Məlum olduğu kimi, Prezident İlham Əliyev Şamaxıda səfərdə olub. Dövlət başçısı Şamaxıda olarkən bir çox məsələyə toxunub. O cümlədən, qeyd edib ki, şəhər nəqliyyatında problemlər mövcuddur: “Mən demişəm, digər şəhərlərdə, bir çox yerlərdə şəhər nəqliyyatı bərbad vəziyyətdədir. Kommunal texnikanın çatışmazlığı problemlər yaradır, təkliflər hazırlayın, bizim bütün şəhərlərimizdə müasir texnika təchizatı təmin edilməlidir - həm sərnişin nəqliyyatı, kommunal texnika, həm də təcili tibbi yardım maşınları. Bakı şəhərində bu, öz həllini tapıb”.
Prezident daha sonra bildirib: “Baxmayaraq ki, Bakıda da hələ köhnədən qalan avtobuslar var, onlar da yavaş-yavaş yeniləri ilə əvəzlənir”.
Nəqliyyat sahəsi üzrə ekspert Rauf Ağamirzəyev bildirdi ki, şəhərin mərkəzində avtobus parkı yenilənib və vəziyyət qənaətbəxşdir: "Şəhərətrafı ərazilərdə isə avtobus parkının yenilənməsinə ehtiyac var. Xüsusən də böyük qəsəbələrdə marşrutların vəziyyəti o qədər də ürəkaçan deyil. Problemin həlli ilə bağlı BNA tərəfindən Bakıətrafı kənd və qəsəbələr üçün 115 kiçiktutumlu avtobusun gətirilməsi nəzərdə tutulur. Bu addım avtobus parkının yenilənməsinə və artmasına müsbət təsir göstərəcək. Həmçinin, infrastruktur parametrlərinə uyğun avtobusların gətirilməsi əsas hədəfdir. 18 və 12 metrlik iritutumlu avtobusların kənd və qəsəbələrdə manevr etmək imkanları məhdud olduğundan, 9 metrlik kiçiktutumlu avtobusların gətirilməsi məqsədəuyğundur. Buna görə də yeni avtobusların gətirilməsi problemi həll edəcək".
Şəhərətrafı ərazilərdə və qəsəbələrdə sıxlıq probleminə də toxunan ekspert bildirdi ki, avtobusların normal hərəkətinin təmin olunması üçün xüsusi zolaqların yaradılmasına ehtiyac var: "Avtobus zolağının olması avtobusların hərəkət intervalında problemin yaranmasının qarşısını ala və sıxlıq olduqda belə, avtobusun öz zolağı ilə hərəkət etməsini təmin edə bilər. Digər məsələ isə odur ki, nəqliyyat növləri arasında inteqrasiya zəifdir və ictimai nəqliyyatın yükünün qismən paylaşdırılmasına ehtiyac var. Bu baxımdan avtobus, elektrik qatarı və metronun paralel fəaliyyət göstərməsi üçün multimodal habların tez zamanda tikilib istifadəyə verilməsinə ehtiyac var".
Günel CƏLİLOVA
