Türkiyə polisi İŞİD-ə üzv olmaqda şübhəli bilinən üç şəxsi Azərbaycanın Naxçıvan bölgəsi ilə sərhəddə yerləşən Dilucu sərhəd-keçid məntqəsində yaxalayıb. Türkiyə mediasının verdiyi məlumata görə, terrorçuluqda şübhəli bilinən şəxslərin münaqişə zonasına keçməyə hazırlaşdıqları barədə daxil olmuş əməliyyat məlumatı əsasında Kocaeli antiterror polisi əməliyyat başladıb. Saxlanan şəxslərin kimliyi, hansı ölkənin vətəndaşları olması açıqlanmır.
Türkiyə İŞİD üzvlərinin Suriyaya keçməsi üçün əsas tranzit ölkədir, vaxtaşırı olaraq təhlükəsizlik qüvvələri terror qruplaşmasının üzvlərini həbs edirlər.
Bu hadisənin baş verməsi bir sıra maraqlı faktları və ehtimalları üzə çıxarmış olur. İŞİD-çi olduqları ehtimal edilən 3 şəxsin Naxçıvanla həmsərhəd ərazidə peyda olması bir çox sual ortaya çıxarır. Nəzərə alsaq ki, Naxçıvan bölgəsində İŞİD üzvləri yox dərəcəsindədir, eyni zamanda, onların fəaliyyəti üçün həmin regionda heç bir münbit şərait yoxdur, onda İŞİD-çilərin həmin sərhədə yaxın ətrafda dolaşması nə məqsədi güdə bilər? Qeyd edək ki, Naxçıvanın Türkiyə ilə olan sərhədi həm də Ermənistana yaxın olan ərazi sayılır. Türkiyənin həmin ərazilərində isə erməni diasporu ciddi fəaliyyət göstərir. Buna qəti şübhə yoxdur. Çünki Qars, Van bölgələrində ermənilərin keçirdikləri bəzi tədbirləri buna misal çəkə bilərik. Erməni lobbisinin dəstəyilə həmin coğrafiyada hətta Türkiyəyə ərazi iddialarının açıq səsləndiyi tədbirlər belə keçirilir. Bu yaxınlarda HDP-dən millət vəkili olan erməni əsilli deputat Karo Paylanın məhz həmin ərazilərdəki davranışlarını da buna misal göstərə bilərik.
Deməli, həmin ərazilərdən erməni lobbisinin hər hansı məqsədlər üçün istifadə edə biləcəyinə qəti şübhə yeri qalmır. İndisə gəlin bir müddət əvvəl Ermənistanın Baş naziri Paşinyanın verdiyi bir bəyanatın məzmununa diqqət edək. O, Dağlıq Qarabağ münaqişəsinin həll edilməyəcəyi təqdirdə Azərbaycanın hərbi güc tətbiq edəcəyi ilə bağlı səsləndirdiyi bəyanatlara belə şərh vermişdi ki, bu mövqe bölgənin təhlükəsizliyi üçün təhlükəlidir. Paşinyan fikrini belə izah etdi ki, guya münaqişə alovlanacağı təqdirdə dünyanın bir sıra ölkələrindən olan İŞİD və digər terrorçular üçün münbit şərait yaranacaq ki, bölgəyə gəlsinlər. Əslində, bununla Paşinyan beynəlxalq aləmi İŞİD kartı ilə şantaj edirdi. Bunun şantaj olduğunu, Paşinyanın qeyri-konstruktiv mövqeyinə haqq qazandırmaq cəhdi olduğunu hamı bilirdi. Görünür, Ermənistan təbliğatı bölgənin artıq İŞİD üçün “cəlbediciliyi” rəyini praktik vasitələrlə sübuta yetirməyə çalışır. Böyük ehtimalla, həmin şəxslər də İŞİD qiyafəsinə girən və erməni lobbisinin maraqlarına xidmət edənlərdir. Məqsəd də bundan ibarətdir ki, Azərbaycan növbəti İŞİD kartı ilə şantaj edilsin. Əminik ki, qardaş Türkiyənin əlaqədar qurumları həbs edilənlərlə bağlı aparacaqları filtrasiya işlərində bu vacib detalı da nəzərdən keçirmiş olacaqlar.
Məhəmmədəli QƏRİBLİ
