Azərbaycan həssas məqama qədəm qoyub. Ölkədə növbədənkənar parlament seçkilərinin keçirilməsilə bağlı qərar qəbul edilib. Bəllidir ki, belə proseslərin cərəyan etdiyi zamanlarda ölkədə siyasi aktivlik artır. Növbəti parlament seçkiləri və ona hazırlıq dönəmi qış fəslinə təsadüf etsə də, ictimai hərarətin yüksəkliyi nəzərə çarpır.
Müstəqillik əldə etdikdən sonra biz ölkəmiz üçün həssas olan məqamlarda daxili işlərimizə xaricdən müxtəlif formalarda müdaxilə cəhdlərini müşahidə etmişik. Belə təzyiqlərin bir çox hallarda şimal qonşumuz olan Rusiyadan start götürdüyünün də az şahidi olmamışıq. Hazırda da buna bənzər hadisələrin baş verdiyini izləyirik. Məsələn, Rusiyanın sabiq senatoru, əslən azərbaycanlı olan milyarder Fərhad Əhmədov birdən-birə Azərbaycan hakimiyyətinə özünün “yol xəritəsini” təqdim edir. Həmin sənəddə ölkənin oturuşmuş bütün siyasi institutlarını tənqid, bəzən isə təhqir də edir. Əksər analitik F.Əhmədovun məhz indiki məqamda bu şəkildə fəallaşmasını təsadüf saymır. Çünki indiyə qədər siyasi aktivliyi ilə diqqəti çəkməyən milyarderin birdən-birə böyük məqalə “yazması” həm də ciddi şübhələrə yol açır. Məsələyə münasibət bildirən bir çox ekspert həmin yazının F.Əhmədov tərəfindən yazıldığına şübhə ilə yanaşır. İddia olunur ki, məlum yazı hansısa beyin mərkəzinin ekspertləri tərəfindən hazırlanıb və ölkəmizə təzyiq vasitəsi üçün nəzərdə tutulur. Biz məhz F.Əhmədovun paylaşımlarının aşağısında gedən diskussiyalarda milyarderin şəxsən iştirak etdiyini də izləmişik. Oradan görünür ki, F.Əhmədov həm rus, həm də Azərbaycan dilində yazarkən kobud qrammatik səhvlərə yol verir. Bu da məlum yazının müəllifinin milyarderin olmadığı ilə bağlı səslənən fikirlərə haqq qazandıran detal sayıla bilər. Bir faktı da qeyd edək ki, F.Əhmədovun bu addımı Rusiyanın təkidilə atdığı qənaətində olanlar da az deyil. Ancaq hazırda Rusiyanın niyə Azərbaycana təzyiq etmək istəməsi də dərin sual kimi bizi düşündürməlidir. Çünki mövcud vəziyyətdə iki ölkə arasındakı münasibətlər çox yaxşıdır və normal məcrada davam edir. Hətta qeyd olunur ki, iki ölkə arasındakı əlaqələrin strateji tərəfdaşlıqdan strateji müttəfiqlik fazasına keçməsi də gözlənir. Onda bu qənaətə gəlmək olar ki, bu təzyiqlərin arxasında Rusiyada Putinə bağlı olmayan başqa dairələr durur. Çünki hazırkı situasiyada Rusiya üçün Azərbaycana hansısa formada təzyiqlər göstərmək məqbul sayılmır.
Biz ideya rəhbərlərinin Rusiyada oturduğu və Ermənistanın əli ilə reallaşdırılan başqa bir təzyiq metodunun da şahidi oluruq. Ermənistan hazırkı məqamda bizə təzyiq etmək üçün “talış kartından” istifadə etməyə çalışır. Rusiyada yaşayan və şərəfli talış xalqının adından sui-istifadə edərək müəyyən oyunlara girən, daha doğrusu, ermənilərə əl buyruqçuluğu edən bir neçə talış əsilli şəxsin Ermənistana toplaşdığı bildirilir.
İsmayil Şabanov, Zəhləməddin İbrahimov, Elşən Həsənov və Rüstəm, Zabil Məhərrəmov Ermənistan Milli Təhlükəsizlik Xidmətinin (MTX) onlar üçün İrəvanda xüsusi təşkil etdiyi “elmi konfrans”a yollanıblar. O da məlum olub ki, Moskvadan İrəvana bütün yol xərclərini, eləcə də onların Ermənistanda qalma xərclərini, habelə Zabil Məhərrəmova, İsmayıl Şabanova pul mükafatlarını da MTX ödəyib. İrəvanda onları qarşılamış və “elmi konfrans”ın təşkilatçısı kimi ictimaiyyətə tanıdılmış İrəvan Dövlət Universitetinin kafedra müdiri Vardan Voskanyan isə MTX-nin agenti və bu xidmətin keçmiş direktoru Artur Vanetsyanın yaxın adamıdır. Bu məlumat işarənin hara yönəldiyini açıq göstərir. Deməli, Azərbaycana indiki məqamda Rusiyadan qaynaqlanan təzyiqləri heç də Moskvanın rəsmi hakimiyyəti ilə əlaqələndirmək düzgün deyil. Aydın şəkildə görünür ki, bu işin arxasında Rusiyada güclü olan erməni diasporu və Ermənistan hakimiyyətinin birgə işbirliyindən doğan fəaliyyət durur.
Məhəmmədəli QƏRİBLİ
