19/11/2019 19:05
728 x 90

Sarkisyan separatçılarla Paşinyanın yeni qanlı savaşını başlatdı – Separatçılar Paşinyanı və “Sasna Tsrer”i fiziki məhv etməklə hədələdi

img

Dağlıq Qarabağ separatçıları ilə Nikol Paşinyan iqtidarı arasında onsuz də rəvan olmayan münasibətlərin son günlərdə yenidən kəskinləşməsi qeydə alınır. Özü də bütün bunlar Ermənistan eks-prezidenti Serj Sarkisyanın Azərbaycanın işğal olunmuş Qarabağ bölgəsi ərazisində bir sıra şəxslərlə ayın əvvəlində baş tutan görüşündən sonraya təsadüf edir.

Məlumata görə, görüş qondarma rejimin “təhlükəsizlik şurası”nın keçmiş sədri Vitali Balasanyan və keçmiş “müdafiə naziri” Levon Mnatsakanyanla olub. Halbuki, səfərdən öncə Sarkisyan Qarabağda heç kimlə görüşməyəcəyini və səfərinin yalnız şəxsi xarakter daşıdığını bildirmişdi. Amma məlum görüşlər bunun belə olmadığını təsdiqlədi və eyni zamanda separatçıların daha sərt şəkildə Paşinyana qarşı çıxmasına rəvac verdi. Hətta Vitali Balasanyan görüşdən sonra Paşinyanı və “Sasna Tsrer” terrorçularını fiziki məhv etməklə hədələyib.

Xatırladaq ki, bundan əlavə, Balasanyan Paşinyanı hakimiyyətə Qərbdəki “məşhur mərkəzlər”in gətirdiyini bildirib: “Elə onlar da Paşinyanı idarə edir və nə etməli olduğu barədə göstərişlər verirlər”. Balasanyan 2016-cı ildə İrəvanda post-patrul polisi alayının binasının “Sasna Tsrer” terrorçuları tərəfindən ələ keçirilməsini xatırladıb. Onun sözlərinə görə, Paşinyan binanın ələ keçirilməsindən sonra başlayan etirazları idarə etməyə cəhd göstərib. O, Paşinyanın bu yaxınlarda “Sasna Tsrer” partiyasının liderləri Qaregin Çuqaszyan və Jirayr Səfilyanla baş nazirin iqamətgahında görüşdüyünü bildirib. Qeyd edib ki, bu görüş başqa cür düşünənlərə təzyiq cəhdidir: “Nikol Paşinyan hamını, o cümlədən məni qorxutmağa çalışır. O özünün döyüşkən qanadının olduğunu mesaj verir. Demək istəyir ki, bir barmağının işarəsi ilə bizimlə fiziki haqq-hesab çəkərlər”. Qarabağ separatçısı Paşinyana və “Sasna Tsrer”ə xəbərdarlıq edib ki, belə söhbətlərə girişməsinlər, əks təqdirdə onlara cavab veriləcək: “Paşinyan və onun tərəfdarları qorxaqdırlar. Biz 2016-cı ildə o terrorçuları bağışladıq, öldürmədik. Ancaq indi bəyan edirəm ki, mənə, xalqımıza, dövlətimizə qarşı təxribat həyata keçirməyə cəhd göstərsələr, hamısını fiziki olaraq məhv edəcəyik”.

