Karantin rejiminin yumşaldılması ilə bağlı yoluxma sayı artıb. Uzun müddət ciddi karantin rejimində yaşamaq da mümkün deyil. Bunu Tibbi Ərazi Bölmələrini İdarəetmə Birliyinin (TƏBİB) şöbə müdiri Yaqut Qarayeva Nazirlər Kabineti yanında Operativ Qərargahın keçirdiyi mətbuat konfransında deyib.
Onun sözlərinə görə, 11-17 may tarixləri arasında 755 yoluxma olub və bu, bir həftə üçün böyük rəqəmdir: “Bu indiyədək həftə ərzində ən çox yoluxma halıdır. Biz karantin qaydalarını yumşaldırıq. Lakin tibbi olaraq bu gündən sonra nə baş verəcəyi insanlardan asılıdır. Xəstə sayı artarsa, onlara yetəri qədər xidmət göstərmək çətin olacaq. Modul tipli xəstəxanaların açılması ilə çarpayı sayı artıb, son avadanlıqlar gətirilib, maska problemimiz qalmayıb. Vətəndaşlar qaydalara əməl etməsə, vəziyyət yenidən pisləşə bilər”.
Məlumat üçün qeyd edək ki, Nazirlər Kabineti aprelin 27-dən karantin rejimi ilə bağlı tətbiq edilən məhdudiyyətlərin qismən yumşaldılması barədə qərar qəbul edib. Nazirlər Kabineti yanında Operativ Qərargah mayın 18-dən karantin rejiminin yenidən yumşaldılması barədə qərar qəbul edib. Qərara görə, mayın 18-dən SMS icazə ilə insanların evdən çıxması, xüsusi vəsiqə və arayışlarla işə çıxma sistemi ləğv edilib. 65-dən yuxarı yaşı olan insanların evdən çıxmasına tətbiq edilən qadağa aradan qaldırılıb. Restoranlar, kafelər, ictimai iaşə obyektləri, parklar açılır. Bununla yanaşı, kütləvi tədbirlərin keçirlməsinə tətbiq edilən qadağalar qüvvədə qalacaq. 10 nəfərdən çox insanın bir yerə toplanması qadağandır. Ölkəyə giriş-çıxışa tətbqi edilən qadağa mayın 31-dək qüvvədədir.
Görünən odur ki, vətəndaşlar qaydalara əməl etməsə, vəziyyət yenidən pisləşə bilər. Maraqlıdır, bəs ekspertlər hazırkı vəziyyəti necə dəyərləndirirlər?
“Hətta maska taxmaq əllərin dezinfeksiya edilməsindən daha önəmlidir”
Məsələyə münasibət bildirən tibb elmləri doktoru, professor Adil Qeybullanın sözlərinə görə, çox şey vətəndaşların qaydalara nə dərəcədə əməl edəcəyindən asılı olacaq: “Azərbaycan koronavirusun ikinci mərhələsinə daxil olur. Mərhələ ondan ibarətdir ki, karantin tədbirləri yumşaldılır və biz yeni situasiyaya keçirik. Yeni situasiyada karantin davranışlarına ciddi əməl olunmalıdır. Hazırda olan yoluxmalar SMS razılaşmaları dövründə insanların qonaq getməsi, ziyafətlər təşkil etməsi və sair kimi tədbirlərdən qaynaqlanır. Ancaq indiki dövrdə insanların maska taxmaması və məsafə gözləməməsi mütləq fəsadlara yol açacaq. Fikrimcə, bu səbəbdən yoluxma sayı artacaq. Ona görə də insanlar ikinci mərhələdə daha diqqətli olmalıdırlar. Xüsusən də maska taxmaq vacibdir. Çünki müəyyən edilib ki, koronavirus havadan damcı yolu ilə keçir. Bəzən kalloid formasında bu virus bir-iki saat havadan asılı qalır. Ona görə də insanların maska taxması çox önəmlidir. Hətta maska taxmaq əllərin dezinfeksiya edilməsindən daha önəmlidir. Ona görə də hesab edirəm ki, vətəndaşlar karantin qaydalarına ciddi əməl etməlidirlər. Bəzi şeylər insanlarda vərdişə çevrilməlidir. İnfeksiyanın ikinci dalğasının sönməsi üçün maksimum səylər göstərilməlidir. Belə olmasa, payız fəslində qripin yayılması yoluxmanı bir az da genişləndirə bilər. O baxımdan da çox şey vətəndaşların davranışından asılı olacaq”.
Vidadi ORDAHALLI
