09/08/2020 23:55
728 x 90

Karantin dövrü, tələbələr Bakıda yox – kirayə mənzillərin bahalaşmasının “müəmmalı” səbəbi…

img

Koronavirus pandemiyası fonunda Bakıda mənzil, xüsusilə də kirayə bazarının aktivliyi sıfıra yaxınlaşıb. Aparılan monitorinqlərin nəticəsinə əsasən, Bakıda kirayə mənzil bazarında durğunluq yaşanır. Pandemiya dövrü ilə əlaqədar olaraq paytaxt ərazisində icarəyə verilən mənzillərin sayı azalıb.

Məlumdur ki, Bakıda kirayə mənzillərdə qalan əksər tələbə hazırda mövcud vəziyyətlə əlaqədar rayonlara geri dönüb. Həmçinin, karantinlə bağlı müvəqqəti iş yeri bağlananlar da rayona qayıdıblar.

Kirayə mənzil bazarında durğunluq yaşanmasına baxmayaraq, son zamanlar Bakıda icarəyə verilən evlərin qiyməti bahalaşıb. Maraqlıdır, tələbələr Bakıda olmadığı bir vaxtda mənzillərin kirayə qiyməti nə səbəbdən yüksəlib?

  • Nüsrət İbrahimli: “Kirayə mənzillərin qiymətinin bahalaşmasının səbəbi koronavirus pandemiyası ilə əlaqədar təklif portfelinin azalmasıdır”

Məsələ ilə bağlı fikir bildirən daşınmaz əmlak məsələləri üzrə ekspert Nüsrət İbrahimli qeyd etdi ki, aprel ayında Bakıda kirayə mənzillərin qiymətində 2.98 faiz artım müşahidə edilib. Ticarət obyektlərinin icarəsi bazarında isə 0.78 faiz azalma olub: “Kirayə mənzillərin qiymətinin bahalaşmasının səbəbi koronavirus pandemiyası ilə əlaqədar təklif portfelinin azalmasıdır. İnsanlar mənzillərini kirayə vermək üçün pandemiyadan sonrakı dövrü gözləməyə üstünlük verib. Bu dövrdə ticarət obyektlərinə tələbatın azalması isə icarə qiymətlərinin ucuzlaşmasına səbəb olub”

  • Elnur Fərzəliyev: “…ölkədaxili səfərlərin məhdudlaşdırılması və xarici ölkələrlə sərhədlərin bağlanması kirayə bazarına təsir edir”

Əmlak məsələləri üzrə ekspert Elnur Fərzəliyev qeyd etdi ki, pandemiya dövrünə qədər mənzillərin gündəlik kirayəyə verilməsi gəlir gətirən bir sahə kimi qiymətləndirilə bilərdi. Gündəlik mənzillərin birgünlük orta qiyməti təqribən 25-500 manat civarında dəyişirdi: “Ən ucuz qiymətə olanlar mərkəzdən kənar, orta qiymətə normal şəraitli 1 otaqlı mənzillər, ən baha qiymətə olanlar isə villalar, yeni tikili binalardakı tam şəraitli çoxotaqlı mənzillərdir. Ümumiyyətlə, bu sahəyə tələbat turizmin inkişafından sonra başladı. Otellərdə yerlərin məhdudluğu və qiymətlərin bahalığı səbəbindən, paytaxta gələn qonaqlar və xüsusilə də Şərq ölkələrindən olan çoxnəfərlik ailələr gündəlik kirayəlik mənzillərə daha çox üstünlük verirlər. Çünki beşnəfərlik bir ailənin otelə yerləşməsi azı 200 manat xərc tələb edirsə, gündəlik kirayəlik mənzildə bu xərc 80-100 manat arasındadır. Eyni zamanda, turistlər oteldən fərqli olaraq, evdəki mətbəxdən istifadə etməklə, restoran xərclərini də xeyli azaldırlar. Bu sahə daha çox rieltorların və turizm şirkətlərinin məşğul olduqları bir sahədir. Lakin koronavirus pandemiyası nəticəsində ölkədaxili səfərlərin məhdudlaşdırılması və xarici ölkələrlə sərhədlərin bağlanması bu sahəyə olan tələbatı sıfıra endirib”.

Günel CƏLİLOVA

Son xəbərlər