Dünyanı bürüyən, insanları təhdid edən, sosial və iqtisadi fəsadları gündən-günə dərinləşdirən koronavirus pandemiyası, eyni zamanda, hər bir sahənin ölkəmizin hərtərəfli inkişafı, insanların sağlamlığının, təhlükəsizliyinin təminatı üçün önəmini də açıqladı, həmin istiqamətdə atılacaq addımların, həyata keçiriləcək islahatların daha da dərinləşdirilməsinin vacibliyini ortaya qoydu.
Bu gün ölkəmizdə vətəndaş-dövlət birliyi fonunda koronavirus bəlasından az itki ilə çıxmaq üçün zəruri olan addımlar atılır və beynəlxalq səviyyədə təqdir edilir.
Təbii ki, bu mübarizədə çoxminli həkim ordusunun üzərinə böyük məsuliyyət düşür. Ölkə başçısı İlham Əliyevin, Azərbaycanın Birinci vitse-prezidenti Mehriban Əliyevanın bütün çıxışlarında, xalqa müraciətlərində həkim əməyinə yüksək dəyər öz ifadəsini tapır. Dünyanın hazırda bir nömrəli probleminə çevrilən koronavirus (COVID-19) infeksiyası ilə mübarizədə Azərbaycan səhiyyə işçilərinin fədakarlığı danılmazdır. Məlumdur ki, həkimlər öz həyatlarını risq altına ataraq xəstələrə xidmət göstərirlər. Həkimlərin səyi nəticəsində koronavirusdan sağalan xəstələrin sayı günü-gündən artır.
Nazirlər Kabineti yanında Operativ Qərargahın yaydığı məlumatda qeyd olunur ki, hazırkı dövrədək ölkəmizdə 3 274 nəfərin koronavirus infeksiyasına yoluxması faktı müəyyən edilib, onlardan 2 015 nəfər müalicə olunaraq sağalıb, 39 nəfər vəfat edib, 1 220 nəfərin xüsusi rejimli xəstəxanalarda müalicəsi davam etdirilir.
Qeyd edək ki, hazırda hətta ən inkişaf etmiş ölkələr bu xəstəliklə mübarizədə böyük problemlər yaşayır və bu ölkələrdə gündə minə yaxın insan vəfat edir. Əgər tibb sahəsi çox inkişaf etmiş ölkələrdə bu xəstəliklə bağlı belə böyük problemlər varsa, təsəvvür etmək çətin deyil ki, bizim üçün nə qədər böyük problem yarana bilər. Ona görə koronavirus xəstələrinə ən yüksək xidmətin göstərilməsi üçün ölkəmizin müasir, ən gözəl xəstəxanaları onların ixtiyarına verilir.
Göründüyü kimi, bu günədək 2000-dən çox koronavirus infeksiyasına yoluxmuş şəxs müalicə olunaraq sağlamlığına qovuşub. Bu o deməkdir ki, ölkəmizdə koronavirusa yoluxmuş şəxslərə xüsusi qayğı ilə yanaşılır. Onların qısa müddətdə tam sağalması üçün həkimlər əllərindən gələni edirlər.
“…öz səhiyyə sistemi və həkimləri ilə fəxr edən ölkələr aciz duruma düşüb, ancaq Azərbaycanda isə…”
Millət vəkili Azər Badamov qeyd etdi ki, koronavirus pandemiyası ilə mübarizədə Azərbaycan həkimləri böyük fədakarlıq və əzmkarlıq göstərirlər: “Öz həyatlarını təhlükə altına qoyaraq, gecə-gündüz insanların sağlamlığının keşiyində dayanan həkimlərimiz xüsusi karantin dövründə hətta öz ailələri ilə də yaxından görüşə bilmirlər. Bu, əsl qəhrəmanlıqdır. Danılmaz faktdır ki, bu gün Azərbaycan səhiyyəsi öz inkişaf dövrünü yaşayır. Bu gün dünyanı ağuşuna almış pandemiya qarşısında böyük iqtisadiyyatları olan, öz səhiyyə sistemi və həkimləri ilə fəxr edən ölkələr aciz duruma düşüblər. Bəzən belə fikirlər də eşidilirdi ki, Azərbaycan həkimləri zəifdirlər və səhiyyə sistemimiz qənaətbəxş deyil. Bu sınaq hansı ölkənin səhiyyə sisteminin daha yaxşı, həkimlərinin bacarıqlı olduğunu sübut etdi".
Həmsöhbətimizin sözlərinə görə, qısa müddət ərzində 20-dən çox xəstəxananın, “Yeni klinika”nın koronavirus xəstələrinin müalicəsinə cəlb olunması, 10 modul tipli xəstəxananın tikilməyə başlanması vəziyyəti nəzarət altında saxlamağımıza imkan verib: "Xüsusi karantin rejiminin tətbiqi ilə qabaqlayıcı tədbirlərin həyata keçirilməsi, təbii ki, dövlət başçımızın öz xalqına olan sevgisindən və çevik qərarlar qəbul etmək bacarığından irəli gəlir”.
Millət vəkili onu da əlavə etdi ki, Azərbaycan səhiyyəsində uzun illər boyu əldə edilmiş nailiyyətlər artıq bu gün öz bəhrəsini verir. Bu müddət ərzində Səhiyyə Nazirliyi tərəfindən güclü peşəkar kadrlar yetişdirilib və yaranmış böhran vəziyyətində tibbi personal peşəkarlığı ilə birgə öz qəhrəmanlıq və fədakarlığını da nümayiş etdirib.
Günel CƏLİLOVA
