Prezident İlham Əliyev MDB dövlət başçılarının Aşqabad görüşündəki mühüm siyasi çıxışı ilə Ermənistanın yürütdüyü siyasətin heç bir arqumentə söykənmədiyini bir daha göstərdi. MDB dövlət başçılarının Aşqabaddakı görüşündə növbəti dəfə qeyri-adekvat mövqe nümayiş etdirən Ermənistanın Baş naziri Nikol Paşinyan Azərbaycan Prezidenti İlham Əliyevin həmin görüşdəki çıxışından sonra onun arqumentləri qarşısından geri çəkilməyə məcbur oldu.
Azərbaycan Prezidentinin MDB dövlət başçılarının Aşqabad sammitində erməni əsilli faşist canisi Hitlerin yaxın silahdaşı olan Qaregin Njdeyə İrəvanda illər öncə qoyulmuş heykəlin hələ sökülməməsi məsələsini qaldırmaqla Ermənistanın faşizmə olan sevgisini tədbir iştirkaçılarının diqqətinə çatdırdı. Ölkə başçısı öz çıxışı ilə Ermənistanın faşizmi himayə edən dövlət olduğu təəssüratını nə dərəcədə yarada bildi?
Politoloq Nəzakət Məmmədova hesab edir ki, bu çıxışın faşizm üzərində qələbənin 75 illiyinin yaxınlaşdığı ərafədə gündəmə gətirilməsi çox yerinə düşdü: “Prezident İlham Əliyevin MDB dövlət başçılarının məhdud tərkibdə iclasındakı çıxışında Azərbaycan xalqının Böyük Vətən müharibəsi illərində qələbənin qazanılması üçün gördüyü böyük işləri, arxa cəbhədə xalqımızın fədakarcasına qələbəyə verdiyi töhfələri, onun yorulmaz əməyini xüsusi vurğuladı. Prezident İlham Əliyevin bu çıxışı olduqca təqdirəlayiqdir. Çünki burada faşizm üzərində qələbənin qazanılması naminə görülən işlər xüsusi vurğulanıb, faktlarla əsaslandırılıb. Bu çıxış hər bir vətənpərvər Azərbaycan vətəndaşının ürəyindən olan çıxış idi. Çünki biz, xüsusilə son dövrlərdə sosial şəbəkələrdə insanların müzakirəsi zamanı qələbədən söz düşəndə Azərbaycan xalqının böyük zəhməti, xüsusilə də Bakı neftinin qələbənin qazanılmasındakı əvəzsiz rolundan danışıldığının, lakin Bakıya qəhrəman şəhər statusu verilməməsinin insanlarımızın böyük haqsızlıq hesab etdiklərinin şahidi oluruq. Bu baxımdan, böyük qələbənin 75 illiyi ərəfəsində MDB Dövlət Başçıları Şurasının iclasında Prezidentin öz çıxışını həm də bu məsələ üzərində durması olduqca təqdirəlayiqdir. MDB məkanında, xüsusən Ermənistanda faşizmin qəhrəmanlıq kimi qələmə verilməsinin yolverilməzliyi, xüsusilə İrəvanın mərkəzində faşist cəlladı və satqın, Qaregin Njde ləqəbi ilə alman faşistlərinə xidmət etmiş Qaregin Ter-Arutyunyana 6 metrlik heykəl qoyulması da Prezident İlham Əliyev tərəfindən kəskin qınağa məruz qalıb. Ermənistan baş naziri Paşinyanın da iştirak etdiyi iclasda Prezident İlham Əliyev bu çıxışı ilə Valdaydakı məşhur tarixi çıxışdan sonra Ermənistan baş nazirini növbəti dəfə diplomatik nokauta saldı və həmin ölkənin faşist mahiyyətini tam üzə çıxardı”.
Məhəmmədəli QƏRİBLİ