Balasanyan onu da vurğulayır ki, Paşinyan və rəhbərlik etdiyi hökumət dərhal istefaya getməlidir: “Xalq özünə gəlməli, istər “Mənim Addımım“, istər “İşıqlı Ermənistan“, istərsə də “Çiçəklənən Ermənistan“dan olsun, istisnasız bütün deputatları mandatını təhvil verməyə məcbur etməlidir. Əks təqdirdə bütün ermənilərin mövcudluğu sual altındadır. Nikol Paşinyan özü  böyük antiermənistan layihəsidir. Anlamayanlar da anlasınlar bunu”. Balasanyan Paşinyanı 2018-ci ildə hakimiyyət və parlamenti işğal etməkdə ittiham edib. Bununla bərabər, o, 2018-ci il parlament seçksini də qanunsuz adlandırıb. O, Paşinyanın bütün fəaliyyətlərinə görə cinayət məsuliyyətinə cəlb edilməli olduğunu deyib. Erməni ekspert Vahan Badasyan hesab edir ki, Balasanyanın indiki vaxtda belə fəallaşması Sarkiiyandan qaynaqlanır. Onun sözlərinə görə, Serj Sarkisyanın bu günlərdə Qarabağda olması və öz komanda yoldaşları, o cümlədən də Balasanyanla görüşməsini nəzərə alsaq, bu bəyanatlar təsadüfi deyil: “Serj Sarkisyan Qarabağdadır və öz komanda yoldaşlarını toplayıb. Daha dəqiq desək, öz komanda yoldaşlarını yox, öz mafiyasını - bu, tayfadır, Ermənistanı məhv edən tayfa. Vitali Balasanyan uzun müddət onlardan ayrılıb və böyük səylər göstərərək 2016-cı ildə bu tayfaya qoşuldu, onlara xidmət etməyə başladı. Kədərlidir, lakin faktdır. Qoy, bu insanların hamısı, o tayfanın bütün üzvləri tərcümeyi-hallarına və fəaliyyətlərinə baxsınlar, görsünlər ki, indiyə qədər Ermənistanı kim məhv edib”.
Vitali Balasanyanın Serj Sarkisyanla görüşdən ruhlanaraq bu kimi bəyanatlar verməsi ilə bağlı verilən suala Badasyan cavab verib ki, əlbəttə, o bundan ruhlanaraq belə bəyanatları verib.

Yaranmış vəziyyətdə Qarabağ separatçılarının gedişləri Paşinyanı yenidən təlaşa salıb. Bu vəziyyətdə o, ilk olaraq güc orqanları vasitəsilə separatçıların ona qarşı çıxan nümayəndələrini zərərsizləşdirməyi düşünür və bura Balasanyan da daxildir. Ermənistan Təhlükəsizlik Şurasının katibi Armen Qriqoryan bu xüsusda bildirib ki, artıqVitali Balasanyanın bəyanatlarında cinayətin olmasına dair hüquq-mühafizə orqanları müəyyən araşdırmalar aparır. Belə bir vaxtda Ermənistan parlamentində məlum aprel döyüşlərinin detallarını araşdıran İstintaq Komissiyasının sədri Andranik Köçəryan da olduqca maraqlı məlumatlar səsləndirib. O qeyd edib ki, Balasanyan aprel döyüşlərində səlahiyyətlərinə daxil olmayan fəaliyyət göstərib: “O həmin vaxt Silahlı Qüvvələrin əməlliyyatlarında hər hansı məsuliyyət daşımasa da, aprelin 2-də cəbhə xəttinə gedib və hüququ olmayan əmrlər verib. Bu mütləq araşdıralacaq. İndi, deyəsən, Qarabağ-Ermənistan intriqaları mərhələsinə daxil olmuşuq və bu, ordunun maraqlarından çıxış etməklə komissiyaya düzgün və obyektiv məlumat verməli olan insanlara mane ola bilər”. Bu durumda erməni politoloq Armen Badalyan Balasanyanın Paşinyan tərəfindən həbsə atılacağını istisna etmir: “Vitali Balasanyana qarşı cinayət işlərinin açılması istisna edilmir. Balasanyan artıq “dövlət vəzifəsi” tutmur, lakin o, Qarabağdakı rejimin “siyasi elitası”nın bir hissəsini təşkil edir. İstənilən halda, Balasanyana qarşı cinayət işlərinin açılması istisna edilmir. Məsələn, deyə bilərlər ki, o hansısa oyuncağı “oğurlayıb”. Bu, hazırkı hüquq-mühafizə sistemi tərəfindən qəbul edilmiş üslubdur və hakimiyyət tərəfindən arzuolunmaz şəxslər barəsində tətbiq edilir”. Politoloq bildirib ki, bununla Paşinyan həm də Balasanyanı gələn il separatçı rejim tərəfindən keçiriləcək “prezident seçkilərindən” də uzaq saxlaya biləcək. Amma separatçıların bütün bunlara qarşı müqaviməti Paşinyanla onlar arasında münsibətlərin artıq qanlı məcrada inkişaf edəcəyini istisna etmir.

Tahir TAĞIYEV

Son xəbərlər