Bu gün koronavirusa yeni yoluxmaların sayı 113, sağalan xəstələrin sayı 40 nəfərdir, 1 nəfər koronavirusdan ölüb. Hazırda xəstəxanalarda müalicə edilən aktiv xəstələrin sayı 1 333 nəfər olub. Ümumilikdə ölkədə koronavirusa ümumi yoluxmaların sayı 3 387 nəfərə çatıb. “Trend”in məlumatına görə, bunu “Tibbi Ərazi Bölmələrini İdarəetmə Birliyi”nin (TƏBİB) şöbə müdiri Yaqut Qarayeva Nazirlər Kabineti yanında Operativ Qərargahın brifinqində bildirib.
Onun sözlərinə görə, ölkədə bundan sonra vəziyyətin tibbi baxımdan necə olacağı yalnız bizim özümüzdən asılıdır. Parklarda mütləq maskalardan istifadə edilməlidir:
“Xəstə sayı artdıqca onlara tibbi baxımdan yardım göstərmək də çətinləşə bilər. Bu gündən karantin qaydaları daha da yumşaldılır. Amma biz həkimlər daha çətin işə hazır olmalıyıq. Bunu statistika da göstərir. 11-17 mayda 755 yoluxma olub. Bir həftə ərzində bu qədər yoluxma olmayıb. Məhdudiyyətlər götürülən kimi yoluxmaların sayı artdı. Bu bizim sosial məsuliyyətimizin olmadığını göstərir. Bu günə qədər dövlət tərəfindən bütün tədbirlər görülüb. Biz də sosial məsuliyyəti hiss etməliyik".
Bakı Şəhər İcra Hakimiyyətinin başçısı Eldar Əzizov isə brifinqində deyib ki, icra strukturları pandemiya ilə bağlı yeni çağırışlara hazırdır. E.Əzizov bildirib ki, Prezidentin tapşırıqlarına uyğun olaraq dezinfeksiya işlərinə hələ virus yayılmamışdan əvvəl başlanılıb: "Paytaxtda 11 700 bina var və həftədə 2 dəfədən az olmayaraq bu binalarda dezinfeksiya işləri aparılır. Həmçinin ətraf ərazilər, eləcə də əsas prospektlər dezinfeksiya edilir. Bakıda dezinfeksiya işləri ilə bağlı istər texnika, istərsə də xüsusi maddələr baxımından heç bir sıxıntı yoxdur. Hər gün dezinfeksiya işlərində 2 min nəfərə qədər insan çalışır".
İcra başcısı bildirib ki, dezinfeksiya işləri zamanı liftlərə xüsusi diqqət ayrılır. "Hər gün BŞİH-nin balansında olan liftlərdə dezinfeksiya işləri aparılır. Mənzil Tikinti Kooperativlərinə gəlincə isə, orada xidmətlər kollektiv özünü idarəetmə formasıda həyata keçirilir. Ona görə də orada kollektiv şəkildə dezinfeksiya aparmalıdırlar, ancaq BŞİH bu işdə də onlara dəstək göstərir.
O əlavə edib ki, pandemiya dövründə Azərbaycanda, o cümlədən Bakıda ərzaq qıtlığı yaşanmayıb.
E.Əzizov Bakı əhalisini Operativ Qərargah tərəfindən qoyulan qaydalara əməl etməyə çağırıb.
Bakıda uşaq bağçalarının açılması məsələsinə aydınlıq gətirildi
Bakı Şəhər İcra Hakimiyyətinin başçısı Bakıda uşaq bağçalarının açılması məsələsinə də aydınlıq gətirib. E.Əzizov bildirib ki, bağçaların açılması epidemioloji vəziyyətdən asılı olacaq: “Operativ Qərargah nə zaman qərar qəbul etsə, biz bağçaları aça bilərik, ancaq mənə elə gəlir ki, bu, yaxın perspektivdə olmayacaq”.
Çimərliklərlə bağlı yeni qaydalar...
E.Əzizov bildirib ki, Bakıda çimərliklərlə bağlı qaydalar hazırlanır və bunun üçün komissiya yaradılıb. E.Əzizov qeyd edib ki, çimərliklərdə də sosial məsafə saxlamaq vacib məsələdir: “Ola bilər ki, bəzi çimərliklərdə sıxlıq yaransın və ona görə də elektron sistemin yaradılması təklif edilir. Yəni vətəndaş evdən çıxmazdan əvvəl çimərlikdə yerini sifariş edə biləcək. Təkliflər var, hazırlıqlar gedir. Qaydalar hazır olduqdan sonra ictimaiyyətə çatdırılacaq”.
E.Əzizov əlavə edib ki, çimərliklərə nəzarət üçün elektron mexanizm də hazırlanır:“Bəzən görürsən ki, 100 nəfərlik çimərliyə çoxlu sayda insan gəlir. Buna yol vermək olmaz, biz qaydalara əməl etməliyik və bunun üçün də elektron mexanizm hazırlanır”.
Təəssüf ki, insanların çoxu bunun siyasi oyun olduğunu düşünür
“Təəssüf ki, insanların çoxu düşünür bu bir siyasi oyundur” – deyən E.Əzizov bildirib ki, belə düşünmək olmaz: "Bəs dövlətlər virusun qarşısını almaq üçün niyə milyardlarla vəsait xərcləyir?”.
İcra başçısı əlavə edib ki, insanlar qaydalara əməl etməlidir: "Biz Bakıda monitorinq keçirdik və şahidi olduq ki, insanların yalnız 10 faizə qədəri tibbi maskalardan istifadə edir. Bu yolverilməzdir".
İyun-iyulda da toylar olmaya bilər...
