2020-ci ildə formalaşdırılacaq yeni parlamentə düşmək istəyənlərin sayı o qədər çoxdur ki, adam təəccüblənir. Azərbaycanda keçiriləcək parlament seçkilərində namizədliyini irəli sürənlər, deputatlıq iddiasında olan insanların əksəriyyəti Mərkəzi Seçki Komissiyasına müraciət etməzdən əvvəl öz təbliğatlarına sosial şəbəkələrdən başlayıblar.
Çoxu hesab edir ki, sosial şəbəkələr vasitəsilə təbliğat daha ucuz başa gəlir və buna görə də onlar xərc çəkib plakat, broşür çap etməkdənsə, bu yolu tuturlar. Əlbəttə, öz işləridir, biz onların seçiminə başqa cür yanaşa bilmərik. Diqqətimizi çəkən başqa məsələdir. Deputatlığa iddialı olan və öz reklamını, təbliğatını sosial şəbəkələr vasitəsilə quran insanların bəzilərinin təqdim etdikləri plakat və platformanın qəribəliyi diqqətimizi çəkdi. Bəziləri öz ad, ata adı və soyadlarının baş hərflərinə uyğun xüsusi cümlələr, ifadələr qururlar, digərləri öz adlarını daha iri şriftlərlə, ala-bula şəkildə verirlər, başqa biriləri isə savadsız statusları ilə diqqəti cəlb edirlər. Deputatlığa iddialı olanlardan biri öz adını, atasının adını və soyadını az qala krosvordvari təqdim edib. Onun təqdim etdiyi platformaya baxdıqda adama elə gəlir ki, bu namizədin platformasını əks etdirən plakatın üzərində beş-altı dilçi, filoloq işləyib. Söz yox ki, burada ifadə olunan sözlərin bir çoxunun mənasızlığı diqqəti çəkir.
Qarşıdan gələn parlament seçkilərində bu cür platformaların seçiciləri cəlb etmək gücü nə qədərdir? Bu insanlar bu şəkildə apardıqları kampaniya, piarla özlərinə elektarat toplaya bilərlərmi? Əlbəttə, suallar çox olduğu kimi, onların cavabları da çoxdur.
Ekspertlər hesab edirlər ki, deputatlığa namizədlərin təqdim etdiyi platformanın yığcamlığı, lakonikliyi və dəqiq məna ifadə etməsi, onun siyasi təsir gücü olması vacibdir. Siyasətə heç bir aidiyyəti olmayan və siyasi kampaniyalarda iştirak etməyən, piar aparmağın yollarını bilməyən şəxslərin “cəlbedici” platformalar təqdim etməsi normaldır. Ümumiyyətlə, bəzi insanlar elə bilir ki, platformasının hazırlanmasında nə qədər qiymətli sözdən, zərb-məsəldən istifadə etsə, bir o qədər seçici cəlb edə və səs qazana bilər. Amma reallıqlar bunun tam əksini deməyi təlqin edir. Bir insanın özünün adının, soyadının, atasının adının baş hərfləri ilə başlanan xüsusi ifadələr quraşdırması və bunu öz platformasına daxil etməsi heç də onun real seçici cəlb etmək imkanlarını ortaya qoya bilməz. Bilirik ki, bu cür platformalar sosial şəbəkələrdə müzakirə edilir, bəzən lağ obyektinə, tənqid hədəfinə çevrilir. Gizlin deyil ki, bu cür platformaları təqdir edən azdır, o da həmin şəxslərin öz ətrafıdır.
“Bu cür plakatların təsir gücü zəifdir”
Siyasi şərhçi Azər Həsrət “Bakı-Xəbər”ə bildirdi ki, çox zaman təqdim edilən bu cür platformalar reallığı əks etdirmir, onu kimlərsə montajla quraşdıraraq, o insanı lağ obyektinə çevirmək istəyir: “Bu cür platformaları sosial şəbəkələrdə mən də görürəm və hesab edirəm ki, onların çoxu quraşdırılmış ola bilər. Bir qrup şəxs, xüsusən də troll ordusu bəzi şəxsləri hədəfə almaq üçün belə plakatlar hazırlayıb paylaşımlar edir. Çünki bəziləri bu addımı atırlar və seçkidə iştirak edən insana qarşı bunu edirlər. Bilirsiniz, seçkidir və hər kəs də öz bildiyi, bacardığı şəkildə plakat hazırlayır. Bununla belə, bu cür plakatların təsir gücü zəifdir. Amma bu plakatları, platformaları dövriyyəyə buraxan və onları lağ obyektinə çevirənlərin məramları heç də xoş deyil”.
A.Həsrət vurğuladı ki, onun özü ilə bağlı da belə paylaşımlar edirlər. Halbuki, özünün bu plakatdan xəbəri olmadığını deyən A.Həsrət vurğuladı ki, 2010-cu ildə deputatlığa öz namizədliyini 34 saylı Xətai II seçki dairəsindən verib və indi bəziləri həmin plakatın fotosunu paylaşıb onu hədəfə almaq istəyirlər. “Bu şəklin də altına hərə bir söz yazıb bu şəkli lağlağıya çevirmək istəyirlər. Əslində, bu plakatları paylaşan adamlar cəmiyyəti yanıltmaq məqsədi güdürlər. Şəxsən özüm də seçkiyə qatılmaq niyyətindəyəm, amma bunu hələ rəsmi şəkildə həyata keçirməmişəm, bu səbəbə və deputatlığa rəsmən qeydiyyata alınmadığıma görə hər hansı plakat, broşür, hər hansı təbliğat materialı hazırlayıb yaya bilmərəm, bu, qanunla da yasaqdır. Sadəcə olaraq, bir qrup adam bəzi insanların ya köhnə təşviqat materiallarını, ya da özlərinin düzüb qoşduqları saxta plakatları kimlərinsə adına paylaşıb cəmiyyəti çaşdırmaq istəyir. Əlbəttə, bu yolverilməzdir. Bu o nəticəni verə bilər ki, plakatları yayılan şəxslər namizədliyinin qeydə alınması üçün Mərkəzi Seçki Komissiyasına müraciət edərkən qurum onları vaxtından əvvəl təşviqat kampaniyası aparmaqda ittiham edə bilər” - deyə A.Həsrət vurğuladı.
İradə SARIYEVA
