Xəbər verildiyi kimi, Azərbaycanda 2020-ci il fevralın 9-da keçiriləcək növbədənkənar parlament seçkilərində iştirak edəcək siyasi partiyaların sayı 11-ə çatıb.
Mərkəzi Seçki Komissiyasının (MSK) son iclasında növbədənkənar parlament seçkilərində iştirak etmək üçün müraciət edən 2 siyasi partiyanın səlahiyyətli nümayəndələrinin qeydiyyata alınması məsələsinə baxılıb. İclasda Vahid Azərbaycan və Ana Vətən partiyalarının səlahiyyətli nümayəndələri qeydə alınıb.
Xatırladaq ki, bundan əvvəl növbədənkənar parlament seçkilərində iştirakla bağlı MSK-ya 9 siyasi partiya müraciət etmişdi. Bunlar Yeni Azərbaycan Partiyası (YAP), Ümid Partiyası və Vətəndaş Həmrəyliyi Partiyası (VHP), Böyük Quruluş Partiyası, Bütöv Azərbaycan Xalq Cəbhəsi Partiyası, Milli Dirçəliş Hərəkatı Partiyası, Azərbaycan Milli İstiqlal Partiyası, Azərbaycan Demokrat Partiyası, Böyük Azərbaycan Partiyasıdır.
Maraqlıdır ki, hamıdan əvvəl namizədlərini cəmiyyətə açıqlayan və seçkidə iştirakını bəyan edən Müsavat Partiyasının adı MSK-nın elan etdiyi siyahıda yoxdur. Müsavatın daxilindəki mənbələrimizdən əldə etdiyimiz məlumata görə, partiyanın seçkilərdə iştirakla bağlı MSK-ya müraciət etməməsinin arxasında müəyyən maraqlar durur. Bildirilir ki, partiyadan deputat seçilmək şansı olan bəzi funksionerlər bununla bağlı şərt irəli sürüblər. Onlar iddia edirlər ki, fərdi qaydada deputat seçilmək şansları var, ancaq partiya təmsilçisi kimi rəsmiləşmiş qaydada parlamentə düşsələr, onda dövlət büdcəsindən Müsavatın maliyyələşməsi həyata keçirilməlidir. Özünü şanslı sayan müsavatçılar hesab edirlər ki, məhz bu amil onlara deputat seçilmək üçün müəyyən maneçiliklər törədə bilər. Müsavatın bu taktikası ilə bağlı özlərinin və kənar ekspertlərin mövqeyi necədir?
Məhərrəm Zülfüqarlı: “Görünür, son mühacir qalmaqalına görə Müsavatın sənədlərində ciddi problemlər olduğu üçün, ora rəsmi müraciət etmək istəmir”
Seçki prosesləri ilə bağlı kifayət qədər təcrübəsi olan professor Məhərrəm Zülfüqarlı “Bakı-Xəbər”ə açıqlamasında bildirdi ki, bunun bir sıra səbəbləri ola bilər: “Bilirsiniz ki, Azərbaycanda seçki partiya siyahısı üzrə keçirilmir. Yəni yalnız majoritar qaydadadır. 2000-ci ilə qədər isə hər iki qaydada seçkilər keçirilirdi. Yəni seçicilər həm da bülletendə partiyaların adına səs verirdilər. Toplanan səslərin faizinə görə, partiyaların siyahısına uyğun şəkildə deputatlar Milli Məclisdə təmsil olunurdular. İndisə partiya siyahısının elan olunması simvolik məsələdir. Yəni hansı dairədən kimin namizədliyinin verilməsini partiya müəyyənləşdirir və bütün üzvlərinə çağırış edir ki, həmin namizədi müdafiə etsinlər. Ancaq bu da var ki, partiyanın seçkilərdə iştirakla bağlı MSK-dan qeydiyyatdan keçməsi proseduru da bir qədər fərqlidir. Onda partiyanın seçkilərdə iştirakı tam rəsmiləşmiş olur. MSK-ya təqdim olunan sənədlərdə partiyanın səlahiyyətli nümayəndələrinin adları təqdim olunur. Onlar partiyanın adından MSK-da danışırlar. Mənə elə gəlir ki, Müsavatın MSK-ya müraciət etməməsi səbəbinin biri də sənədlərinin qaydada olmamasıdır. Belə olan halda, partiyadan maliyyə hesabatı tələb olunur. Görünür, son mühacir qalmaqalına görə Müsavatın sənədlərində ciddi problemlər olduğu üçün, ora rəsmi müraciət etmək istəmir”.
Gülağa Aslanlı: “Bütün variantlardan istifadə edəcəyik”
Müsavat başqanının müavini Gülağa Aslanlı isə qəzetimizə açıqlamasında bu məsələ ilə bağlı bir qədər mücərrəd fikir bildirdi. Onun sözlərinə görə, seçkilərdə həm partiya, həm də üzvlərinin müstəqil şəkildə iştirakında maraqlıdırlar: “Bütün variantlardan istifadə edəcəyik. Həm də namizədlərə səlahiyyət verəcəyik ki, kim istəsə, sənədlərini müstəqil təqdim etsin, kim də istəsə, partiya adından. Artıq müəyyən sənədləri MSK-ya təqdim etmişik. Buna baxmayaraq, bütün namizədlər partiya tərəfindən irəli sürülür”.
Məhəmmədəli QƏRİBLİ
