Xaricdə yaşayan Azərbaycan əsilli alimlər, elm xadimləri hər zaman tarixi vətənləri olan Azərbaycanı müxtəlif istiqamətlərdə təmsil və təbliğ ediblər. Xaricdəki Azərbaycan diasporunun formalaşmasında şübhəsiz ki, alimlərin, elm adamlarının xüsusi rolu olub, onlar bu istiqamətdə fəaliyyətlərini bu gün də davam etdirirlər. Bu gün bir sıra Avropa ölkələrində Azərbaycan alimləri ölkəmizin tanıdılması yönündə müxtəlif işlər görürlər.
Mətbuatın yazdığına görə, Fransa Azərbaycan Dialoqu Assosiasiyasının təşkilatçılığı, Azərbaycan Diasporuna Dəstək Fondunun maliyyə dəstəyi və Azərbaycan Respublikasının Fransadakı Səfirliyinin dəstəyilə Paris şəhərində Azərbaycan Respublikasının Fransadakı Səfirliyinin Mədəniyyət Mərkəzində Fransadakı azərbaycanlı elmi diasporu yaradılıb.
Diasporla ilk görüş Azərbaycan Respublikasının Fransadakı Səfirliyinin Mədəniyyət Mərkəzində keçirilib. Görüşdə Fransanın bütün regionlarından gələn əlliyə yaxın azərbaycanlı elmlər namizədi (PhD) və doktorantlar, həmçinin, magistr tələbələri iştirak ediblər. Məlumatlara görə, Fransada elmi diasporun gələcək məqsədləri, vəzifələri, öhdəlikləri ətrafında fikir mübadiləsi aparılıb və Fransanın elm ocaqlarında elmi iş yazan və bu titulu artıq əldə etmiş həmvətənlərimizin bir araya gətirilməsi və təşkilatlanması üçün elmi diasporun yaradılması qərara alınıb.
Azərbaycan Respublikasının Fransadakı səfiri Rəhman Mustafayev görüşdə iştirak edən azərbaycanlı elmi işçilərini salamlayaraq, elmi diasporun yaradılmasının vacibliyini vurğulayıb və Fransa ali təhsil ocaqlarının kitabxanalarında Azərbaycanla bağlı kitab bazasının genişləndirilməsi üçün səfirliyin dəstək olacağını bildirib.
Görüş iştirakçılarına, eyni zamanda, Azərbaycan Milli Elmlər Akademiyasının science.az saytında elmi diaspora portalı və Fransadakı azərbaycanlı tələbə təşkilatları barədə məlumat verilib.
“Fransada yaradılan elmi diasporun uğurlu fəaliyyətinin müsbət nəticəsini görəcəyik”
Azərbaycan Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, belə bir diasporun yaradılması çox müsbət haldır və Diasporla İş üzrə Dövlət Komitəsinin növbəti uğurlu işlərindən biri kimi dəyərləndirilməlidir. O bildirdi ki, diaspor alimlərinin bir araya gətirilməsi ilə bağlı komitəsinin rəhbərliyi ilə fikir mübadiləsi aparmışıq. “Xaricdə yaşayan, fəaliyyət göstərən alimlərin təşkilatlanması, elmi diasporunun yaradılması önəmli bir hadisədir. Komitənin hazırkı rəhbəliyi və onun komandası Azərbaycan diasporunun formalaşması, inkişaf etməsi istiqamətində böyük əzmlə çalışır, artıq bu istiqamətdə bir sıra təsirli işlər görülmüşdür və ciddi iradə ortadadır. Bir il bundan əvvəl diaspor alimlərinin təşkilatlanması ilə bağlı Diaspor Komitəsinin rəhbərliyi ilə görüşlərimiz oldu və sevinirəm ki, komitə artıq Fransada belə bir təşkilatın yaradılmasına nail oldu. 2020-ci ilin aprel ayının sonu və mayın əvvəlində Azərbaycan diasporunun qurucusu və Azərbaycan dövlətinin memarı ulu öndərin doğum günü ərəfəsində xaricdə fəaliyyət göstərən alimləri bir araya gətirməklə