15/07/2020 05:04
728 x 90

Pandemiyadan sonra turizmin bərpasının iki mərhələsi...

Ruslan Quliyev: “Yeni turizm zonalarının yaradılması, bura xarici investorların cəlb edilməsi üçün münbit şərait olmalıdır”

img

Dünya miqyasında koronavirus pandemiyasından ən çox zərər çəkmiş sahələrin siyahısına turizm, hotelçilik və restoran biznesi başçılıq edir. Dünya turizm bazarında müşahidə olunan böhran, təbii olaraq, Azərbaycanın turizminə də təsir göstərib. Virus yayıldığı ilk gündən Avropada turizm sahəsinə təxminən bir milyard avro dəyərində zərər dəyib.

Ekspertlər hesab edirlər ki, son günlər ölkəmizdə koronavirusa yoluxma və sağalma rəqəmlərindəki müsbət nəticələr isə turizmlə bağlı ümidverici proqnozlar verməyə əsas verir.

Dövlət Turizm Agentliyinin media və ictimaiyyətlə əlaqələr sektorunun müdiri Kənan Quluzadə pandemiyadan sonra ölkə turizminin bərpasının mərhələli şəkildə həyata keçiriləcəyini deyib.

Sektor müdiri hazırda əsas prioritetin daxili turizmin inkişafı olduğunu və bu istiqamətdə xüsusi kampaniyaların keçiriləcəyini bildirib.

  • “Postpandemiya dönəmində qonşu dövlətlər ölkəmiz üçün əla bazar rolu oynaya bilər”

Azərbaycan Sağlamlıq və Termal Turizmə Dəstək Assosiasiyasının rəhbəri Ruslan Quliyev hesab edir ki, turizmin antiböhran konsepsiyası qəbul olunan zaman, ilk növbədə, turizmə dəstək fondları yaradılmalıdır. Bu zaman gənclərin yeni təklifləri və startuplarının  tətbiq olunması nəzərə alınmalıdır: “Dövlətin təşviq konsepsiyası dərinləşdirilməlidir. Bu gün özəl sektorda sahibkarlara dəstək həyata keçirilir. Ancaq bunu daha da dərinləşdirmək lazımdır. Hesab edirəm ki, təşviq yanaşması davamlı olsa, o zaman vergi dərəcələrinin aşağı salınmasına o qədər də ehtiyac olmaz”.

İkinci vacib məsələnin azad iqtisadi zonalarla bağlı olduğunu deyən mütəxəssis hesab edir ki, yeni turizm zonalarının yaradılması, bura xarici investorların cəlb edilməsi üçün münbit şərait olmalıdır. Yəni bir ay ərzində onlar bütün prosedurları həyata keçirib investisiyaların yatırılmasına şərait yarada bilərlər: “Üçüncü ən aktual məsələ isə Azərbaycanda dünya bazarlarına çıxarıla biləcək rəqabətqabiliyyətli məhsulların təklifində maya dəyərinə təsir edəcək amillər var ki, biz bu məsələləri komissiyalarda və ictimai şuralarda müzakirə edirik”.

Həmsöhbətimizin sözlərin görə, biz yeni il qabağı, qış turizminə qədər hazırlıqları həyata keçirə bilsək, 2021-ci il üçün ciddi addımlar atmış olacağıq. Çünki postpandemiya dönəmində qonşu dövlətlər ölkəmiz üçün əla bazar rolu oynaya bilər. Hazırda Şahdağ və Tufandağ kimi qış turizm məkanlarının fəaliyyəti regionda önəmli rol oynayır.

Günel CƏLİLOVA

Son xəbərlər