Azərbaycan Respublikasının Prezidenti İlham Əliyev jurnalistlərə ilin yekunları ilə bağlı geniş müsahibəsində bildirib ki, biz qürurlu ölkəyik, biz öz yolumuzla gedirik, heç kimə də bizim ehtiyacımız yoxdur, heç kimdən də asılı deyilik: “Mən hesab edirəm ki, biz artıq Avrointeqrasiya istiqamətində öz addımlarımızı atmışıq və gələcək addımlara həm ehtiyac yoxdur, həm də o addımlar nəticəsiz olacaq”.
Prezident bildirib ki, indi Avropada miqrantlarla bağlı vəziyyət göz önündədir: “Bunu bəziləri demək istəmir, amma mən hesab edirəm ki, biz deməliyik. Niyə biz bu həqiqəti deməməliyik, niyə bunun üstündən keçməliyik? “Stop İslam”, “İslam miqrantlara yox” şüarları ilə artıq siyasi qüvvələr hakimiyyətə gəlir. Populist vədlər indi islamofob prinsiplər əsasında qurulur. Ona görə daha çox səs toplamaq istəyən siyasi qüvvə mütləq bu mövzunu istismar edir. Belə olan halda, müsəlman ölkəsi Azərbaycan hansı formada orada təmsil oluna bilər? İkinci dərəcəli ölkə kimi? Yaxud da ki, hansısa bir imtiyaz diləyən ölkə kimi? Qətiyyən yox! Biz qürurlu ölkəyik, biz öz yolumuzla gedirik, heç kimə də bizim ehtiyacımız yoxdur, heç kimdən də asılı deyilik! Ona görə Bakı Dövlət Universitetində Avropa inteqrasiyası ilə bağlı dediyim fikirləri bu gün mən daha geniş formada ictimaiyyətə çatdırıram, hesab edirəm ki, yeganə düzgün yoldur. Biz indi Avropa qurumlarının bəzilərinin üzvüyük, mən bunu qeyd etdim. Avropa İttifaqı ilə əməkdaşlıq zəminində əlaqələr qururuq və gələcəkdə də həm ikitərəfli formatda, həm Avropa İttifaqı ilə bu əsaslar üzərində öz işimizi qurmalıyıq".
Prezidentin elan etdiyi “Biz qürurlu ölkəyik, biz öz yolumuzla gedirik, heç kimə də bizim ehtiyacımız yoxdur, heç kimdən də asılı deyilik!” prinsipi ilə hərəkət ölkəmizin beynəlxalq arenadakı yerinə, nüfuzuna nə kimi təsir göstərib?
Qabil Hüseynli: “Ermənistan kimi vassal ölkəyə çevrilməyə məhz dik duruşumuz və qürurumuz imkan vermir”
Politoloq Qabil Hüseynli “Bakı-Xəbər”ə açıqlamasında bildirdi ki, ölkə başçısı müsahibəsində çox açıq mesajlar verdi: “Adətən ölkə başçıları bu cür detalları bir qədər pərdələyərək danışırlar. Ancaq İlham Əliyev hamının başa düşə bildiyi dildə danışıb, mövqeyini ortaya qoydu. Avropaya inteqrasiya Azərbaycanın balanslı siyasətinin tərkib komponenti olub. Hələ mərhum Heydər Əliyevin zamanından bu belə idi. İnsafən deyək ki, ölkəmiz bu yöndə ciddi addımlar da atıb. Ancaq biz görürük ki, Avropa qurumları bizim ora tam inteqrasiyamız üçün ciddi tələblər qoyurlar. Məsələn, Ümumdünya Ticarət Təşkilatına üzvlük. Azərbaycan hələ ki, özünü həmin quruma üzv olmağa hazır saymır. Bunun da başlıca səbəbləri vətəndaşlarımızın güzəranını düşünmək, daxili bazarı qorumaqla bağlıdır. Avropanın başqa bir tələbi isə budur ki, biz təbii qazı daxili bazarda neçəyə satırıqsa, onlara da həmin qiymətə sataq. Bu, mümkün olan məsələ deyil. Eləcə də ölkə başçısı bundan əvvəlki çıxışlarında da bildirdi ki, bizim mental dəyərlərimizə, milli-mənəvi bağlarımıza müəyyən müdaxilələrə cəhdlər edilir. Azərbaycan kiçik ölkə olsa da, bu məsələdə öz konkret mövqeyini ortaya qoyur. Bunu etməyi bacarmağın kökündə məhz kimdənsə asılılığımızın olmamsı dayanır. Məhz malik olduğumuz iqtisadi və siyasi gücümüz bizi digərlərinin yanında qürurlu davranmağa sövq edir. Belə göstərici ölkəmizin nüfuzunu artırır. Bizi beynəlxalq münasibətlər sistemində vacib aktora çevirmiş olur. Ancaq bunu doğru qəbul etməliyik. Heç də o anlama gəlməməlidir ki, Azərbaycan Avropa ilə əlaqələri tam kəsir. Elə deyil. Biz öz maraqlarımızın imkan verdiyi yerə kimi əməkdaşlığımızı edirik. Hesab edirəm ki, belə prinsipial mövqeyimiz həm də bizim gücümüzün, siyasi iradəmizin göstəricisidir. Ermənistan kimi vassal ölkəyə çevrilməyə məhz dik duruşumuz və qürurumuz imkan vermir”.
Məhəmmədəli QƏRİBLİ
