avtobuslar həm rahatlıq gətirəcək, həm də təhlükəsizlik baxımından çox vacibdir”.
Nəqliyyat üzrə tanınmış ekspert Azər Allahverənov baki-xeber.com-a bildirdi ki, bölgələrin nəqliyyat - abtobus, xüsusən də gecə-gündüz yorulmadan insanların xidmətində duran təcili tibbi yardım avtomobil parkının yenilənməsinin əhəmiyyəti böyükdür. A.Allahverənovun sözlərinə görə, təcili tibbi yardım parkı müasir tələblərə cavab verən və olduqca təhlükəsiz hesab edilən nəqliyyat vasitələri ilə təchiz olunur, bunda da başlıca səbəb, məqsəd bölgələrdə yaşayan insanların sağlamlığının təmin olunmasıdır. “Burada məqsəd bölgələrdə yaşayan insanların sağlamlığının, təhlükəsizliyinin maksimum təmin edilməsi məsələləridir. Biz həmişə avtomobil parkının yenilənməsi barədə danışanda xüsusilə burada insan rahatlığının, təhlükəsizliyinin təmin olunduğunu vurğulayırıq. Çünki burada söhbət yenilənən ictimai nəqliyyat və təcili tibbi yardım parkından gedir. Biz hər zaman təəssüflə qeyd edirdik ki, bu istiqamətdə yenilənmə daha çox paytaxt Bakı ilə bağlı olur, bölgələrdə isə vəziyyət acınacaqlıdır. Amma Şamaxı rayonunda gerçəkləşdirilən bu məsələ, xüsusilə də Şamaxı rayon təcili tibbi yardım avtomobilləri parkının dünyanın aparıcı şirkətlərinin istehsalı olan, müasir tələblərə cavab verən təcili tibbi yardım maşınları ilə təchiz olunması və bu avtomobillərin insanların ixtiyarına verilməsi olduqca vacib bir hadisədir. 3 təcili yardım və reanimasiya maşını verilib. Sevindirici haldır ki, artıq bu proses bölgələrdə də başlayıb. Şamaxı bu prosesin başlandığı ilk rayonlardandır. Burada, qeyd etdiyimiz kimi, yalnız təcili tibbi yardım parkı deyil, həmçinin, bütövlükdə nəqliyyat sektorunun yenilənməsindən söhbət gedir. Təhlükəsiz daşınma üçün nəzərdə tutulan avtobusların Şamaxı şəhər sakinlərinin istifadəsinə verilməsi, təbii ki, müsbət haldır. Əminəm ki, bu proses davam edəcək, biz digər bölgələrdə də istər təcili tibbi yardım avtomobil parkının, istərsə də ictimai nəqliyyat parkının yenilənməsinin şahidi olacağıq”.
A.Allahverənovun vurğuladığına görə, Prezident İlham Əliyev çıxışında qeyd edib ki, Şamaxı və ümumilikdə, o bölgə turizmin inkişaf etdiyi yerdir, çox intensiv şəkildə nəqliyyat vasitələrinin mübadiləsi baş verir, bu baxımdan həm yolların, həm də nəqliyyat vasitələrinin tələblərə cavab verməsi vacibdir. “Burada söhbət ondan gedir ki, həm Şamaxının özündə ictimai nəqliyyat sektoru kifayət qədər avtomobil və avtobus parkına malik olsun. Eyni zamanda, insanların sağlamlığının qorunması sahəsində fəaliyyət göstərən qurumların da maddi-texniki təchizatı məsələlərinə diqqət yetirilsin. Bu baxımdan, Şamaxıda müasir tələblərə cavab verən təcili tibbi yardım avtomobillərinin istifadəyə verilməsi çox əhəmiyyətli məsələdir. Çünki bilirik ki, bölgələrdə istifadədə olan təcili tibbi yardım avtomobillərinin çoxu uzun illərdir istismar olunan avtomobillərin siyahısındadır. Şamaxıdakı kimi, digər rayonların da təcili tibbi yardım avtomobilləri parkının yenilənməsinə ciddi ehtiyac var və düşünürəm ki, tezliklə başqa rayonlarımızda bu müsbət dəyişikliyin şahidi olacağıq. Pandemiya ilə mübarizə dövründə cənab Prezident öz çıxışlarında bir neçə dəfə xüsusi diqqət yetirib ki, bizim üçün önəmli olan vətəndaşlarımızın sağlamlığıdır, onların tibbi təhlükəsizliyi məsələsidir və bu gün bütün resurslar insanların sağlamlığının müdafiəsinə yönəldilib.
Yəni əsas məsələ insanları təhlükələrdən qorumaq, onları sığortalamaqdır. Bu bir neçə aspektdə həyata keçirilən siyasətdirsə, onlardan biri də maddi-texniki baza, texniki təchizat, onların elementləri və seqmentləri məsələsidir. Bu baxımdan təcili tibbi yardım maşınlarının istifadəyə verilməsi çox vacibdir. Bunun da önündə duran məqsəd ölkə əhalisinin sağlamlığını, tibbi təhlükəsizliyini təmin etməkdir. Müasir tələblərə cavab verən və texniki cəhətdən kifayət qədər yüksək təchiz edilmiş təcili tibbi yardım maşınlarının istifadədə olması mümkün risqləri zəiflətmiş olur və göstərilən təcili yardım xidmətinin keyfiyyətini artırır. Burada çox vacib iki nüans var. Biri risqin azaldılması, o biri isə keyfiyyəti artırmaqdır. Hesab edirəm ki, bu çox vacib məsələdir və bu siyasətin digər bölgələrimizdə də davam etdiriləcəyinə əminəm” - deyə A.Allahverənov qeyd etdi.
İradə SARIYEVA
