Azərbaycan ərazisində xüsusi karantin rejimi ilə əlaqədar tətbiq edilən bəzi məhdudiyyətlərin aradan qaldırılmasına baxmayaraq, ölkəmizdə maska taxmaq zəruridir. Maskanın geyinilməsində əsas məqsəd bilmədən ətrafdakıları da virusa yoluxdurmağın qarşısını almaqdır. Bununla yanaşı, asqırıb-öskürəndə, adi ünsiyyət zamanı tüpürcək vasitəsilə də ətrafa virus yayılır. Bu səbəbdən də mütəxəssislər tibbi maska taxmağı tövsiyə edirlər.
Karantin rejimi ilə əlaqədar olaraq evdən çölə çıxan hər bir şəxs mütləq tibbi maska taxmalıdır. Ancaq bəzi sakinlər nə öz sağlamlıqlarını, nə də yaxınlarını düşünür. Aparılan araşdırmalara görə, paytaxt saxinləri tibbi maskadan az istifadə edirlər.
Bir neçə gün öncə Nazirlər Kabineti yanında Operativ Qərargahın təşkil etdiyi mətbuat konfransında iştirak edən Bakı Şəhər İcra Hakimiyyətinin başçısı Eldar Əzizov bildirib ki, aparılan işlərə baxmayaraq, vətəndaşlar tibbi maskadan istifadə etməsələr, sosial məsafəni saxlamasalar, koronavirusa yoluxmada ikinci dalğadan özümüzü qoruya bilməyəcəyik: “İctimai nəqliyyatda bir şəkil çəkilib. Bakıda avtobusda çəkilən şəkildə bir nəfər belə maska taxmayıb. Bakı sakinlərinə müraciət edirəm ki, qaydalara riayət edək”.
Maraqlıdır, paytaxt sakinləri maska taxmağa niyə meylli deyillər? Nəzərə almaq lazımdır ki, əhalinin çox olduğu ərazidə virusun yayılma risqi də yüksək olur. Bu səbəbdən də koronavirus epidemiyası tam bitməyənə qədər hər kəs tibbi maskadan istifadə etməlidir.
Onu da bildirək ki, respublikanın baş infeksionisti Cəlal İsayev son çıxışında maska taxmağın məcburi olmasının vacibliyini bildirib: "Çünki xəstəliyi yüngül keçirən insanlar var ki, onlarda müəyyən simptomların olması mümkündür. Həmin insanlar xəstəliyin hansısa əlamətini özündə hiss etməsə də, virus ifraz etməkdə davam edirlər. Bu baxımdan, hər bir insan təhlükəlidir. Ona görə də karantin rejimi bitəndən sonra Azərbaycanda da müəyyən müddətdə insanların maska taxması məcburi olmalıdır”.
- Aydın Əliyev: “Maskanın geyinilməsində əsas məqsəd odur ki, bilmədən ətrafdakıları da virusa yoluxdurmuş olmayasan”
Radioloq-həkim Aydın Əliyev bildirdi ki, maskanın taxılması zəruri olmalıdır: “Bəzi insanlar virus daşıyıcısı olduğu halda bilmirlər ki, onda virus var. Belə olan halda da o, asqırıb-öskürəndə ətrafa virus yayır. Maskanın geyinilməsində əsas məqsəd odur ki, bilmədən ətrafdakıları da virusa yoluxdurmuş olmayasan. Bizim virus yaymağımız üçün təkcə asqırıb-öskürməyimiz faktor deyil. Adi ünsiyyət zamanı tüpürcək vasitəsilə də qarşı tərəfi yoluxdura bilərik. Özümüzdən asılı olmayaraq, ağız suyunu kənara xaric edirik, maska bu ağız suyunun ötürülməsinin qarşısını alır”.
A.Əliyev adi tibbi maskanın keyfiyyəti məsələsinə də toxunub: “Bəzən düşünürlər ki, tibbi-cərrahi maska virusun yayılmasının qarşısını almır, gərək xüsusi respiratorlu bahalı maskalardan istifadə olunsun. Amma bu fikirlər yanlışdır. Adi tibbi maska belə virus yayılması risqini 90 faizədək azaldır”.
- Adil Qeybulla: “Karantin rejimi bitəndən sonra Azərbaycanda da müəyyən müddətdə insanların maska taxması məcburi olmalıdır”
Professor, tibbi ekspert Adil Qeybulla qeyd etdi ki, maska taxmaq məcburi olmalıdır: “Çünki xəstəliyi yüngül keçirən insanlar var ki, onlarda müəyyən simptomların olması mümkündür. Hətta simptomsuz virusgəzdirənlik ola bilər. Həmin insanlar xəstəliyin hansısa əlamətini özündə hiss etməsə də, virus ifraz etməkdə davam edirlər. Bu baxımdan hər bir insan təhlükəlidir. Ona görə də karantin rejimi bitəndən sonra Azərbaycanda da müəyyən müddətdə insanların maska taxması məcburi olmalıdır”.
Həmsöhbətimiz onu da əlavə etdi ki, virusların əksəriyyəti hava-damcı yolu ilə yayılır. Maskalar isə havadakı virusları keçirtmədiyi üçün effektlidir: “Bu maskalar virusların yayılmasının qarşısını almaqda xüsusi kömək etmiş olur. Lakin maskalardan daimi istifadəyə ehtiyac yoxdur. İnsanların kütləvi olduğu yerlərdə, ictimai nəqliyyatda, metroda və s. taxmaq lazımdır. Bəzən insanlar xəstə olarkən ev şəraitində də maskadan istifadə edirlər. Evdə qoruyucu maska taxmağa ehtiyac yoxdur. Onun əvəzində otağın havasını dəyişmək, otağa gün işığının düşməsini təmin etmək lazımdır”.
Günel CƏLİLOVA
