21/11/2019 20:31
728 x 90

“Valday”dan sonra Paşinyana növbəti diplomatik zərbə - Prezident Əliyev hücumu inamla davam etdirir...

img

Prezident İlham Əliyev “Valday” Beynəlxalq Diskussiya Klubundakı çıxışında Ermənistan Baş naziri Nikol Paşinyanın səsləndirdiyi məsuliyyətsiz bəyanatlara da tutarlı cavab verib. Azərbaycan Prezidentinin xüsusilə Ermənistan Baş nazirinin “Qarabağ Ermənistandır və nöqtə” bəyanatına turarlı, əsaslandırılmış cavabı İrəvanda böyük səs-küyə səbəb olub.

Azərbaycan liderinin “Valday” klubundakı “Qarabağ tarixi Azərbaycan torpağıdır. Beləliklə, Qarabağ Azərbaycandır və nida işarəsi” bəyanatı işğalçı ölkədə ciddi təşviş yaratdı. Paşinyan hakimiyyəti beynəlxalq platformalarda Ermənistanın maraqlarını yetərincə müdafiə edə bilməməkdə, səriştəsizlikdə ittiham edildi. Hətta erməni analitiklər də etiraf etdilər ki, Azərbaycan Prezidentinin “Valday”dakı sanballı, məntiqli bəyanatı Paşinyana siyasət, geosiyasət, tarix və diplomatiya dərsi oldu.

Bu dəfə isə Prezident İlham Əliyev Ermənistana növbəti zərbəni MDB Dövlət Başçıları Şurasının iclasında vurub. Prezident İlham Əliyev Ermənistanın yeni hakimiyyəti tərəfindən İrəvanda nasist ideologiyasının tərəfdarı Qaregin Njdenin abidəsinin sökülməməsi məsələsinə toxunub. Prezident Əliyev müharibə illərində Azərbaycan xalqının rolunu, MDB liderlərinin dəfələrlə faşistlərin qəhrəmanlaşdırılmasına qarşı çıxış etdiklərini xatırladıb.

"Təəssüf ki, MDB məkanında, xüsusilə də Ermənistanda belə hal baş verir. Əvvəlki hakimiyyət tərəfindən İrəvanın mərkəzində Qaregin Njde ləqəbi ilə alman faşistlərinə xidmət etmiş cəllad və xain Qaregin Ter-Arutyunyanın abidəsi ucaldılıb", - deyə Azərbaycan Prezidenti qeyd edib.

Dövlət başçısı, həmçinin, Rusiya Xarici İşlər Nazirliyinin nasizmin qəhrəmanlaşdırılması ilə bağlı vəziyyətə dair may hesabatından sitat gətirib. Hesabatda deyilirdi ki, Njdenin nasistlərlə əməkdaşlıq etməsi barədə məlumatlar var.

Əliyev xatırladıb ki, Njde sonradan Sovet hakimiyyəti tərəfindən tutulub və Vladimir şəhərindəki həbsxanada ölüb.

"Təəssüf ki, Ermənistanın yeni hakimiyyəti bu abidəni sökmədi. Hesab edirəm ki, MDB məkanında faşizmin qəhrəmanlaşdırılmasına yer yoxdur", - deyə İ.Əliyev vurğulayıb.

Azərbaycan Prezidentinin bu bəyanatı 1941-1945-ci illər Böyük Vətən Müharibəsində sovet xalqının qələbəsinin 75 illiyi ərəfəsində faşizmi tərənnüm edən Ermənistanın növbəti ifşası kimi dəyərləndirilir.

Məsələyə münasibət bildirən Rusiya Dövlət Dumasının deputatı Dmitri Savelyev hesab edir ki, Moskva İkinci Dünya Müharibəsinin tarixini təkrar yazmaq istəyənlərə layiqli cavab verməlidir. D.Savelyev Armavir şəhərində (Krasnodar diyarı) nasistlərin tərəfdarı Qaregin Njdeyə memorialın ucaldılmasından hiddətlənib və bunu cinayət adlandırıb.

“Bizim xalqımız onilliklər ərzində özünü həqiqi xilaskar xalq hesab edib. Məhz rus qoşunları minlərlə kilometr piyada yol qət edərək faşistləri Berlinə qədər Avropanın təqribən bütün şəhərlərindən çıxarıblar. Tarixi miqyasda o qədər də çox il ötməyib və bizə necə cavab verirlər? Xilaskar sovet əsgərinin abidəsini məqsədli şəkildə dağıdırlar. Sovet xalqının igidliyi, əcdadlarımıza bunun nəyin bahasına başa gəlməsinə dair narahat xatirə Qərbə lazım deyil. Lakin müqəddəs yer boş qalmır. Ermənistanda Qaregin Njdenin abidəsi ucaldıldı. Onun nasistlərin adamı olması, Qırmızı Ordunun arxa cəbhəsində diversiyalar törətmək məqsədilə Bolqarıstanda agentləri cəlb etməsinə dair rəsmi sənədlər var. Amma onun abidəsini ucaldırlar”, - Savelyev “İnterfaks-Azərbaycan”a bildirib.

Onun sözlərinə görə, Krasnodar diyarının Armavir şəhərində Njdenin memorialının ucaldılmasını öyrənərkən daha çox hiddətlənib.

“Fikrimcə, bu cinayət “nasizmin reabilitasiyası” kimi qiymətləndirilməlidir, başqa cür deyil. Həm Rusiya, həm beynəlxalq qanunlara əsasən. Njdenin abidlərinin ucaldılması nasist cinayətkarın qəhrəmanlaşdırılmasıdır. Burada başqa fikirlər ola bilməz. Ermənistana qəhrəman lazımdırsa, niyə Sovet İttifaqı marşalı və iki dəfə Sovet İttifaqı Qəhrəmanı, nasistləri Cənub-Qərb cəbhəsində məhv edən, sonra isə Belarus cəbhəsinə rəhbərlik edən Baqramyanı xatırlamırlar? Ermənistanın görkəmli, Böyük Qələbənin yaxınlaşdırılmasında ciddi rol oynayan qəhrəmanları var, amma nə üçün Njde kimi son dərəcə şübhəli şəxsiyyətləri pyedestala daşıyırlar. Bu, qeyd olunanların əsl səbəbi barədə düşünməyə vadar edir”, - o qeyd edib.

Savelyev əlavə edib ki, Rusiya bu cür təzahürlərə adekvat cavab verməlidir.

Baki-xeber.com

Son xəbərlər