elitar diaspor hərəkatın formalaşdırılmasına nail olmaq niyyətindəyik. Artıq layihə üzərində iş gedir və əminəm ki, Azərbaycan Respublikasının Diasporla İş üzrə Dövlət Komitəsi ilə birgə planlaşdırdığımız “Diaspor alimlərin I Beynəlxalq Bakı Forumu” reallaşacağı təqdirdə xaricdə yaşayan alimlərin potensialından daha düzgün şəkildə istifadə etmək mümkün olacaqdır. Biz hər zaman bu fikirdə olmuşuq ki, Azərbaycan xalqının intellektual kəsimi olaraq xarici ölkələrdə çalışan alimlərimizi bir araya gətirən, onları təşkilatlandıran bir elmi diaspor platformasının yaradılmasına zərurət vardır. Həm Azərbaycan həqiqətlərinin daha effektiv və təsirli formada təbliğində, həm xaricdə fəaliyyət göstərən alimlərimizin enerjisindən, imkanlarından və əlaqələrindən ümumi məqsədlərimizin həyata keçirilməsində istifadə etmək lazımdır, həm də onların imkanlarından istifadə edərək bizim elmlə məşğul olan gənclərimizin müxtəlif elmi mərkəzlərə ezam olunması prosesini asanlaşdıra bilərik. Eyni zamanda, bu insanlar üçün imkanlar yaratmaq olar ki, yeni nəsil alimlərimizə elmi rəhbər olsunlar, birgə mövzularda tədqiqatlar aparsınlar, birgə məqalələr çap etsinlər, universitetlərimizdə tələbə hazırlığında iştirak etsinlər. Bu insanların potensialından istifadə edilməsi çox faydalı olar və lazımlıdır. Açığını deyim ki, xaricdəki alimlərimiz ölkəmizin elmi mərkəzləri, universitetləri ilə əməkdaşlıq etməkdə maraqlıdırlar. Mən bunu xaricdə fəaliyyət göstərən alimlərimizlə söhbətlərimdə hər zaman hiss etmişəm. Hətta, bununla bağlı AMEA-nın keçmiş rəhbərliyinə də müraciət etmişdim. Təəssüf ki, o vaxt elmimizə rəhbərlik edənlər xaricdəki alimlərimizə qısqanc münasibət sərgiləyərək onlarla əməkdaşlığa getmədilər. İnanıram ki, akademiyamızın hazırki rəhbərliyi bu imkanlardan istifadə edəcək.” Ölkə başçımızın diasporamızın inkişafını dəstəklənməsi istiqamətində ardıcıl, məqsədli və prinsipial siyasət yürütdüyünü deyən İ.Orucov hesab edir ki, bu siyasət xaricdəki azərbaycanlıların Azərbaycan dövlətçiliyi ətrafında sıx birləşməsinə yönəlib. Həm də, bu siyasət ona yönəlib ki, dünyanın hansı guşəsində yaşamasından asılı olmayaraq hər bir azərbaycanlı lazımı məqamda və anda öz dövlətinin dəstəyini hiss etsin, arxasında müstəqil və güclü dövlətinin olduğunu unutmasın, eyni zamanda, öz dövlətinin təbliği, maraqlarının müdafiəsi işində fəal olsun, imkanı daxilində öz dövlətinə töhvə versin. Fransada yaradılan elmi diasporun oradakı alimlərin bir araya gələrək təşkilatlanması istiqamətində atılan ilk addım olduğunu deyən İ.Orucovun sözlərinə görə, alimlərin birləşdiyi bu yeni platforma böyük uğurlar vəd edir. “Əminəm ki, Fransada yaradılan elmi diasporun uğurlu fəaliyyətinin müsbət nəticələri olacaq. Nəzərə alsaq ki, torpaqlarımızı işğal etmiş bədnam qonşularımız məhz bu dövlətdə güclü diasporaya malikdirlər, Fransa dövlətində ciddi mövqeləri ilə öyünürlər, o zaman məhz Fransada alimlərimizin ortaq mövqe ortaya qoymasının əhəmiyyəti daha da artmış olur” - deyə İ.Orucov qeyd etdi.
İradə SARIYEVA
