Nazirlər Kabineti yanında Operativ Qərargahın qərarına əsasən, mayın 18-dən etibarən bir çox sahədə karantin qaydaları yumşaldılıb. Ancaq toy məclislərinin təşkilinə qoyulan qadağa hələ də qüvvədədir. Karantindən sonra toyların əvvəlki qaydada keçirilməsi gözlənilmir. Ekspertlər təklif edirlər ki, koronavirus pandemiyası tam bitəndən sonra da təmtəraqlı toy məclislərinin keçirilməsi ləğv olunsun.
Təkliflər səslənir ki, kim evlənmək istəyirsə, nikah üçün müraciət etsin, evlənsin. Toylar üçün icazə verilməsi məqsədəuyğun sayılmır. Ən azı, ilin sonuna kimi bu cür kütləvi tədbirlərə məhdudiyyət olmalıdır.
Toylara icazə veriləcəyi halda, Azərbaycanda toylarla bağlı yeni qaydaların tətbiq edilməsi təklif olunur. Maraqlıdır, toylarla bağlı nə kimi qaydalar tətbiq edilə bilər?
“Toya dəvət edilən qonaq sayı ən azı 3 dəfə azaldılmalı, həmçinin, bir stol ətrafında əvvəlki kimi 12-15 nəfər deyil, 3-5 nəfər otursa daha yaxşıdır”
İqtisadçı-ekspert Natiq Cəfərli qeyd etdi ki, toyların keçirilməsinə icazə veriləcəyi halda, Azərbaycanda bu məsələ ilə bağlı yeni qaydaların tətbiqi gözlənir: “Nəzərə almaq lazımdır ki, bu, Azərbaycanın tətbiq etdiyi qadağa deyil. Bütün dünyada kütləvi tədbirlər, şadlıqlarla bağlı qadağalar qüvvəyə minib. Hazırda tibbi təhlükəsizlik məsələləri öndə olduğu üçün digər məsələlər arxa plana keçib. Amma, təbii ki, bu, uzun müddət davam edə bilməz. Yəqin ki, bir müddət sonra pandemiyanın gətirdiyi problemlərin artımını hiss edəcəyik. Bu səbəbdən gözlənir ki, növbəti mərhələlərdə bəzi qadağalar da yumşaldılsın.
Məlumat üçün bildirim ki, qonşu Türkiyədə iyunun 1-dən toy salonlarının açılması gündəmdədir. Amma hökumət həkimlərlə birlikdə qaydalar müəyyən edib. Qaydalarda sosial məsafə prinsipi əsas götürülüb. Qonaqların sayı, masalar, insanlar arasındakı məsafələr həmin qaydalarla tənzimlənir. Bu qaydalara əməl etmək şərtilə toyların keçirilməsinə icazə verilir. Gözlənir ki, Azərbaycanda da buna bənzər qaydalarla toyların keçirilməsinə icazə verilsin.
Yaxşı olar ki, toya dəvət edilən qonaq sayı ən azı 3 dəfə azaldılsın. Məsələn, bir stol ətrafında əvvəlki kimi 12-15 nəfər deyil, 3-5 nəfər otursa daha yaxşıdır. Amma maskadan istifadə tapşırılsa, yemək məsələsində anlaşılmazlıq qalacaq. İstənilən halda, sosial məsafəni qorumaq, hər qonaqla öpüşüb-qucaqlaşmamağa çalışmaq, gigiyena qaydalarına əməl etmək lazım olacaq”.
Günel CƏLİLOVA
