Milli Elmlər Akademiyasının prezidenti Ramiz Mehdiyev İlham Əliyev haqqında yazdığı kitabda qeyd edib ki, Azərbaycanda yeni idarəçilər elitası formalaşır. Kitabın fəsillərindən biri olan "Azərbaycanın inkişafını XXI əsrin çağırışlarına uyğunlaşdıran Lider" başlıqlı məqalə Milli Elmlər Akademiyasının veb səhifəsində çap olunub.
Ramiz Mehdiyev məqalədə Prezident Administrasiyasında işlədiyi illər ərzindəki müşahidələrinə əsaslandığını qeyd edib. Məqalədə deyilir ki, Prezident İlham Əliyev dövlət idarəçiliyi sistemində islahatlar aparır, dövlət orqanlarında çalışanları və dövlət qulluqçularını "Qərbdə və Cənubi Asiya ölkələrində ən yaxşı ali məktəblərdə təhsil almış gənc mütəxəssislər hesabına yeniləyir. Yeni idarəçilər elitası formalaşır. Futuroloqların proqnozlarına görə, 2025-ci ilə qədər sabit inkişaf edən ölkələrdə, o cümlədən, Azərbaycanda "common brain" ("ümumi beyin") deyilən tamamilə yeni siyasi elita formalaşacaq. Bu, hər hansı radikallıqdan, dağıdıcı inqilabilikdən uzaq olan yüksək intellektli və praqmatik funksionerlərin ciddi strukturlaşdırılmış, iyerarxiya baxımdan nizamlanmış vahid komandası olacaq".
R.Mehdiyev yazır ki, bu komandaya hazırkı Prezident İlham Əliyev başçılıq edəcək və o, "idarəetmə sisteminin əsas rəhbəri funksiyasını yerinə yetirməkdə davam edəcək".
R.Mehdiyevin haqqında söz açdığı “common brain" ("ümumi beyin") deyilən tamamilə yeni siyasi elitanı ətraflı nəcə təsəvvür etmək olar?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, məqalə ilə tanışdır və orada dərin təhlilin aparıldığını söyləyə bilər: “Sizin verdiyiniz sual da çox maraqlıdır. Hər halda, Azərbaycan siyasi aləmi üçün yeni bir formasiyanı, yanaşmanı özündə ehtiva edən yeni termindir.
İlk növbədə, gənclərin dövlət idarəçiliyinə cəlb edilməsi məsələsinə toxunmaq istərdim və deyəcəyim budur – bütün bunları çoxdan həyata keçirməli idik. Niyə məhz bu qənaətdəyəm? Sadə bir səbəb var. Təsəvvür edin, vətəndaşlarını bütün dünyadan təcrid etmiş bir sistem, SSRİ adlı bir məkan çökür. Yeni sistemə keçid isə başqa meyarlar, başqa yanaşma tələb edir. Bu zaman dünya təcrübəsində tətbiq edilən yeni iqtisadi-siyasi modelin daşıyıcılarının prosesə cəlb edilməsinə ehtiyac yaranır. Belə mütəxəssislərsə uzun müddət yox səviyyəsində olub.
İndiki halda, vəziyyət tamam başqadır. Azərbaycanın dünya iqtisadi-siyasi məkanına inteqrasiyasını təmin etməkdən ötrü artıq digər inkişaf etmiş ölkələrdə yüksək səviyyəli təhsil almış gənclər ordusu formalaşıb. Bax, bu gəncləri və yerlərdə təhsil almış perspektivli gəncləri dövlət idarəçiliyinə cəlb etməklə çox səmərəli layihələr işləyib həyata keçirmək olar.
İnqilabiliyin özü isə yaxşı mənada dağıdıcı olmalıdır. Yəni köhnə sistemi silib yerində yenisini qurmaq özü inqilab etməyə bərabər bir məsələdir. Lakin burada məsələ təkcə gənclərin dövlət idarəçiliyinə cəlb edilməsi ilə bitmir. İlk növbədə, ölkənin siyasi rəhbərliyinin iradəsi ortaya qoyulmalı, bütün bunların mərhələli şəkildə həyata keçirilməsi üçün şərait yaradılmalıdır.
Əlbəttə ki, gənclərə edilən “stavkanı” dəstəkləyirəm. Amma etiraf edək ki, onlardan həmən nəyisə düzəldib ortaya qoyacaqlarını gözləmək də olmaz. Dövlət idarəçiliyində əsas göstəricilərdən biri təcrübədir ki, bu da zamanla qazanılacaq.
Ümumilikdə isə prosesləri alqışlayır, gənclərimizə ölkəmizin inkişafı yolunda imza atacaqları qələbələrdə uğurlar arzulayıram”.
Partiya sədrinin sözlərinə görə, “common brain” dediyiniz yeni konsepsiya isə dünya iqtisadiyyatı, siyasəti üçün yeni termindir: “Bu termin özündə intellektual potensialdan istifadə etmək şərtilə dünyanın iqtisadi-siyasi məkanına inteqrasiyanı nəzərdə tutmaqla bərabər, həm də dünyanı idarə edə biləcək vahid bir məkana qoşularaq səyləri bu istiqamətdə birləşdirmək anlamına gəlir”.
Məhəmmədəli QƏRİBLİ
