Bildiyimiz kimi, xüsusi karantin rejimi çərçivəsində tətbiq edilən bəzi məhdudiyyətlər götürülüb. Lakin bununla yanaşı, hazırda respublika üzrə xüsusi karantin rejimi müddətində ölkə üzrə bir sıra məhdudiyyətlər qüvvədə qalıb. Qadağan edilən tədbirlərin sırasında evlərdə bəzi mərasimlərin keçirilməsi də daxildir. Belə ki, müştərinin evində və ya digər məkanlarda ad günləri, toy, nişan və bu kimi mərasimlərin təşkili qadağan olunub.
Filologiya üzrə fəlsəfə doktoru, tədqiqatçı-alim Qiymət Məhərrəmli “Bakı-Xəbər”ə bildirdi ki, evlərdə bu kimi mərasimlərlə bağlı qadağanın qüvvədə saxlanması müsbət haldır. Q.Məhərrəmlinin sözlərinə görə, bəzi vətəndaşlar karanrtin rejiminin yumşaldılmasından sui-istifadə etməklə, əslində, özlərinə və yaxınlarına böyük zərər vururlar.
“Evlərdə toy-nişan, ad günü və digər mərasimlərin keçirilməsinə qoyulan qadağanın qüvvədə saxlanması yerində verilmiş qərardır”
Alim hesab edir ki, COVID-19 virusu ilə mübarizə uzunmüddətli proses olduğundan, hər bir vətəndaş bu istiqamətdə əlindən gələni etməli və xəstəliyin tam aradan qaldırılması üçün dövlətin həyata keçirdiyi tədbirlərə dəstək olmalıdır. O qeyd etdi ki, xəstəliyə tezliklə qalib gəlməyimiz üçün vətəndaşlar bütün qaydalara riayət etməli və tələskənliyə yol verməməlidirlər. Onun sözlərinə görə, ad günü, nişan, toy kimi mərasimlərin təşkili sonrakı mərhələlərə də saxlana bilər. “Operativ Qərargah tərəfindən karantin rejimi ilə bağlı bir sıra məhdudiyyətlərin aradan qaldırılması, müəyyən məsələlərlə əlaqədar qadağaların götürülməsi müsbət haldır. Əlbəttə, gərək vətəndaşlar da bundan sui-istifadə etməsinlər. Bu gün evlərdə toy-nişan, ad günü və digər mərasimlərin keçirilməsinə qoyulan qadağanın qüvvədə saxlanması yerində verilmiş qərardır. Toyu, nişanı, xınayaxdını hələlik təxirə salmaq olar. Ad günləri də, adətən, ailə daxilində keçirilir və burada əsasən ailə üzvləri iştirak edirlər. Ümumiyyətlə, bu kimi mərasimlərin kütləvi keçirilməsi, ora daha çox insanın cəlb edilməsi arzuedilən hal deyil. Çünki hələ virus təhlükəsi var və son həftələrin statistikası göstərir ki, yoluxanlar sağalanları üstələyir. Bu baxımdan, vətəndaşlar daha da ehtiyatlı olmalı və qadağaları pozmağa cəhd etməməlidirlər. Bütün bunlar əhalinin sağlamlığı, yoluxmaya düçar olmasının qarşısının alınması üçün mövcud olan qadağalardır. Azərbaycan xalqı genetik olaraq mehriban, qohumcanlı insanlardır, buna görə də keçirilən hər bir mərasimə çoxlu sayda insan gəlir və bu da virusa yoluxma risqini daha da artırır. Fikrimcə, vətəndaşlarımız səbrli olmalı və tələsgənliyə yol verməməlidirlər”.
Q.Məhərrəmli onu da qeyd etdi ki, müəyyən sahələr üzrə qadağaların götürüləcəyi barədə xəbərlər yayılan kimi bəzi vətəndaşlar bundan sui-istifadə etməyə cəhdlər etdilər. Bunun yolverilməz olduğunu deyən Q.Məhərrəmli hesab edir ki, restoran və kafelərə giriş-çıxışla bağlı qadağanın götürülməsinə baxmayaraq, vətəndaşlar mümkün qədər o yerlərə getməkdən çəkinməlidirlər. “Restoran və kafenin açılması o demək deyil ki, vətəndaşlar kütləvi olaraq ora getməlidirlər. Hər şeydən əvvəl insanların sağlamlığıdır. Bunu hər kəs düşünməlidir. Bu gün restoran və kafelərdə toy, xınayaxdı, nişan və ad günlərinin keçirilməsinə qadağa qoyulub və vətəndaşlar da düşünürlər ki, evdə keçirə bilərəm. Bu belə olmalı deyil. Artıq vətəndaşlar bilməlidirlər ki, yas mərasimi istisna olmaqla, toy, nişan, xınayaxdı, ad günü kimi mərasimlərin evdə təşkil edilməsi qadağandır, buna cəhd etməsinlər. Yas mərasimi belədir ki, onu təxirə salmaq olmur. Amma xeyir işi istənilən vaxta qədər təxirə salmaq mümkündür. Odur ki, vətəndaşlar qadağaların əhəmiyyətini dərk etməli və rəsmi qadağa ləğv edilənə qədər evdə nişan, toy, ad günü və sair mərasimlər keçirməkdən çəkinməlidirlər. Əks təqdirdə, Allah eləməsin, bu, yeni fəsadlar yarada bilər” - deyə Q.Məhərrəmli vurğuladı.
İradə SARIYEVA
