Mayın 15-də Nazirlər Kabineti yanında Operativ Qərargahda Azərbaycanda koronavirusla mübarizə üzrə ənənəvi brifinq keçirilib.
Pandemiyaya qarşı mübarizə ilə bağlı aparılan işlərə yekun vuran Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Ramin Bayramlı bildirib ki, yoluxma ən çox yerli qurumlarda aşkar olunur: “Bu, həmin müəssisələrin rəhbərləri və işçilərinin bu məsələyə ciddi yanaşmadıqlarını göstərir. “Bakı Tikiş Evi”ndə 64, “Baku Steel Company”də 48 yoluxma hadisəsi aşkarlanıb, hətta həbsxanalarda da infeksiya müşahidə edilib".
Maraqlıdır, “Bakı Tikiş Evi” və “Baku Steel Company”də sosial məsafəyə niyə nəzarət olunmur ki, adıçəkilən müəssisələrdə koronavirusa yoluxanların sayı artır.
“Baku Steel Company”: “...xəstəliyə karantinin yumşaldılmış rejimi şəraitində - evdə, küçədə, qohumlarıgildə qonaq olarkən yoluxa bilərdilər”
TƏBİB sədrinin “Baku Steel Company” ilə bağlı iddiasına qeyd olunan müəssisə reaksiya verib. İşçiləri koronavirusa yoluxan müəssisələr arasında “Baku Steel Company”nin üstünlük təşkil etməsi ilə bağlı adıçəkilən şirkətin mətbuat xidməti bəyanat yayıb. Bəyanatda qeyd olunur: “Şirkət istehsalın, xüsusən də metallurgiya müəssisələrinin fəaliyyətini məhdudlaşdırmamaq barədə "Azərbaycan Respublikası ərazisində xüsusi karantin dövründə işlərin tənzimlənməsi haqqında" və "Koronavirus (COVID-19) yoluxmasının qarşısının alınmasına dair əlavə tədbirlər haqqında" Azərbaycan Respublikası Nazirlər Kabinetinin 31 mart 2020-ci il tarixli, 122 nömrəli xüsusi qərarları əsasında istehsal prosesini davam etdirmək qərarına gəlib.
Eyni zamanda, müəssisə rəhbərliyi inzibati korpusun və istehsalat sektorunun işçilərinin təhlükəsizliyini təmin etmək üçün xüsusi tədbirlər görüb. Xüsusi rejimin yeni qaydalarına əsasən, “Baku Steel Company”, ilk növbədə, müəssisənin işçi heyətini əməkhaqqını kəsmədən 30% -ə endirib. Hər gün müəssisənin bütün işçiləri tibbi briqada tərəfindən xüsusi müayinədən keçirilib: işçilərin temperaturu ölçülüb, paltarları dezinfeksiya edilib. Bundan əlavə, müəssisədə bütün işçilər xüsusi antiseptik vasitələrlə əllərini məcburi dezinfeksiya ediblər”.
Şirkətin mətbuat xidməti cəmiyyətin diqqətini metallurgiya istehsalının xüsusiyyətlərinə yönəldib: “Çünki mövcud karantin qaydaları, koronavirusla mübarizə üçün xüsusi rejim tətbiq olunana qədər də metallurgiya zavodlarında işçilərin zəruri atributu idi. Pandemiyadan əvvəl və sonra da metallurqlardan iş yerlərində kombinezonda, dəbilqə, gözlük, əlcək və FFP2 səviyyəli tənəffüs maskalarında olmaları tələb olunur. Qlobal standartlara görə, metallurgiya sexlərindəki bu elementar təhlükəsizlik qaydaları istehsal prosesində olan hər kəsə şamil olunur. Karantin rejimi dövründə şirkət rəhbərliyinin qərarı ilə zavodun ümumi yeməkxanası bağlanıb”.
“Baku Steel Company”nin mətbuat xidməti “TƏBİB” rəhbəri Ramin Bayramlının bəyanatını qəti surətdə təkzib edir və bildirir ki, şirkətdə karantin rejiminin pozulmasına yol verilməyib: “Müəssisənin əməkdaşları içərisindən aşkar edilmiş virus daşıyıcıları isə xəstəliyə karantinin yumşaldılmış rejimi şəraitində - evdə, küçədə, qohumlarıgildə qonaq olarkən yoluxa bilərdilər”.
“Bakı Tikiş Evi” - Etibar Əzimov: “...həmin həkim işçimiz olan anasını yoluxdurub və beləliklə...”
“Bakı Tikiş Evi”nin satış şöbəsinin müdiri Etibar Əzimov isə bildirdi ki, “Bakı Tikiş Evi” hazırda işləmir və nə zaman açılacağı barədə məlumatlı deyil: “Bir nəfər həkim koronavirusa yoluxub, həmin həkim işçimiz olan anasını yoluxdurub və beləliklə, işçilər arasında yoluxma baş verib. Koronavirusa yoluxan işçilərimiz karantinə yerləşdirilib və tezliklə hamısı evə buraxılacaq. Hazırda fabrik işləmir”.
Günel CƏLİLOVA