Nazirlər Kabinetinin mətbuat xidmətinin rəhbəri İbrahim Məmmədov deyib ki, rayonlara gediş-gəliş məsələsi sanitar-epidemioloji vəziyyətdən asılıdır. Onun sözlərinə görə, mütəxəssislər nə vaxt gediş-gəlişin təhlükəli olmadığını desələr, o vaxt da bu barədə məsələyə baxılacaq: "Hələ ki mütəxəssislər vəziyyəti qiymətləndirir və rayonlara gediş-gəlişin başlanması barədə müsbət rəy verməyib.
Biz iyun-iyul ayı ərzində toyların olub-olmayacağı barədə söz deyə bilmərik. Bu gün şadlıq evlərinin açılması vəziyyətə uyğun deyil. Əgər mütəxəssislər vəziyyəti qiymətləndirib şadlıq evlərinin açılmasını münasib bilsələr, o vaxt da qərar veriləcək".
Başqa ölkələrlə müqayisədə bizdə yoluxma sayı çox aşağı oldu
İ.Məmmədov qeyd edib ki, vətəndaşlar çağırışlara əməl etdiyi üçün başqa ölkələrlə müqayisədə bizdə yoluxma çox aşağı oldu. Onun sözlərinə görə, intizamlı vətəndaşların əksəriyyəti xüsusi qaydalara əməl edib: “Azərbaycanda koronavirus olmasına inanmayanlar və qaydalara əməl etməyənlər azdır. Vətəndaşlar çağırışlara əməl etdiyi üçün başqa ölkələrlə müqayisədə bizdə yoluxma çox aşağı oldu. Bizdə vəziyyət başqa ölkələrlə nisbətdə çox yaxşıdır".
Sağalanlarla mətbuat konfransı keçirmək məsələsinə gəldikdə isə, İ.Məmmədov bildirib ki, bu, bizim səlahiyyətimizdə deyil: "Bu, onların şəxsi qərarıdır, istəsələr müsahibə verə bilərlər, amma Operativ Qərargah onları bu işə sövq edə bilməz".
İ.Məmmədov deyib ki, bayram günləri məhdudiyyətlərin olması mütləq deyil. Onun sözlərinə görə, bu barədə sadəcə bir çağırış olub: "Bayram və istirahət günlərində əhalinin iş günü olmadığı üçün onlara tövsiyə olunur ki, zərurət olmadığı halda çölə çıxmasınlar. Amma bununla bağlı konkret qadağa yoxdur".
...karantin rejimində dəyişiklik edilə bilər
TƏBİB-in şöbə müdiri Yaqut Qarayeva isə bildirib ki, epidemioloji vəziyyət nəzərə alınmaqla, bayram günlərində və həftə sonlarında karantin rejimində dəyişikliyin olması təklif edilə bilər. Onun sözlərinə görə, bu təcrübə başqa ölkələrdə, o cümlədən Türkiyədə də var: "Türkiyədə şənbə və bazar günləri çox ciddi karantin rejimi tətbiqi edilir. Azərbaycanda epidemioloji vəziyyət nəzərə alınmaqla, bu tətbiq edilə bilər"
Y.Qarayeva bildirib ki, peyvənd yaradılana kimi bütün əhalini qapalı şəraitdə saxlamaq mümkün deyil. Onun sözlərinə görə, bu virusa qarşı xüsusi vaksin və dərman yoxdur:"Bu xəstəliyin nə zamana kimi davam edəcəyini bilmirik. Biz bəzi qaydalara əməl etsək, xəstəlik də qısamüddətli olar. İnsanlar qarşısında çətin şərtlər qoymuruq. Onlar bir-birləri arasında məsafə saxlamalıdırlar. Qapalı şəraitdə mütləq şəkildə tibbi maskalardan istifadə edilməlidir".
Bulvar açıldı, ancaq məhdudiyyətlər qalır...
Dənizkənarı Bulvar İdarəsinin rəisi İlqar Mustafayev isə deyib ki, yararsız attraksionlar bulvar ərazisindən çıxarılıb. Onun sözlərinə görə, Dənizkənarı Bulvara giriş məhdudlaşdırıldığı müddət ərzində bulvar ərazisində maarifləndirici lövhələr asılıb və bütün bulvar ərazisi mütəmadi olaraq dezinfeksiya işləri aparılıb. Bulvar ərazisindən yararsız attraksionlar çıxarılıb: "Bulvarda müxtəlif nadir bitkilər var ki, dövlət tərəfindən qorunur. Ötən dövrdə bu bitkilərə də qulluq edilirdi. Bu gündən bulvarın fəaliyyəti bərpa olunub, ancaq bəzi məhdudiyyətlər mövcuddur. İnsanlar ictimai iaşə obyektlərində sosial məsafəni gözləməlidirlər. Masaların arasında məsafə 2 metrdən, insanlar arasında məsafə isə 1 metrdən az olmamalıdır".
İ.Mustafayev bildirib ki, hər an pandemiyanın yeni mərhələsi başlaya bilər, insanlar sosial məsuliyyəti dərk etməli və bu qaydalara əməl etməlidirlər.
Bakı-Naxçıvan sərnişindaşıması zəruri hallarda həyata keçirilir
NK-nin mətbuat xidmətinin rəhbəri bildirib ki, Bakı ilə Naxçıvan arasında sərnişindaşıma zəruri hallarda həyata keçirilir. Onun sözlərinə görə, Bakı ilə Naxçıvan arasında gediş-gəlişə qoyulan məhdudiyyət insanların təhlükəsizliyi üçündür: “Hərbçilərin daşınması və digər zəruri proseslər müəyyən şərtlər əsasında baş tutur. Bu istiqamətdə qoyulan qadağalar sarı zonada olan Naxçıvan əhalisinin təhlükəsizliyini təmin etmək məqsədi daşıyır”.
