Dekabrın 23-də Azərbaycanda bələdiyyə seçkiləri keçirilib. Baki-xeber.com xəbər verir ki, respublika üzrə 1606 bələdiyyə üzrə 15156 üzv seçilməsi nəzərdə tutulmuşdu.
Bələdiyyə seçkisi işğal altındakı 7 seçki dairəsi istisna olmaqla, ümumilikdə, 118 seçki dairəsini əhatə edib. Ümumilikdə, seçkilərdə 41 462 namizəd iştirak edib. MSK sədri Məzahir Pənahovun dekabrın 22-də keçirilən mətbuat konfransında verdiyi məlumata görə, 13 siyasi partiyanın nümayəndələri namizəd kimi qeydə alınıblar.
Namizədlərin 3-də 1-i 13 siyasi partiyanın nümayəndələri, 3-də 2-si isə namizədliklərini özləri irəli sürən vətəndaşlardır.
Seçkini izləmək üçün qeydiyyatdan keçən yerli müşahidəçilərin sayı 52 min 636 nəfər olub. Bələdiyyə seçkilərini izləmək üçün 17 beynəlxalq müşahidəçi akkreditasiyadan keçib.
Gün ərzində açıqlanan rəsmi rəqəmlərə görə, bələdiyyə seçkiləri yüksək seçici fəallığı ilə keçib və seçki baş tutmuş hesab edilir.
Mərkəzi Seçki Komissiyasının İnformasiya Mərkəzi xəbər verir ki, bələdiyyə seçkilərində respublika üzrə seçici fəallığı 32,72 faiz təşkil edib. Belə ki, saat 19:00-a olan məlumata görə, səs vermiş seçicilərin sayı 1 627 064 nəfər təşkil edib. Ümumilikdə, səsvermə üçün siyahıya daxil olmuş seçicilərin sayı 4 972 356 nəfərdir.
Qeyd edək ki, Azərbaycanda ilk bələdiyyə seçkisi 1999-cu ildə keçirilib. Bələdiyyə üzvlərini ölkəmizdə 5 ildən bir seçirlər. Hazırkı seçki sayca 5-ci bələdiyyə seçkisidir.
Beynəlxalq təşkilatlar seçki ilə bağlı qənaətlərini və rəylərini artıq açıqlamağa başlayıblar. İlk rəy
MDB Parlamentlərarası Assambleyasından gəlib. Rəy müsbət olub.
MDB Parlamentlərarası Assambleyasının iştirakçısı olan dövlətlərdə demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi beynəlxalq institutunun (PAA DİMBİ) Bakı filialının əməkdaşları bələdiyyə seçkilərini müşahidə ediblər. Təşkilatdan verilən məlumata görə, 30-a yaxın seçki məntəqəsində yerli müşahidəçi qismində bələdiyyə seçkilərində səsvermənin təşkili və keçirilməsini müşahidə ediblər. Müşahidə aparılan seçki məntəqələrində heç bir qanun pozuntusuna rast gəlinməyib.
Ümumən rəy və konkret məlumatlar göstərir ki, səsvermə baş tutub, ölkə üzrə seçicilərin mütləq əksəriyyəti seçkidə iştirak edib.
“Bələdiyyə seçkiləri başa çatdı. İnanıram ki, Yeni Azərbaycan Partiyasının namizədləri seçicilərin səslərinin çoxunu qazanaraq yenə də seçkilərin qalibi ola biləcək. Bu inam hər şeydən əvvəl ölkədə uğurla həyata keçirilən Prezident İlham Əliyevin siyasətinə və onun hamı tərəfindən yüksək qiymətləndirilən nəticələrinə əsaslanır. Azərbaycanın böyüyən iqtisadiyyatı, insanların artan rifahı, şəhərlərin və kəndlərin dəyişən və müasirləşən siması, insanlara rahatlıq gətirən infrastruktur layihələri, ordumuzun güclənməsi və sair möhtəşəm nailiyyətlərimiz seçkilərdə qələbəmizin obyektiv əsaslarıdır”.
Bu fikirləri Azərbaycan Respublikası Baş nazirinin müavini, Yeni Azərbaycan Partiyası sədrinin müavini - icra katibi Əli Əhmədov deyib.
Əli Əhmədov bildirib ki, Yeni Azərbaycan Partiyasının çoxminli fəallarının, xüsusilə də gənc könüllülərin seçki təşviqatında fəal iştirakını, qələbə naminə göstərdikləri fədakarlığı ayrıca qeyd etmək istəyir: “Qarşıda isə bələdiyyələrə seçilənlərin xalqa ləyaqətlə xidmət etməsi kimi böyük məsuliyyət və vəzifə dayanır. Şübhə etmirəm ki, Yeni Azərbaycan Partiyasını bələdiyyələrdə təmsil edən üzvləri öz məsuliyyətini lazımınca dərk edəcək, insanlara layiqincə xidmət göstərəcək, xalqın onlara göstərdiyi etimada layiq olmağa çalışacaqlar. Bələdiyyələrə üzv seçilənləri təbrik edir, seçki kampaniyasında yaxından iştirak edən və əsl fədakarlıq göstərən partiya təmsilçilərinə təşəkkürümü bildirirəm”.
Xəbər xidməti
